អន្តរជាតិ
នយោបាយអន្តរជាតិ
ព្រះរៀមស្តេចថៃ អ៊ូប៊ុនរ័តន៍ ឈរជាបេក្ខជននាយករដ្ឋមន្ត្រីតំណាងបក្សស្និទ្ធលោក ថាក់ស៊ីន
× ម្ចាស់ក្សត្រិយ៍ អ៊ូប៊ុនរ័តន៍ រាជកញ្ញា ( Ubolratana Rajakanya) ត្រូវបានគណបក្សរក្សាជាតិថៃ (Thai Raksa Chart) ដែលស្និទ្ធនឹងលោក ថាក់ស៊ីន ស៊ីណាវ៉ាត់ ស្នើជាបេក្ខជននាយករដ្ឋមន្ត្រីរបស់បក្សដើម្បីប្រជែងក្នុងការបោះឆ្នោតសាកលមកដល់នៅចុងខែមីនា។ ម្ចាស់ក្សត្រិយ៍ អ៊ូប៊ុនរតនា ត្រូវជាព្រះរៀមរបស់ព្រះមហាក្សត្របច្ចុប្បន្ន។ នេះបើតាមទីភ្នាក់ងារព័ត៌មាន AFP។
ជារឿងដែលគួរឲ្យភ្ញាក់ផ្អើលមួយ នៅពេលសមាជិករាជ្យរង្សម្ចាស់ក្សត្រិយ៍ អ៊ូប៊ុនរ័តន៍ រាជកញ្ញា ត្រូវបានគណបក្សនយោបាយដែលស្និទ្ធជាមួយលោក ថាក់ស៊ីន បក្សរក្សាជាតិថៃ ដាក់ស្នើជាបេក្ខជននាយករដ្ឋមន្ត្រីតំណាបក្សខ្លួន។ ទ្រង់ជាបុត្រីច្បងរបស់ព្រះចៅ ភូមិបុល អាឌុលយ៉ាដេត និងម្ចាស់ក្សត្រិយ៍ ស៊ីរីគិត (Sirikit) និងត្រូវជាព្រះរៀមព្រះមហាក្សត្របច្ចុប្បន្ន មហា វជិរាលង្ករណ៍។
ទោះជាបែបនេះក៏ដោយ គេមិនទាន់ច្បាស់ថា ម្ចាស់ក្សត្រិយ៍អង្គនេះទទួលយកការស្នើសុំនេះឬយ៉ាងណាឡើយ ហើយក៏មិនដឹងថា បេក្ខភាពរបស់ទ្រង់នឹងត្រូវគណៈកម្មការបោះឆ្នោតទទួលយកឬក៏អត់ដែរ។ វាជាលើកដំបូងដែលសែស្រឡាយរាជ្យវង្សស្វះស្វែងរកតំណែងនយោបាយកំពូលរបស់រដ្ឋ រាប់ចាប់ពីពេលដែលថៃជ្រើសរើសយករបបរាជានិយមអាស្រ័យរដ្ឋធម្មនុញ្ញឆ្នាំ ១៩៣២។
ថ្ងៃសុក្រនេះដែរ ក៏ជាថ្ងៃចុងក្រោយសម្រាប់បណ្តាគណបក្សនយោបាយទាំងអស់ចុះឈ្មោះសម្រាប់ប្រកួតប្រជែងការបោះឆ្នោតសភាដែលនឹងត្រូវធ្វើឡើងក្នុងថ្ងៃ ២៤ខែមីនាខាងមុខ ដែលវាជាការបោះឆ្នោតលើកដំបូងបំផុតចាប់ពីរដ្ឋប្រហារយោធាកើតឡើងឆ្នាំ ២០១៤។
ចំណែក គណបក្សរក្សាជាតិថៃ ដែលមានម្ចាស់ក្សត្រិយ៍ រាជកញ្ញា ជាបេក្ខជននាយករដ្ឋមន្ត្រីនេះ ជាបក្សមួយក្នុងចំណោមបក្សជាច្រើនផ្សេងទៀតដែលរណបបក្សភឿថៃដែលគ្រប់គ្នាស្គាល់ថា ជាបក្សឈ្នះរាល់ការបោះឆ្នោតទាំងអស់ក្នុងរយៈពេលពីរទសវត្សរ៍ចុងក្រោយមកនេះ។ មកដល់ឥឡូវនេះលោក ថាក់ស៊ីនបន្តដឹកនាំបក្សនេះពីចម្ងាយ បន្ទាប់ពីនិរទេសខ្លួនទៅបរទេសក្រោយរដ្ឋប្រហារឆ្នាំ ២០០៦ ដែរ។
យ៉ាងណាក៏ដោយអ្នកតាមដាននយោបាយថៃបានបង្ហាញចម្ងល់ ការចូលប្រឡូកជាបេក្ខជននាយករដ្ឋមន្ត្រីរបស់សមាជិកក្រុមគ្រួសាររាជរង្សថៃអង្គនេះ ដ្បិតមហាក្សត្រ និងក្រុមគ្រួសាររាជវង្សគឺស្ថិតក្រោមការពារដោយច្បាប់ការពារការប្រមាថព្រះមហាក្សត្ស។ គេមិនទាន់អាចដឹងនៅឡើយទេថា ម្ចាស់ក្សត្រិយ៍ អ៊ូប៊ុនរ័តន៍ ត្រូវបានការពារដោយច្បាប់នេះដូចសមាជិករាជរង្សឯទៀតឬអត់ឡើយ។
បើសិនជាទ្រង់ស្ថិតក្រោមការការពារដោយច្បាប់នោះ ចម្ងល់ធំមួយលេចឡើងគឺ តើអ្នកនយោបាយដទៃអាចចាត់ទុកទ្រង់ជាអ្នកនយោបាយសាមញ្ញធម្មតាឬក៏យ៉ាងណា ហើយវានឹងអាចប៉ះពាល់ដល់ការជជែកដេញដោលគ្នា និងការទិតៀនគ្នាទៅវិញទៅមកក្នុងយុទ្ធនាការស្វែងរកសំឡេងឆ្នោតបែបណាទៅវិញ។
ត្រឡប់មកវិញ ម្ចាស់ក្សត្រិយ៍ រាជកញ្ញា បានប្រសូត្រនៅក្នុងឆ្នាំ ១៩៥១ នៅទីក្រុង Laussane ប្រទេសស្វ៊ីស។ ទ្រង់បានបញ្ចប់ការសិក្សាផ្នែកគីមីជីវៈនៅវិទ្យាស្ថានបច្ចេកវិទ្យា ម៉ាសាឈូសេត សហរដ្ឋអាមេរិកនៅក្នុងឆ្នាំ ១៩៧៣។ ម្ចាស់ក្សត្រិយ៍ អ៊ូប៊ុនរ័ត្នន៍មានឈ្មោះបោះសំឡេងដោយសារសកម្មភាពសាធារណៈរបស់ទ្រង់ រួមជាមួយសំដែង ការច្រៀង និងការតុបតែងខ្លួនបែបទំនើបនិយមផងដែរ ហើយម្យ៉ាង ទ្រង់ក៏ធ្លាប់ប្រឆាំងតតាំងនឹងទំនៀមទម្លាប់ប្រពៃណីរបស់រាជរង្សក្នុងសង្គមថៃដែរ។
ក្នុងឆ្នាំ ១៩៧២ ទ្រង់បានសម្រេចព្រះទ័យបោះបង់ចោលឋានៈដើម្បីរៀបការជាមួយជនជាតិអាមេរិកម្នាក់។ ប៉ុន្តែក្រោយមកទ្រង់បានលែងលះគ្នា ដោយមានបុត្របីនាក់ មុនត្រឡប់មកថៃវិញដើម្បីរស់នៅក្នុងជីវភាពជាសែស្រឡាយរាជវង្សានុវង្សមកដល់សព្វថ្ងៃ។
ដោយឡែក ម្ចាស់ក្សត្រីយ៍អង្គនេះក៏មានទំនាក់ទំនងជិតស្និទ្ធជាមួយគ្រួសារ ស៊ីណាវ៉ាត់ ដែរ។ តាមបណ្តាញសង្គម ទ្រង់ប្រើប្រាស់សញ្ញាមួយចំនួនដែលមាននិន្នាការទៅគ្រួសារស៊ីណាវ៉ាត់ ទោះស្ថិតក្រោមការគ្រប់គ្រងរបស់របបសឹកក៏ដោយ។ តាមទីភ្នាក់ងារ AFP គេធ្លាប់ឃើញ ម្ចាស់ក្សត្រិយ៍អង្គនេះអង្គុយសើចជាមួយលោក ថាក់ស៊ីន និងលោកស្រី យីងឡាក់ នៅកម្មវិធីប្រកួតកីឡាបាល់ទាត់ពិភពលោកនៅប្រទេសរុស្ស៊ីឆ្នាំ ២០១៨ ដែរ៕
© រក្សាសិទ្ធិដោយ thmeythmey.com