ជាតិ
សង្គមជាតិ
រូបភាពពីទំព័រហ្វេសប៊ុកអាជ្ញាធរអគ្គិសនីកម្ពជា
×![]()
ដោយ: ឡាយ សុភាវតី
គិតត្រឹមចុងឆ្នាំ២០១៨ អាជ្ញាធរអគ្គិសនីកម្ពុជា បានផ្តល់ដែនអាជ្ញាបណ្ណឲ្យក្រុមហ៊ុនរដ្ឋ និងឯកជនជាង១៤ម៉ឺនភូមិ ដែលស្មើជាង៩៩ភាគរយ នៃចំនួនភូមិសរុបនៅកម្ពុជា ខណៈការសាងសង់បណ្តាញចែកចាយអគ្គិសនី បានទៅដល់ភូមិជាង១២ម៉ឺនភូមិ ដែលស្មើជាង៨៦ភាគរយ។ ទន្ទឹមនឹងនេះ នៅចុងឆ្នាំ២០១៨ វឌ្ឍនភាពនៃការភ្ជាប់ចរន្តអគ្គិសនីឲ្យអ្នកប្រើប្រាស់គ្រប់ប្រភេទមានជាង២,៦លានកន្លែង។ 
របាយការណ៍ ដែលត្រូវបានផ្សពផ្សាយ កាលពីថ្ងៃទី២៣ ខែមករា ឆ្នាំ២0១៩ ក្នុងសន្និបាតបូកសរុបការងារឆ្នាំ២0១៨ និងលើកទិសដៅការងារឆ្នាំ២0១៩ របស់អាជ្ញាធរអគ្គិសនីកម្ពុជា បានបង្ហាញថា នៅចុងឆ្នាំ២០១៨ ប្រភពផលិតអគ្គិសនីក្នុងស្រុកមានអានុភាព ជាង២ពាន់មេហ្គាវ៉ាត់។ របាយការណ៍ បានឲ្យដឹងទៀតថា ការអភិវឌ្ឍប្រភពអគ្គិសនី បានបន្ថែមអានុភាពជាង១ពាន់ មេហ្គាវ៉ាត់ ទន្ទឹមនឹងនេះក៏បានបញ្ឈប់ដំណើរការប្រភពអគ្គិសនីប្រើប្រេងខ្មៅ៥២មេហ្គាវ៉ាត់ និងលុបបំបាត់ការផលិតអគ្គិសនីប្រើម៉ាស៊ីនម៉ាស៊ូតរបស់អ្នកកាន់អាជ្ញាបណ្ណអស់៣៦មេហ្គាវ៉ាត់។
ចំណែក ប្រភពនាំចូលពីប្រទេសជិតខាង បានកាត់បន្ថយមកនៅត្រឹម១៤ភាគរយ នៅឆ្នាំ២០១៨ ដែលបានថយចុះជាបន្តបន្ទាប់ពី៤០ភាគរយ នៅឆ្នាំ២០១៤។ នេះបើតាមរបាយការណ៍ដដែល ដោយបង្ហាញទៀតថា នៅចុងឆ្នាំ២០១៨ បរិមាណថាមពលអគ្គិសនី ដែលបានផ្តល់សរុប មានជាង៩ពាន់លានគីឡូវ៉ាត់ម៉ោង គឺកើនឡើងជិត២ដង ក្នុងអំឡុងឆ្នាំ២០១៤ ដល់ឆ្នាំ២០១៨៕
Tag:
អគ្គិសនី
© រក្សាសិទ្ធិដោយ thmeythmey.com
