អន្តរជាតិ
ព្យុយាត្រាអបអរថ្ងៃកំណើតកងទ័ពកូរ៉េកាលពីឆ្នាំ២០១៨
×![]()
ដោយ: តន ចាន់រិទ្ធារ៉ា
កូរ៉េខាងជើង មិនបានរៀបចំថ្ងៃកំណើតកងទ័ពរបស់ខ្លួនលើកទី៧១ នៅថ្ងៃទី៨ ខែកុម្ភៈ ឲ្យអធិកអធមដូចបណ្ដាឆ្នាំមុនៗឡើយ។ ប្រព័ន្ធផ្សព្វផ្សាយកូរ៉េខាងជើងបានលើកសរសើអតីតមេដឹកនាំ គីម អ៊ីលស៊ុង និងរៀបរាប់ពីគុណសម្បត្តិរបស់កងទ័ពប្រជាជនកូរ៉េក្នុងការអភិវឌ្ឍប្រទេស។ ភាពស្ងៀមស្ងាត់ក្នុងការអបអរពិធីបុណ្យដ៏ធំ ទំនងបណ្ដាលមកពីការគិតគូររបស់ក្រុងព្យុងយ៉ាងដែលមិនចង់បង្កើតបញ្ហាមុនជំនួបមេដឹកនាំលើកទីពីរនៅវៀតណាម។
គ្មានឡើយព្យុហយាត្រាយោធាទ្រង់ទ្រាយធំ ឬការសម្ញែងសព្វាវុធក្នុងខួបទី៧១ ថ្ងៃកំណើតកងទ័ពប្រជាជនកូរ៉េខាងជើងនៅថ្ងៃទី៨ ខែកុម្ភៈ។ «ថ្ងៃបង្កើតកងទ័ព» ដែលចង់សំដៅដល់ថ្ងៃបង្កើតកងទ័ពកាលពីឆ្នាំ១៩៤៨ នោះ ជាបុណ្យធំមួយនៅកូរ៉េខាងជើងក្នុងចំណោមបុណ្យធំៗជាច្រើនទៀត។ កាលពី២០១៧ កូរ៉េខាងជើងបានរៀបចំពិធីអបអរទ្រង់ទ្រាយធំ និងមានការបង្ហាញយុទ្ធោបករណ៍ថ្មីស៊េរីទំនើបបំផុត។
បើតាមទីភ្នាក់ងារព័ត៌មាន Yonhap មន្ត្រីក្រុងសេអ៊ូលនិយាយថា គ្មានសញ្ញាបង្ហាញពីរៀបចំព្យុហយាត្រា ឬសកម្មភាពធំដុំអ្វីក្នុងឆ្នាំនេះឡើយ។ ឯមូលហេតុវិញ មន្ត្រីកូរ៉េខាងត្បូងកត់សម្គាល់ថា កូរ៉េខាងជើងរៀបចំកម្មវិធីទ្រង់ទ្រាយធំ ឬបង្ហាញអានុភាពយោធារៀងរាល់៥ឆ្នាំម្ដង ឬ១០ឆ្នាំម្ដងប៉ុណ្ណោះ។
ឆ្នាំនេះទៀតសោត ការប្រារព្ធខួបកំណើតរបស់កងទ័ពកូរ៉េ ធ្វើឡើងតែប៉ុន្មានសប្ដាហ៍មុនជំនួបរវាងមេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិក ដូណាល់ ត្រាំ នៅវៀតណាមចាប់ពីថ្ងៃទី២៧ ដល់ទី២៨ ខែកុម្ភៈខាងមុខ។ គម្រោងនៃជំនួបនេះក៏អាចជាមូលហេតុដែលក្រុងព្យុងយ៉ាងមិនចង់រៀបចំពិធីអស្ចារ្យអ្វី ស្របពេលប្រេសិតអាមេរិក Steven Biegun ក៏កំពុងស្ថិតក្នុងទឹកដីកូរ៉េខាងជើងនៅឡើយដែរ។
លោក Biegun ដែលទៅដល់កូរ៉េខាងជើងតាំងពីថ្ងៃទី៦ ខែកុម្ភៈ រំពឹងថា ត្រឡប់ទៅកូរ៉េខាងត្បូងវិញនៅថ្ងៃទី៨ ខែកុម្ភៈនេះ។ មិនទាន់ព័ត៌មានលម្អិតជុំវិញដំណើរទស្សនកិច្ចនៅទីក្រុងព្យុងយ៉ាង ជាទីដែលលោកជួបចរចាជាមួយសមភាគីកូរ៉េខាងជើង Kim Hyok-chol ឡើយ ប៉ុន្តែប្រធានបទដែលលើកឡើងគ្មានអ្វីក្រៅពីការរៀបចំជំនួបមេដឹកនាំនៅវៀតណាម និងដំណើរការរំសាយនុយក្លេអ៊ែរដែលកំពុងជាប់គាំងនោះឡើយ។
ទោះគ្មានកាអបអរហ៊ឹកហ៊ាក់ក្ដី សារព័ត៌មានកូរ៉េខាងជើងក៏បានសរសេរលើទំព័រមុខរបស់ខ្លួនអំពីថ្ងៃកំណើតកងទ័ពដែរ និងតួនាទីរបស់លោក គីម អ៊ីលស៊ុង ។ កាសែតកូរ៉េខាងជើង Rodong Sinmun សរសេរថា ការបង្កើតកងទ័ពបានធានាដល់ការអភិវឌ្ឍដោយឯករាជ្យរបស់កូរ៉េខាងជើង ហើយកងទ័ពពបានកម្ចាត់សត្រូវដោយជោគជ័យក្រោមការដឹកនាំរបស់លោក គីម អ៊ីលស៊ុង ៕
Tag:
កូរ៉េខាងជើង
អាមេរិក
គីម ជុងអ៊ុន
ដូណាល់ ត្រាំ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
