ភ្នំពេញ៖ ក្រៅពីបន្លែនាំចូលពីបរទេសមួយចំនួន «ខាត់ណាឈើ ឬខាត់ណាដើម» ជាបន្លែក្នុងស្រុកមួយប្រភេទ ដែលមានតម្រូវការខ្ពស់ ក្នុងឱកាសបុណ្យចូលឆ្នាំប្រពៃណីចិន។ បន្លែប្រភេទនេះ អាចយកទៅចម្អិនធ្វើជាម្ហូបអាហារផ្សេងៗបានច្រើន ដូចជា ឆា និងជាសម្លរមួយចំនួនជាដើម។ ប្រជាកសិករដាំបន្លែ និយមដាំដុះបន្លែនេះ នៅពេលជិតបុណ្យទានប្រចាំឆ្នាំធំៗមកដល់ ពិសេសបុណ្យចូលឆ្នាំចិនតែម្តង។ អ្នកដាំបន្លែទាំងនោះ បានលើកឡើងថា ខាត់ណាឈើ ជាបន្លែស្រួលលក់ជាងបន្លែផ្សេងៗបំផុត ក្នុងរដូវចូលឆ្នាំចិន ព្រមទាំងទទួលបានចំណូលខ្ពស់ទៀតផង។
បុរសវ័យជិត៣០មួយរូប កំពុងឈរស្រោចទឹកនៅចម្ការបន្លែខាត់ណាឈើរបស់ខ្លួន លើផ្ទៃដីទទឹងប្រមាណ៣០ម៉ែត្រ និងបណ្តោយ១០០ម៉ែត្រ នៅភូមិប្រាយក្រោម ឃុំស្វាយប្រទាល ស្រុកស្អាង ខេត្តកណ្តាល។ លោក ខន ខេម ជាជនចំណូលថ្មីក្នុងភូមិ-ស្រុកនេះ លោកទើបតែចាប់អាជីពជាអ្នកដាំបន្លែបានជាងបីឆ្នាំប៉ុណ្ណោះ។ បន្លែខាត់ណាឈើនេះ សម្រាប់ត្រៀមលក់ថ្ងៃបុណ្យចូលឆ្នាំចិន។
លោក ខេម បាននិយាយទាំងក្តីរីករាយជាមួយដំណាំដែលកំពុងធ្វើថា ខាត់ណាឈើនេះ ទើបតែមានអាយុបានជាងមួយខែប៉ុណ្ណោះ។ ដូច្នេះ ថ្ងៃបុណ្យចូលឆ្នាំចិន គឺត្រូវប៉ាន់តែម្តង សម្រាប់យកលក់នៅឯណាផ្សារនានា ក្នុងក្រុងភ្នំពេញ។ ជាទូទៅបន្លែប្រភេទនេះ អាយុកាលពី៥៥ ទៅ៦០ថ្ងៃ គឺពេញអាចកាត់យកទៅលក់បានហើយ។ នេះបើតាមបុរសរូបនេះ។
លោក ខន ខេម បាននិយាយដូច្នេះ« ខាត់ណាឈើនេះ ខ្ញុំដាំតែម្តងទេ ក្នុងមួយឆ្នាំ ហើយការដាំនោះគឺតម្រូវឲ្យកៀក ឬចំថ្ងៃចូលឆ្នាំចិនតែម្តង ដោយរំពឹងថា នឹងទទួលបានប្រាក់ចំណូលច្រើនជាងថ្ងៃធម្មតា ឬពិធីបុណ្យប្រចាំផ្សេងៗ។ ក្នុងមួយឆ្នាំៗ វាមានតម្លៃចន្លោះពី៣ ទៅ៤ពាន់រៀល ក្នុងមួយគីឡូក្រោម ដែលជាតម្លៃបោះដុំ ឬម៉ៅចម្ការ តែម្តង។ ចម្ការបន្លែខាត់ណាឈើនេះ អាចឲ្យទន្និផលបានយ៉ាងហោចណាស់៥តោន ក្នុងមួយឆ្នាំ។ នេះបើតាម លោក ខន ខេម ប្រាប់សារព័ត៌មានថ្មីៗ។
រីឯ លោក សឿន ង៉ោល ក៏មានគំនិត និងដាំដុះមិនខុសគ្នាពីបុរសខាងលើប៉ុន្មានដែរ ដោយលោក យល់ឃើញថា ខាត់ណាឈើ មានតម្លៃល្អប្រសើរ នារដូវចូលឆ្នាំចិន។ បុរសដែលបទពិសោធន៍ដាំបន្លែជាង៣០ឆ្នាំរូបនេះ បានដាំបន្លែខាត់ណាឈើលើផ្ទៃដីជិត៤០ម៉ែត្រ គុណ១០០ម៉ែត្រ ដែលអាចទទួលប្រាក់ចំណេញបានចន្លោះពី៦លានរៀល ទៅ៨លានរៀល ដែលអាស្រ័យតាមទីផ្សារជាក់ស្តែង។ ក្រោយផុតរដូវចូលឆ្នាំចិន លោក សឿង ង៉ោល ងាកទៅដាំបន្លែផ្សេងៗ ដែលងាយស្រួលថែទាំ និងឆាប់ក្នុងការទទួលផល ដូចជា៖ ពោតបារាំង ស្ពៃតឿ និងត្រប់ជាដើម។
ដោយឡែក អាជីករដែលលក់បន្លែនៅផ្សារមួយចំនួនក្នុងរាជធានីភ្នំពេញ ក៏បានលើកឡើងដូច្នេះដែរថា ខាត់ណាឈើ ជាបន្លែលក់ដាច់ខ្លាំងក្នុងចំណោមបន្លែដែលនាំចូលពីបរទេសមួយចំនួន នារដូវចូលឆ្នាំចិន។ អ្នកស្រី សុខ រ៉ាវី ជាអ្នកលក់បន្លែមួយកន្លែង នៅផ្សារបឹងត្របែក បាននិយាយថា ខាត់ណាឈើ លក់បានតម្លៃខ្ពស់ទៅតាមតម្រូវការក្នុងថ្ងៃបុណ្យចូលឆ្នាំចិន ដែលតម្លៃមិនក្រោម៦,០០០រៀល ក្នុងមួយគីឡូឡើយ។ ហើយឆាំ្នខ្លះលក់បាន ៦,០០០ ទៅ ៨,០០០រៀល។ ឯឆ្នាំខ្លះទៀតឈានទៅដល់១២,០០០រៀលក៏មានដែរ ព្រោះបន្លែក្នុងផ្គត់ផ្គង់មិនគ្រប់គ្រាន់ ត្រូវនាំចូលពីវៀតណាម ដែលមានតម្លៃខ្ពស់។
អ្នកស្រី វី បានអះអាងថា បើថ្ងៃធម្មតាវិញ បន្លែខាត់ណាឈើ ក៏មិនមានតម្លៃមិនទាបដែរ ដែលអាចលក់បាន៤,០០០ ទៅ ៥,០០០រៀល ក្នុងមួយគីឡូក្រោម។
ចំណែក អ្នកស្រី លី សុខហៀង ជាអ្នកលក់បន្លែបោះដុំ និងរាយគ្រប់មុខ មួយកន្លែងនៅផ្សារដើមគរ ក៏បានលើកដូចស្ត្រី ដែលលក់បន្លែនៅផ្សារបឹងត្របែកផងដែរ។ ជាមួយគ្នានេះ អ្នកស្រី សុខហៀង ក៏បានរំពឹងទុកថា«ខាត់ណាឈើ ក្នុងរដូវបុណ្យចូលឆ្នាំចិននេះ នឹងមានតម្លៃមិន ទាបជាង៧,០០០រៀល ក្នុងមួយគីឡូក្រោមឡើយ។ «ព្រោះមានពីរចំណុច ដែលបានជាខ្ញុំហ៊ាននិយាយដូច្នេះ។ ទី១ បន្លែនេះ ជារៀងរាល់ឆ្នាំមិនដែលមានតម្លៃទាប ពោល មិនក្រោម៦,០០០រៀល ក្នុងមួយគីឡូក្រោម នៅថ្ងៃបុណ្យចូលឆ្នាំចិន និងទី២ គឺសូវជាមានអ្នកដាំដុះច្រើន។ ទោះជាច្រើន ក៏ថោកដែរ»។ នេះបើតាមអ្នកស្រី សុខហៀង។
សូមបញ្ជាក់ថា បុណ្យចូលឆ្នាំប្រពៃណីចិន នៅឆ្នាំ២០១៩នេះ នឹងប្រារព្ធឡើងក្នុងរយៈពេលថ្ងៃគឺចាប់ពីថ្ងៃទី៤ដល់៦ កុម្ភៈ ៕