អន្តរជាតិ
បច្ចេកវិទ្យា
តើទូរទស្សន៍មានដើមកំណើតយ៉ាងដូចម្តេច?
× ព័ត៌មាន កម្មវិធីកម្សាន្ត ពាណិជ្ជកម្ម និងពិធីប្រារព្ធគ្រប់បែបយ៉ាងត្រូវបានប្រជាជនយ៉ាងងាយស្រួលតាមរយៈទូរទស្សន៍ក្នុងផ្ទះ ក្នុងភោជនីយដ្ឋាន និងកន្លែងធ្វើការ។ល។ ប៉ុន្តែឧបករណ៍ដ៏សាមញ្ញមួយនេះ មានប្រវត្តិយ៉ាងអស្ចារ្យនៃការស្រាវជ្រាវផ្នែកបច្ចេកវិទ្យា។
យោងតាមគេហទំព័រ bebusinessed.com នៅអំឡុងឆ្នាំ១៨០០ ទូរទស្សន៍មេកានិចដំបូងត្រូវបានគេបង្កើតឡើង។ វាគ្រាន់តែអាចបង្ហាញរូបភាពនឹងថ្កល់ប៉ុណ្ណោះ និងមានលក្ខណៈបុរាណមែនទែន។ ដល់ឆ្នាំ១៩២០ អ្នកជំនាញពីរនាក់ គឺលោក John Logie Baird ជនជាតិស្កុតឡែន និងលោក Charles Francis Jekins ជនជាតិអាមេរិកបានបង្កើតទូរទស្សន៍មេកានិច ដោយប្រើប្រាស់ដុំដែករង្វិល មានប្រហោងចោះជារាងរង្វង់។
ទោះបីជាបច្ចេកវិទ្យានេះមិនទាន់មានភាពល្អប្រសើរក៏ដោយមែន ប៉ុន្តែវាជាជំហានសំខាន់សម្រាប់ការច្នៃប្រឌិតទូរទស្សន៍ថ្ងៃអនាគត។ នៅឆ្នាំ១៩២៧ លោក Philo Taylor មានវ័យ ២១ឆ្នាំ កាលនោះបានបង្កើតទូរទស្សន៍អេឡិចត្រូនិចដំបូងគេ។ លំនាំនោះក៏ត្រូវបានទូរទស្សន៍ខ្លះបន្តប្រើប្រាស់ដល់បច្ចុប្បន្នផងដែរ។
លោក Philo បានប្រើប្រាស់ឧបករណ៍ពិសេសមួយដែលបាញ់ផង់អគ្គីសនីហៅថា«អេឡិចត្រុង»ដើម្បីផលិតជារូបភាពលើផ្ទៃកញ្ចក់ទូរទស្សន៍។ នៅឆ្នាំ១៩៣៤ ទូរទស្សន៍ទាំងអស់ដែលបានផលិតឡើងតែងប្រើប្រាស់លំនាំអេឡិចត្រូនិចនេះទាំងអស់។ ក្នុងឆ្នាំ១៩៥៥ ឧបករណ៍បញ្ជាទូរទស្សន៍ (តេលេ) ត្រូវបានគេផលិតឡើង។
នៅដើមសតវត្សន៍ទី២១ គេឃើញការរីកលូតលាស់នៃទូរទស្សន៍ LCD, LED ឬ OLED Display ជាដើម។ ទាំងនេះសុទ្ធសឹងតែជាភាពខុសគ្នាក្នុងការបញ្ចេញពន្លឺតែប៉ុណ្ណោះ។ ទូរទស្សន៍ដែលមនុស្សរាល់គ្នាប្រើពាក្យធម្មតាថា«គូទប៉ោង»ត្រូវបានគេបំពាក់ប្រព័ន្ធ CRT ។ ប្រព័ន្ធនេះជាលំនាំបុរាណ ហើយមិនសូវមានការផលិតបន្តទៀតគេក្នុងពេលសព្វថ្ងៃ។ សរុបមក បច្ចេកវិទ្យាមួយនេះទើបតែឃើញមានវត្តមានក្នុងរយៈពេលប្រហែលជា១០០ឆ្នាំមុននោះទេ។ ប៉ុន្តែបើពិចារណាឲ្យបានច្បាស់ វាបានផ្លាស់ប្តូររបៀបនៃការរស់នៅរបស់មនុស្សច្រើនណាស់៕
© រក្សាសិទ្ធិដោយ thmeythmey.com