ជាតិ
មន្ត្រីក្រសួងបរិស្ថាន៦រូប នឹងទៅជប៉ុនសិក្សាពីគោលនយោបាយបរិស្ថាន និងដំណើរការបន្សុទ្ធកម្មខ្យល់កខ្វក់
× ភ្នំពេញ៖ មន្ត្រីក្រសួងបរិស្ថានកម្ពុជាចំនួន៦រូប និងមន្ត្រីនៃបណ្ដាប្រទេសមេគង្គ(ឡាវ,ភូមា,ថៃ និងវៀតណាម) នឹងធ្វើទស្សនកិច្ចទៅកាន់ប្រទេសជប៉ុន ដើម្បីស្វែងយល់ពីគោលនយោបាយបរិស្ថាន និងសិក្សាពីដំណើរការធ្វើឲ្យប្រសើរឡើងនៃបន្សុទ្ធកម្មខ្យល់កខ្វក់។ ទស្សនកិច្ចនេះ ចាប់ផ្តើមពីថ្ងៃទី១១ ដល់ថ្ងៃទី១៩ ខែកុម្ភៈនេះ។ នេះបើតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា។
មន្ត្រីរដ្ឋាភិបាលកម្ពុជាចំនួន៦រូប មកពីក្រសួងបរិស្ថាន និងមន្ត្រីនៃបណ្តាប្រទេសមេគង្គ(ប្រទេសឡាវ ភូមា ថៃ និងវៀតណាម) ត្រូវបានអញ្ជើញទៅកាន់ប្រទេសជប៉ុន ចាប់ពីថ្ងៃទី១១-១៩ ខែកុម្ភៈ ក្រោមកម្មវិធីបណ្តាញផ្លាស់ប្តូរសិស្ស និស្សិត (JENESYS 2018)។
ក្នុងដំណើរទស្សនកិច្ចនេះ ប្រតិភូទាំងអស់ នឹងទស្សនកិច្ចនៅក្រសួងបរិស្ថានជប៉ុន ដើម្បីស្វែងយល់ពីគោលនយោបាយបរិស្ថានរបស់ជប៉ុន និងទៅទស្សនាទីក្រុងយុកកៃឈី នៃខេត្តមិអិ ជាកន្លែងដែលពលរដ្ឋទទួលការរងគ្រោះដោយការបំពុលខ្យល់អាកាសពីអតីតកាល ដើម្បីសិក្សាពីដំណើរការធ្វើឲ្យប្រសើរឡើងនៃបន្សុទ្ធកម្មខ្យល់កខ្វក់។
ក្រោយពីទស្សនានៅក្រសួងបរិស្ថានជប៉ុន ប្រតិភូ នឹងទៅទស្សនកិច្ចនៅកន្លែងដទៃទៀត ដែលពាក់ព័ន្ធទៅនឹងបរិស្ថាន និងបច្ចេកវិទ្យា រួមទាំងទទួលយកបទពិសោធន៍ពីវប្បធម៌ជប៉ុនផងដែរ។ ស្ថានទូតជប៉ុនប្រចាំកម្ពុជា សង្ឃឹមថាអ្នកចូលរួមនឹងអាចយល់ដឹងអំពីប្រទេសជប៉ុនកាន់តែស៊ីជម្រៅថែមទៀត និងចែករំលែកនូវបទពិសោធន៍របស់ខ្លួនឲ្យបានទូលំទូលាយទៅកាន់ប្រជាជនកម្ពុជា បន្ទាប់ពីវិលត្រលប់មកវិញ។
សូមបញ្ជាក់ថា កម្មវិធី JENESYS មានគោលបំណងជំរុញការយល់ដឹង និងការកសាងទំនុកចិត្តទៅវិញទៅមក ក្នុងចំណោមប្រជាជនជប៉ុន និងបណ្តាប្រទេសចូលរួម ដើម្បីកសាងមូលដ្ឋានគ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត។ នេះបើតាមសេចក្ដីប្រកាសព័ត៌មានដដែល៕
Tag:
បរិស្ថាន
ជប៉ុន
JENESYS
© រក្សាសិទ្ធិដោយ thmeythmey.com