ភ្នំពេញ៖ របាយការណ៍របស់អង្គការសមាគមធាងត្នោតបានរកឃើញថា សហគមន៍ក្រីក្រចំនួន៩៩ ក្នុងទីក្រុងភ្នំពេញមិនទាន់ទទួលបានការគ្រប់គ្រងកាកសំណល់ពីក្រុមហ៊ុនស៊ីនទ្រីនៅឡើយ ខណៈក្រុមហ៊ុនមួយនេះទទួលបានអជ្ញាប័ណ្ណពីសាលារាជធានីភ្នំពេញ ក្នុងការប្រមូលកាកសំណល់។ ក្រុមហ៊ុនស៊ីនទ្រីក៏មិនបានយកចិត្តទុកដាក់ចំពោះកម្មកររបស់ខ្លួនក្នុងម៉ោងធ្វើកាផងដែរ ដែលបណ្ដាលឲ្យមនុស្សស្លាប់ ១៤ នាក់ក្នុងរយៈពេល ៤ ឆ្នាំចុងក្រោយនេះ។ ខាងក្រុមហ៊ុនស៊ីនទ្រី បដិសេធលើការចុះផ្សាយរបាយការណ៍របស់អង្គការមួយនេះ។
ក្នុងចំណោមសហគមន៍៩៩ (៣៥.៧%) នៃសហគមន៍២៧៧ក្នុងរាជធានីភ្នំពេញ នៅតែមិនទាន់បានទទួលការគ្រប់គ្រងកាកសំណល់ ខុសពីសហគមន៍ផ្សេងៗ ដែលទទួលបានការគ្រប់គ្រងកាកសំណល់បានល្អ។ សហគមន៍ខ្លះរស់នៅក្នុងកន្លែងដែលមានសំរាមច្រើន ឬរងផលប៉ះពាល់ដោយសារសំរាមនៅជុំវិញសហគមន៍របស់ពួកគេ រួមទាំងហានិភ័យដោយសារអគ្គីភ័យ និងជំងឺដែលប៉ះពាល់ដល់ការរស់នៅប្រចាំថ្ងៃផងដែរ។ នេះបើយោងតាមការលើកឡើងក្នុងរបាយការណ៍អភិបាលកិច្ច គ្រប់គ្រងកាកសំណល់នៅក្នុងរាជធានីភ្នំពេញ ដែលចេញផ្សាយដោយអង្គការសមាគមធាងត្នោត។
ក្នុងរបាយការណ៍ក៏បានរកឃើញពីមូលហេតុដែលសហគមន៍ជាច្រើន មិនទទួលបានសេវាប្រមូលសំរាមដោយសារការខ្វះចន្លោះរបស់អាជ្ញាធរ ស្ថានភាពផ្លូវតូចចង្អៀត និងការបែងចែករទេះដាក់សំរាមមិនស្មើភាពគ្នានៅទូទាំងទីក្រុង។
នៅក្នុងរបាយការណ៍បានស្រង់សំដីរបស់សមាជិកនៃសហគមន៍ក្រីក្រទាំងនោះថា៖«ពួកគេ (អាជ្ញាធរ) មិនយកចិត្តដាក់នឹងពួកយើងទេ។ ពួកគេមិនខ្វល់ពីបញ្ហានៅក្នុងសហគមន៍នេះដែរ»។ របាយការណ៍កម្រាស់៤៣ទំព័រ ដដែលក៏បានបង្ហាញពីការស្លាប់របស់កម្មករក្រុមហ៊ុនស៊ីនទ្រីចំនួន ១៤ នាក់ ដែលបណ្ដាលមកពីខ្វះការយកចិត្តទុកដាក់លើសុវត្ថិភាពបុគ្គលិកក្នុងម៉ោងធ្វើការ ដែលផ្ទុយពីច្បាប់ការងារកម្ពុជាឆ្នាំ ១៩៩៧។
«ស៊ីនទ្រីមិនបានបំពេញកាតព្វកិច្ចផ្លូវច្បាប់របស់ខ្លួន ដើម្បីធានាសុវត្ថិភាពដល់កម្មកររបស់ខ្លួនដោយសារមិនផ្តល់សុវត្ថិភាពសមា្ភរៈ ដូចជាសម្លៀកបំពាក់ការងារការពារ ឬកាត់បន្ថយគ្រោះថ្នាក់នៅកន្លែងធ្វើការ»។នេះបើតាមរបាយការណ៍។
អង្គការសមាគមធាងត្នោតបានសង្កត់ធ្ងន់ថា កង្វះតម្លាភាព សមធម៌គណនេយ្យភាព ការឆ្លើយតប និងការគោរពចំពោះជីវិតរបស់កម្មករស៊ីនទ្រី នាំឱ្យមានការសន្និដ្ឋានចុងក្រោយថា ការគ្រប់គ្រងកាកសំណល់នៅមានកម្រិត នៅក្នុងរាជធានីភ្នំពេញ។
លោក ទួន ស៊ីផេង ប្រធានក្រុមស៊ីនទ្រីបានប្រាប់សារព័ត៌មានថ្មីៗថា លោកមិនទាន់បានឃើញរបាយការណ៍របស់អង្គការសមាគមធាងត្នោតនោះនៅឡើយទេ ដូច្នេះលោកមិនទាន់ដឹងថាសហគមន៍មួយណាដែលអង្គការចង់លើកឡើងនោះឡើយ។ លោកបាននិយាយថា៖ «ខ្ញុំមិនទាន់បានមើលផង មិនដឹងថាគាត់ចង់និយាយពិសហគមន៍ណាមួយនោះទេ សហគន៍ខ្លះដូចនៅភ្នំបាត គឺយើងមិនមានសេវាទៅដល់ទេ»។
ទាក់ទងករណីកម្មករបាត់បង់ជីវិត ប្រធានក្រុមហ៊ុនស៊ីនទ្រីរូបនេះ បាននិយាយថា ក្នុងឆ្នាំ២០១៨នេះ មានកម្មករស៊ីទ្រីចំនួន២នាក់ បានជួបគ្រោះថា្នក់ ហើយឆ្នាំខ្លះមិនមានអ្នកស្លាប់នោះទេ។ បើតាមលោក ស៊ីផេង ក្រុមហ៊ុនលោកតែងតែចុះអប់រំកម្មករជាញឹញាប់ពីការពារខ្លួន និងអនាម័យ។ ហើយក្រុមហ៊ុនក៏បានទិញ សម្ភារការពារសុវត្តិភាព រួមទាំងទិញធានារ៉ាប់រង (បបស) សម្រាប់កម្មករគ្រប់គ្នា ដោយក្នុងមួយឆ្នាំមិនក្រោម១ម៉ឺនដុល្លានោះទេ។ ក្រុមហ៊ុនក៏មានកញ្ចប់ថវិការសម្រាប់កម្មករពេលជួបគ្រោះថ្នាក់ផងដែរ។
«ឆ្នាំទៅមិញមានតែអ្នកស្លាប់តែពីរនាក់ទេ ខ្ញុំមិនដឹងគាត់បូកពីណាទៅណាទេ ហើយមិនដឹងថាគាត់បានទិន្នន័យនឹងមកពីណាឲ្យពិតប្រាកដ ខ្ញុំក៏មិនដឹងដែរ ព្រោះគាត់មិនដែលទាក់ទងមកខាងខ្ញុំផង។យើងមានខោអាវចំណាំងផ្លាតដូចអាវប៉ូលិស ហើយយើងមានស្រោមដៃ មានម៉ាស តែនិយាយតាមត្រង់ពួកគាត់(កម្មករស៊ីនទ្រី)មិនចូលចិត្តប្រើទៅវិញ ពេលខ្លះកាត់លុយពួកគាត់ ដើម្បីឲ្យគាត់ប្រើប្រាស់ទៀត។ តែវាជួបផលលំបាក ពេលខ្លះគាត់ពិបាក ព្រោះសំរាមនៅស្រុកយើងអត់ដូចសំរាមស្រុកគេ ដែលងាយស្រួលដែលពាក់ស្រោមដៃ យួរកញ្ចប់បោះចូលឡានតែម្ដងឡើយ។ សំរាមស្រុកយើងវិញកម្មករត្រូវកាន់ប៉ែលដើម្បីចូកសំរាម ប៉ុន្តែបើពាក់ស្រោមដៃវារអិល ពិបាកកាន់ កម្មករគាត់លើហេតុផលដូច្នឹង»។ នេះជាការបកស្រាយរបស់លោក ទួន ស៊ីផេង៕