អន្តរជាតិ
វៀតណាម ត្រៀមខ្លួនដើម្បីជួយជំរុញកិច្ចប្រជុំកំពូលលើកទី២ របស់គីម-ត្រាំឲ្យបានជោគជ័យ
× រដ្ឋាភិបាលក្រុងហាណូយ បានប្រកាសស្វាគមន៍ចំពោះការជ្រើសរើសវៀតណាម ជាកន្លែងសម្រាប់ជំនួបកំពូលរបស់មេដឹកនាំប្រទេសកូរ៉េខាងជើង និងអាមេរិក។ ក្រុងហាណូយ ក៏បានសន្យាជួយសម្រួល និងជំរុញជំនួបនេះឲ្យបានជោគជ័យទៀងផង។
អ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng នៅថ្ងៃ៦ កុម្ភៈ បានឲ្យដឹងថា រដ្ឋាភិបាលវៀតណាម ស្វាគមន៍ចំពោះជំនួបលើកទីពីររបស់មេដឹកនាំអាមេរិក និងកូរ៉េខាងជើង ហើយក៏ប្រកាសគាំទ្រយ៉ាងពេញទំហឹងទៅលើកិច្ចសន្ទនារបស់មេដឹកនាំទាំងពីរដើម្បីរក្សាសន្តិភាព និងសន្តិសុខនៅឧបទ្វីបកូរ៉េ។ នេះបើយោងតាមការចុះផ្សាយរបស់សារព័ត៌មាន Vietnam News។
ការលើកឡើងរបស់លោកស្រីអ្នកនាំពាក្យរូបនេះ បន្ទាប់ពីការចោទសួរពីអ្នកសារព័ត៌មាននាឱកាសនៃសន្និសីទសារព័ត៌មានប្រចាំថ្ងៃ ថាតើវៀតណាម យល់បែបណាដែរចំពោះផែនការនៃជំនួបមេដឹកនាំកំពូលរបស់កូរ៉េខាងជើង និងអាមេរិក នាពេលខាងមុខដ៏ខ្លីនេះ។
តាមប្រភពព័ត៌មានដដែលនោះ លោកស្រីអ្នកនាំពាក្យ មិនបាននិយាយច្រើនជុំវិញជំនួបនេះឡើយ។ សូម្បីតែទីតាំងជាក់លាក់នៅក្នុងប្រទេស ដែលត្រូវរៀបចំជំនួប ក៏លោកស្រី មិនបានបញ្ជាក់ផងដែរ ក៏ប៉ុន្តែអ្នកការបរទេសរូបនេះ បានសង្កត់ធ្ងន់ថា៖«វៀតណាម នឹងចូលរួមយ៉ាងសកម្មបំផុត និងត្រៀមខ្លួនធ្វើសហប្រតិបត្តិការជាមួយភាគីពាក់ព័ន្ធដើម្បីធានាពីភាពជោគជ័យនៃជំនួបកំពូលនេះ»។
តាមពិតទៅនៅសប្តាហ៍មុនអ្នកនាំពាក្យរូបនេះ បានអះអាងថា វៀតណាម នៅមិនទាន់ទទួលបានការជូនដំណឹងពីការចង់ជួបគ្នារវាងមេដឹកនាំទាំងពីរនៅក្នុងទឹកដីវៀតណាមនោះទេ។ ក៏ប៉ុន្តែនៅពេលនោះ អ្នកនាំពាក្យ ក៏បានបញ្ជាក់ពីលក្ខណៈពិសេស និងបទពិសោធន៍ជោគជ័យក្នុងការរៀបចំកិច្ចប្រជុំលំដាប់ពិភពលោក ដែលមិនធ្វើឲ្យវៀតណាម មិនមានការព្រួយបារម្ភអ្វីឡើយក្នុងការធ្វើជាម្ចាស់ផ្ទះ និងអ្នកសម្របសម្រួល។
គួរជម្រាបផងដែរ នៅថ្ងៃ៥ កុម្ភៈ ប្រធានាធិបតីអាមេរិក លោក ដូណាល់ ត្រាំ បានប្រកាសជាថា ជំនួបលើកទីពីរជាមួយមេដឹកនាំកូរ៉េខាងជើង គីម ជុងអ៊ុន នឹងធ្វើឡើងពីថ្ងៃទី២៧ ដល់ទី២៨ ខែកុម្ភៈ នៅទឹកដីវៀតណាម។ ប្រមុខដឹកនាំកំពូលទាំងពីរ នឹងចរចាគ្នាលើបញ្ហានៃការរំសាយអាវុធនុយក្លេអ៊ែរ ដែលនៅមិនទាន់ ដោះស្រាយដាច់ស្រេចនឹងគ្នានៅឡើយ៕
© រក្សាសិទ្ធិដោយ thmeythmey.com