ជាតិ
សង្គមជាតិ
កម្មវិធីទូរស័ព្ទ «ទីចងចាំ» នឹងជំរុញឲ្យយុវជនជំនាន់ក្រោយ យល់ដឹងអំពីរឿងរ៉ាវខ្មែរក្រហម រូបពីហ្វេសប៊ុក DMC
× ភ្នំពេញ៖ កម្មវិធីទូរស័ព្ទនិងគេហទំព័រថ្មីមួយនៃគម្រោង ទីចងចាំ ឬ Mapping Memories Cambodia (MMC) ដែលនិយាយពីរឿងរ៉ាវនៅសម័យខ្មែរក្រហម និងការផ្សារភ្ជាប់ទីតាំងសំខាន់ៗនៅលើផែនទីកម្ពុជា នឹងត្រូវដាក់សម្ពោធ នាថ្ងៃទី០២ ខែកុម្ភៈ ឆ្នាំ២០១៩ នេះ។ កម្មវិធីនេះ នឹងជំរុញឲ្យយុវជនយល់ដឹងពីរឿងរ៉ាវខ្មែរក្រហមកាន់តែច្បាស់។
កញ្ញា ចាន់ មុយហុង ប្រធានគម្រោង បានលើកឡើងថា គម្រោងទីចងចាំ ឬ Mapping Memories Cambodia (MMC) ធ្វើឡើង ដើម្បីជំរុញឲ្យយុវជនខ្មែរជំនាន់ក្រោយ ប្រើប្រាស់ បច្ចេកវិទ្យានាពេលបច្ចុប្បន្ននេះ អាចសិក្សាស្រាវជ្រាវអំពីរឿងរ៉ាវខ្មែរក្រហម ព្រមទាំងបង្កើតការសន្ទនាអំពី ប្រវត្តិសាស្ត្រ ខ្មែរក្រហមក្នុងចំណោមយុវជន និងក្រុមគ្រួសារ។
កម្មវិធីសម្ភោធនេះនឹងប្រព្រឹត្តទៅនៅដេប៉ាតឺម៉ង់ប្រព័ន្ធ ផ្សព្វផ្សាយ និងសារគមនាគមន៍ (DMC) នៃសាកលវិទ្យាយល័យភូមិន្ទភ្នំពេញ ចាប់ពីម៉ោង៤:៣០ល្ងាចដល់៨:០០យប់។ កម្មវិធីនេះក៏មានការចូលរួមពីសំណាក លោក សោម រតនា សាកលវិទ្យាធិការរងនៃសាកលវិទ្យាល័យភូមិន្ទភ្នំពេញ, លោកស្រី Julia Ilse អ្នកសម្របសម្រួលសេវាសន្តិភាពស៊ីវិល (ស៊ី.ភី.អេស.) នៃកិច្ចសហប្រតិបត្តិការអាល្លឺម៉ង់ (GIZ), លោក ឆាំង យុ នាយកប្រតិបត្តិមជ្ឈមណ្ឌលឯកសារកម្ពុជា (DC-CAM) ភ្ញៀវកិត្តិយស ព្រមទាំងសាស្ត្រាចារ្យ, និស្ស និងសារធារណៈជនផងដែរ។ នេះបើតាមការឲ្យដឹងពីកញ្ញា។
គួររម្លឹកថា ក្នុងឆ្នាំសិក្សា ២០១៨ និស្សិតជំនាន់ទី១៥ និងទី១៦ នៃដេប៉ាតឺម៉ង់ ប្រព័ន្ធផ្សព្វផ្សាយ និងសារគមនាគមន៍ បានផលិតបទយកការណ៍វិទ្យុ ភាពយន្តឯកសារខ្នាតខ្លី កម្រងរូបភាព និងអត្ថបទព័ត៌មាន ស្តីពីរឿងរ៉ាវដែលបានកើតឡើងនៅសម័យខ្មែរក្រហម ហើយពួកគេបានចុះស្រាវជ្រាវ ផ្ទាល់នៅនឹងកន្លែង ព្រមទាំងបានសម្ភាស អ្នកនៅរស់រានមានជីវិតពីរបបនោះ។
ប្រធានគម្រោងរូបនេះបានបន្តថា សារធារណៈជនក៏អាចចូលទស្សនា ស្តាប់ និងអាន សាច់រឿងទាំងអស់ជាភាសាខ្មែរ ឬ អង់គ្លេស តាមរយៈគេហទំព័រ mappingmemoriescambodia.com ឬកម្មវិធីទូរស័ព្ទ ទីចងចាំ ឬ Mapping Memories Cambodia (MMC) ។ ហើយក៏អាចទាញយកបានទនៅលើ App Store និងនៅលើ Google Play Store បានផងដែរ ។
© រក្សាសិទ្ធិដោយ thmeythmey.com