ជាតិ
អាជ្ញាធរនឹងសង់អាងស្ដុកទឹកក្រោមដី,ស្ថានីយបូមទឹក និងជីកប្រព័ន្ធលូ ដើម្បីបញ្ចៀសជំនន់ទឹកភ្លៀងក្នុងទីក្រុង រូបភាពពីរដ្ឋបាលរាជធានីភ្នំពេញ
× ភ្នំពេញ៖ សាលារាជធានីភ្នំពេញ នឹងសាងសង់អាងស្ដុកទឹកក្រោមដី,ស្ថានីយបូមទឹក និងជីកប្រព័ន្ធលូ ដើម្បីពង្វាងទឹកកខ្វក់ចេញពីទន្លេបាសាក់តូច ទៅស្ថានីយប្រព្រឹត្តកម្មទឹកកខ្វក់បឹងជើងឯក។ ហេដ្ឋារចនាសម្ព័ន្ធទាំងនេះ នឹងធ្វើឲ្យប្រព័ន្ធរំដោះទឹក និងប្រឡាយលូក្នុងរាជធានីភ្នំពេញ កាន់តែប្រសើរ ជាពិសេសកាត់បន្ថយជំនន់ទឹកភ្លៀង។ នេះបើតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី ៨ ខែកុម្ភៈ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានប្រាប់សារព័ត៌មានថ្មីៗតាមទូរសព្ទថា គម្រោងនេះ នឹងចូលរួមចំណែកដល់ការរំដោះទឹកក្នុងរាជធានីភ្នំពេញ និងជៀសវាងការជន់លិច ដោយចាប់ផ្ដើមអនុវត្តក្នុងខែកុម្ភៈនេះ ហើយគ្រោងបញ្ចប់ នៅខែវិច្ឆិកា ឆ្នាំ២០២០ ។ បើតាមលោក ម៉េត មាសភក្ដី គម្រោងនេះ នឹងជីកដាក់បណ្ដាញលូមេពង្វាងទឹកកខ្វក់ ចេញពីទន្លេបាសាក់តូច តាមបណ្ដោយវិថីសប៊ិត មហាវិថីសម្ដេចសុធារស និងកំណាត់មហាវិថីម៉ៅសេទុង ក្នុងសង្កាត់ទន្លេបាសាក់។
ក្នុងគម្រោងដដែល សាលារាជធានីភ្នំពេញ នឹងសាងសង់អាងស្ដុកទឹកក្រោមដីចំនួន ២ទីតាំង ដោយទីតាំងទី១ ជាអាងស្ដុកទឹកដែលមានចំណុះប្រមាណ ៣០០០ម៉ែត្រគូប និងស្ថានីយបូមទឹក នៅសួនច្បារស្ពាននាគភ្លោះ។ ចំណែកទីតាំងទី២ សាងសង់អាងស្ដុកទឹកដែលមានចំណុះ ១០០ម៉ែត្រ និងបំពាក់ម៉ូទ័រស្វ័យប្រវត្តិ នៅជ្រុងរបងស្ថានទូតរុស្ស៊ី។
លោក ម៉េត មាសភក្ដី បញ្ជាក់ថា ថវិកាសម្រាប់អនុវត្តគម្រោងសាងសង់នេះ ជាថវិការបស់សាលារាជធានីភ្នំពេញ។ សាលារាជធានីភ្នំពេញ នឹងបើកការដ្ឋានជីកសាកល្បងរកមើលបណ្ដាញក្រោមដីនៅចំណុចមួយចំនួន នាគន្លងវិថីសប៊ិត មហាវិថីសម្ដេចសុធារស និងកំណាត់មហាវិថីម៉ៅសេទុង៕
Tag:
សាលារាជធានីភ្នំពេញ
បឹងជើងឯក
អាងស្ដុកទឹក
© រក្សាសិទ្ធិដោយ thmeythmey.com