អូស្ត្រាលីទិញនាវាមុជទឹក ១២គ្រឿងពីបារាំងដើម្បីពង្រឹងឥទ្ធិពលក្នុងដែនមហាសមុទ្រប៉ាស៊ីហ្វិក

អន្តរជាតិ

អូស្ត្រាលីទិញនាវាមុជទឹក ១២គ្រឿងពីបារាំងដើម្បីពង្រឹងឥទ្ធិពលក្នុងដែនមហាសមុទ្រប៉ាស៊ីហ្វិក

11, Feb 2019 , 11:14 am

រូបភាព

នាវាមុជទឹកដែលក្រុមហ៊ុនបារាំង Naval Group ផលិតឲ្យអូស្ត្រាលី។ (រូបភាព Naval Group)

ដោយ: តន ចាន់រិទ្ធារ៉ា

អូស្ត្រាលី នៅថ្ងៃទី១១ ខែកុម្ភៈ បានចុះកិច្ចព្រមព្រៀងលើវិស័យការពារជាតិជាមួយបារាំងដើម្បីផលិតនាវាមុជទឹកចំនួន១២គ្រឿង។ កិច្ចព្រមព្រៀងដែលមានទំហំទឹកប្រាក់៥០ពាន់លានដុល្លារនេះ គឺជាការចំណាយទ្រង់ទ្រាយធំលើកដំបូងបំផុតរបស់អូស្ត្រាលីក្នុងការពង្រឹងវិស័យយោធារបស់ខ្លួនក្នុងរយៈពេលប៉ុន្មានទសវត្សរ៍មកនេះ។ វាបង្ហាញពីជំហរអូស្ត្រាលីក្នុងការសម្ញែងឥទ្ធិពលក្នុងតំបន់ដែលកំពុងតែស្ថិតក្នុងការប្រជែងគ្នារវាងចិន និងអាមេរិក។

បន្ទាប់ពីពន្យារពេលអស់ពីរឆ្នាំ ហើយចោមរោមដោយប្រតិកម្មជាច្រើន អូស្ត្រាលី និងបារាំងបានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ ដែលអូស្ត្រាលីនឹងចំណាយលុយដល់ទៅ៥០ពាន់លានដុល្លារដើម្បីទទួលបាននាវាមុជទឹកចំនួន១២គ្រឿង។ នេះជាកិច្ចព្រមព្រៀងក្នុងវិស័យការពារជាតិដ៏ធំមួយលើពិភពលោក ខណៈអូស្ត្រាលីកំពុងព្យាយាមពង្រឹងឥទ្ធិពលរបស់ខ្លួនឲ្យខ្លាំងនៅតំបន់មហាសមុទ្រប៉ាស៊ីហ្វិក។

ក្រុងកង់់បេរ៉ា បានជ្រើសរើសយកក្រុមហ៊ុនបារាំង Naval Group ដើម្បីសាងសង់នាវាមុជទឹកស៊េរីថ្មីទាំង១២គ្រឿងនេះកាលពីការដេញថ្លៃក្នុងឆ្នាំ២០១៦ ដោយបដិសេធការដេញថ្លៃរបស់ក្រុមហ៊ុនជប៉ុន និងអាល្លឺម៉ង់ជាដើម។ នាយករដ្ឋមន្ត្រីអូស្ត្រាលី ស្កុត ម៉ូរីសុន បានសាទរគម្រោងដ៏មហិមាមួយនេះ ព្រោះវាជាគម្រោងទិញសព្វាវុធធំជាងគេរបស់អូស្ត្រាលីក្នុងសម័យកាលសន្តិភាពបែបនេះ។ សម្រាប់ក្រុមហ៊ុនបារាំង នេះក៏ជាកិច្ចព្រមព្រៀងលក់ដ៏ធំដែរ។

បើតាមកិច្ចព្រមព្រៀងនេះ នាវាមុជទឹកដំបូងនឹងត្រូវប្រគល់ឲ្យអូស្ត្រាលីនៅរង្វង់ឆ្នាំ២០៣០ ហើយនាវាចុងក្រោយនៅឆ្នាំ២០៥០ ។ នាវាទាំង១២គ្រឿងនេះ គឺជាសាច់ដុំសំខាន់របស់អូស្ត្រាលីក្នុងការផែនការពង្រឹកសមត្ថភាពយោធាដើម្បីការផលប្រយោជន៍យុទ្ធសាស្ត្រ និងពាណិជ្ជកម្មក្នុងតំបន់អាស៊ីប៉ាស៊ីហ្វិក ដែលចិន និងអាមេរិកកំពុងព្យាយាមដណ្ដើមឥទ្ធិពលដែរនោះ។

យ៉ាងណាមិញ មានមតិខ្លះរិះគន់ចំណាត់ការរបស់អូស្ត្រាលី និងអះអាងថា ផែនការបង្កើនសមត្ថភាពយោធានេះហាក់ហួសពេលទៅហើយ។ នេះក៏ព្រោះតែដែនទឹកមហាសមុទ្រប៉ាស៊ីហ្វិក កំពុងស្ថិតក្នុងការប្រទាញប្រទង់ក្ដៅគគុករបស់រវាងក្រុងប៉េកាំង ក្រុងវ៉ាស៊ីនតោន និងមហាអំណាចតំបន់ផ្សេងទៀត ដែលចង់ពង្រីកឥទ្ធិពលរបស់ពួកគេទៅលើប្រទេសតូចៗ។ ក្រុងប៉េកាំងហាក់បង្កើនបានច្រើនជាងគេក្នុងចំណោមរដ្ឋក្រីក្រនៃមហាសមុទ្រប៉ាស៊ីហ្វិកតាមរយៈការជះលុយសន្ធឹសន្ធាប់។

ទោះជាយ៉ាងណា ជាមួយនឹងវត្តមាននាវាមុជទាំង១២គ្រឿងនេះ អូស្ត្រាលីពិតជាអាចធ្វើឲ្យប្រទេសផ្សេងញញើតខ្លះ និងអាចរក្សាផលប្រយោជន៍បានដែរ។ រដ្ឋមន្ត្រីការពារជាតិបារាំង Florence Parly ដែលជាអ្នកចុះហត្ថលេខាតំណាងឲ្យក្រុងប៉ារីសនិយាយថា កិច្ចព្រមព្រៀងនេះជាការជឿទុកចិត្តគ្នាទៅមករវាងបារាំង និងអូស្ត្រាលី៕