កាលពីថ្ងៃទី ២ កុម្ភៈកន្លងទៅ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានចុះពិនិត្យការបង្កបង្កើនផលរបស់កសិករនាខេត្តតាកែវ។ ក្នុងដំណើរទស្សនកិច្ចនេះ លោក វេង សាខុន ក៏បានទៅពិនិត្យមើលកសិដ្ឋានចិញ្ចឹមមាន់យកពងរបស់អ្នកស្រី ទួត ផល្លាយ ដែលស្ថិតនៅភូមិធ្នោះ ឃុំអង្គកែវ ស្រុកទ្រាំង ខេត្តតាកែវ។

 

កសិដ្ឋានចិញ្ចឹមមាន់យកពងរបស់អ្នកស្រី ផល្លាយ បានចិញ្ចឹមមាន់ប្រមាណ ១.៥ម៉ឹនក្បាល ដែលក្នុង១ថ្ងៃ អាចប្រមូលពងមាន់បានប្រមាណ ៩ពាន់ពង។ បើតាមអ្នកស្រី ផល្លាយ ពងមាន់លេខ១ អាចលក់បាន ៤រយរៀល ហើយក្នុង១ខែ អាចរកប្រាក់ចំណូលបានជាង ១ពាន់ដុល្លារ។ ចំណូលពីការចិញ្ចឹមមាន់យកពងនេះ បានជួយលើកស្ទួយជីវភាពគ្រួសាររបស់អ្នកស្រីបានយ៉ាងល្អប្រសើរជាងមុនផងដែរ។

 

ក្នុងដំណើរទស្សនកិច្ចនេះ លោក វេង សាខុន ក៏បានណែនាំដល់ការិយាល័យសុខភាពសត្វ និងផលិតកម្មសត្វឱ្យជួយផ្តល់បច្ចេកទេសថ្មីៗជូនអ្នកស្រី ទួត ផល្លាយ បន្ថែមទៀត ដើម្បីលើកកម្ពស់ផលិតភាព គុណភាព អនាម័យ និងបរិស្ថាន ក្នុងការធានាបាននូវសុខភាពអ្នកបរិភោគ និងអ្នករស់នៅជិតខាង។ នេះបើតាមហ្វេសប៊ុករបស់ក្រសួងកសិកម្មដដែល៕