ពិធីឡើងអ្នកតារបស់អ្នកភូមិក្រសាំងរលើងនៅប្រាសាទវត្តអធ្វា

ជាតិ

ពិធីឡើងអ្នកតារបស់អ្នកភូមិក្រសាំងរលើងនៅប្រាសាទវត្តអធ្វា

09, Feb 2019 , 4:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ នៅថ្ងៃទី៧ កុម្ភៈ ឆ្នាំ២០១៩ គឺត្រូវនឹងថ្ងៃ៣ កើត ខែមាឃ អ្នកភូមិនៅតំបន់អង្គរ តែងប្រារព្ធពិធីប្រពៃណីពីដូនតារបស់ពួកគេ នោះគឺពីធីឡើងមាឃ ឬឡើងអ្នកតា។ ពិធីនេះធ្វើឡើងនៅតាមទីសក្ការៈបូជា តាមប្រាសាទ និងតាមរោងអ្នកតាដែលជាម្ចាស់ភូមិ-ស្រុកជាដើម។

អ្នកភូមិក្រសាំងរលើង សង្កាត់សៀមរាប បានជួបជុំគ្នានៅទីតាំង៣ផ្សេងគ្នា ដើម្បីរៀបចំពិធីឡើងអ្នកតា ក្នុងនោះមាននៅប្រាសាទវត្តអធ្វា ទួលតាមឿង និងទួលយាយ ប៉ុក។ នៅប្រាសាទវត្តអធ្វា ចាស់ទុំប្រមាណ ២០នាក់ បានចូលរួមក្នុងពិធីតាមទំនៀមនេះ ដោយមាននាំមកដូចជាម្ហូបអាហារ គ្រឿងរណ្ដាប់ គ្រឿងសំណែន និងភ្លេងជាដើម។

លោកយាយ ប៉ិ មួន អាយុ៦៨ឆ្នាំ ដែលកំពុងប្រារព្ធពិធីឡើងអ្នកតានៅប្រាសាទវត្តអាធ្វា បានលើកឡើងថា រាល់ថ្ងៃ៣កើត ខែមាឃ អ្នកភូមិមិនដែលរំលងក្នុងការរៀបចំពិធីនេះឡើយ។

លោកយាយថា ពិធីនេះធ្វើឡើងដើម្បីសុំឱ្យលោកតាម្ចាស់ស្រុកជួយថែរក្សាអ្នកភូមិ ឱ្យទៅកន្លែងបានតែសេចក្ដីសុខ រកស៊ីមានបានទាំងអស់គ្នា និងចាកឆ្ងាយពីជំងឺផ្សេងៗ។ លោកយាយ ប៉ិ មួន បន្តថា៖« លោកតានៅទីនេះមានបារមីណាស់ ខ្ញុំធ្លាប់បានឃើញទំនៀមនេះធ្វើតាំងពីយាយតា និងឪពុកម្តាយរបស់ខ្ញុំមក លោកតានៅទីនេះ សុំអីបានហ្នឹង ស័ក្ដសិទ្ធិ»។

ស្ត្រីចំណាស់ដដែលបញ្ជាក់បន្តថា ក្នុងមួយឆ្នាំ គេធ្វើពិធីឡើងតាចំនួន២លើក។ លើកទី១ ធ្វើនៅថ្ងៃ៣កើត ខែមាឃធំ គេហៅថាបញ្ជូនអ្នកតាទៅទន្ល នាខែទឹកស្រក និងលើកទី២ គេតែងធ្វើនៅថ្ងៃ៣កើត ខែពិសាខ គេហៅថាបញ្ជូនអ្នកតាឡើងភ្នំ។ ក្នុងពិធីនេះ គឺមានការលេងភ្លេង ការបញ្ចូលរូប ដើម្បីឱ្យអ្នកតារាំរែកសប្បាយ និងពិសានំចំណីដែលផ្សេងៗ។ សកម្មភាពបញ្ចូលរូប គឺអាស្រ័យរូបដែលសណ្ឋិត ដែលមានចរិតឬកពារដូចជា កូនក្មេង ចូលចិត្តលេង រាំសប្បាយ និងម៉ឺងម៉ាត់ជាដើម។ល៕