អន្តរជាតិ
ឌូទើតេ ប្រកាសឲ្យមន្ត្រីដែលរួមគំនិតជាមួយឈ្មួញគ្រឿងញៀនរៀបចំលិខិតមរណភាពជាមុន
× ប្រមុខដឹកនាំកំពូលហ្វីលីពីនលោក រ៉ូឌ្រីហ្គោ ឌូទើតេ បានព្រមានខ្លាំងៗដល់មន្ត្រី និងកងកម្លាំងទាំងអស់ ដែលជាប់ពាក់ព័ន្ធនឹងសកម្មភាពជួញដូរគ្រឿងញៀនប្រុងប្រយ័ត្នខ្លួនឲ្យហើយ។ ដោយមិនខ្វល់ខ្វាយពីការរិះគន់ពីស្ថានភាពសិទ្ធិមនុស្សរបស់ប្រទេស លោក ឌូទើតេ ថែមបានគំរាមសម្លាប់អ្នកពាក់ព័ន្ធការជួញដូរគ្រឿងញៀនទាំងនោះ តាមរយៈសង្គ្រាមគ្រឿងញៀនរបស់លោកទៀតផង។
នាឱកាសនៃការប្រកាសតែងតាំងមន្ត្រីបម្រើការនៅវិមានរបស់ប្រធានាធិបតី Malacañang នៅថ្ងៃ៧ កុម្ភៈ លោកប្រធានាធីបតី រ៉ូឌ្រីហ្គោ ឌូទើតេ បានប្រកាសអះអាងជាថ្មីថា រដ្ឋាភិបាលរបស់លោក មិនបញ្ឈប់យុទ្ធនាការបោសសម្អាតគ្រឿងញឿន ឬសង្គ្រៀមបង្ក្រាបគ្រឿងញៀនឡើយ បើទោះបីជាមានការរិះគន់ដូចទឹកបាក់ទំនប់ពាក់ព័ន្ធនឹងបញ្ហាសិទ្ធិមនុស្សក៏ដោយ។
អ្វីដែលគួរឲ្យកត់សម្គាល់នោះ តាមការចុះផ្សាយរបស់ភ្នាក់ងារព័ត៌មានហ្វីលីពីន inquirer net លោកប្រធានាធិបតី ថែមទាំងបានប្រើប្រាស់ពាក្យសម្តីធ្ងន់ៗទៅកាន់មន្ត្រីខិលខូច ដែលជាប់ពាក់ព័ន្ធនឹងការជួយដូរគ្រឿងញៀនក្នុងប្រទេសទៀតផង។ លោកប្រធានាធិបតី បានប្រកាសឲ្យមន្ត្រីទាំងនោះ ត្រៀមលិខិតមរណភាពឲ្យហើយទៅ បើហ៊ានបំពានហើយ។
លោកប្រធានាធិបតី បានបញ្ជាក់ទៅកាន់មន្ត្រីខិលខូចទាំងនោះយ៉ាងដូច្នេះថា៖« អ្នកបំផ្លាញប្រទេសរបស់ខ្ញុំ ខ្ញុំនឹងសម្លាប់អ្នក។ ហើយសូមផ្ញើលិខិតមរណភាពរបស់អ្នកទៅកាន់ក្រុមសិទ្ធិមនុស្សឲ្យហើយទៅ។»
សូមជម្រាបផងដែរថា គិតចាប់តាំងពីឡើងកាន់តំណែងជាប្រធានាធិបតីហ្វីលីពីនក្នុងឆ្នាំ២០១៦មក លោក រ៉ូឌ្រីហ្គោ ឌូទើតេ បានប្រកាសធ្វើសង្គ្រាមប្រឆាំងនឹងគ្រឿងញៀន ដោយលោក សម្អាងថា បើលោកមិនបោសសម្អាតបញ្ហានេះទេ នោះយុវជនជំនាន់ក្រោយ ច្បាស់ជាមានបញ្ហាហើយ។ ចំណាត់ការរបស់លោក ត្រូវបានក្រុមសិទ្ធិមនុស្សរាយការណ៍ថា បានសម្លាប់ជនសង្ស័យមិនតិចពាន់នាក់ឡើយ ហើយក្រុមសិទ្ធិមនុស្ស ក៏បានទទូចឲ្យលោកបញ្ឈប់ផងដែរ៕
Tag:
ហ្វីលីពីន
គ្រឿងញៀន
© រក្សាសិទ្ធិដោយ thmeythmey.com