អន្តរជាតិ
លោក ប៉ុមប៉េអូ ធ្វើទស្សនកិច្ចបីប្រទេសនៅអឺរ៉ុបកណ្ដាលដើម្បីពង្រឹងឥទ្ធិពលអាមេរិកឡើងវិញ
× ប្រមុខការទូតអាមេរិក ម៉ៃ ប៉ុមប៉េអូ នឹងធ្វើទស្សនកិច្ចមួយជុំនៅប្រទេសនៅអឺរ៉ុបកណ្ដាល ជាទីដែលអាមេរិកបានមើលរំលងអស់ពេលជាច្រើនឆ្នាំ។ ការមិនអើពើកិច្ចការនៅតំបន់នេះ ក្លាយជាឱកាសសម្រាប់ចិន និងរុស្ស៊ីក្នុងការបង្កើនឥទ្ធិពលរបស់ពួកគេតាមរយៈការធ្វើជំនួញទ្វេភាគី។ យ៉ាងណាក្ដី មន្ត្រីក្រសួងការបរទេសអាមេរិកអះអាងថា ដំណើរទស្សនកិច្ចរបស់លោក ប៉ុមប៉េអូ ជាសញ្ញាបង្ហាញពីការងាកទៅពង្រឹងទំនាក់ទំនងឡើងវិញ។
នៅថ្ងៃទី១១ ខែកុម្ភៈ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នឹងផ្ដើមទស្សនកិច្ចនៅរដ្ឋធានីប៊ុយដាប៉ែស ប្រទេសហុងគ្រី ដែលជាផ្នែកមួយនៃដំណើរទស្សនកិច្ចបីប្រទេសនៅតំបន់អឺរ៉ុបកណ្ដាល។ លោកស្រី ហ៊ីឡារី គ្លីនតុន ជារដ្ឋមន្ត្រីការបរទេសអាមេរិកចុងក្រោយដែលជាន់ទឹកដីប្រទេសនេះកាលពីឆ្នាំ២០១១ ។ ចេញពីហុងគ្រី លោក ប៉ុមប៉េអូ នឹងបន្តដំណើរទៅកាន់ទឹកដីស្លូវ៉ាគីនៅថ្ងៃទី១២ ដែលធ្វើឲ្យក្លាយជាមន្ត្រីជាន់ខ្ពសអាមេរិកដំបូងធ្វើទស្សនកិច្ចនៅប្រទេសនេះក្នុងរយៈណេល២០ឆ្នាំ។
នៅថ្ងៃទី១៣ ខែកុម្ភៈ លោក ប៉ុមប៉េអូ នឹងធ្វើដំណើរទៅកាន់ប៉ូឡូញដែលជាគោលដៅចុងក្រោយ។ នៅប៉ូឡូញ ប្រមុខការទូតអាមេរិកនឹងចូលរួមក្នុងជំនួបស្ដីពីមជ្ឈិមបូព៌ា ហើយគេរំពឹងថា អាមេរិកនឹងប្រមូលកម្លាំងសម្ព័ន្ធមិត្តរបស់ខ្លួនដើម្បីប្រឆាំងអ៊ីរ៉ង់។ នេះបើតាមការប្រកាសរបស់ក្រសួងការបរទេសអាមេរិក។
ច្បាស់ណាស់ ដំណើរទស្សនកិច្ចរបស់ប្រមុខការទូតអាមេរិកលើកនេះ មានគោលដៅពង្រឹងឥទ្ធិពលអាមេរិកក្នុងតំបន់នេះឲ្យកាន់តែរឹងមាំឡើងវិញ។ មន្ត្រីរដ្ឋបាលក្រុងវ៉ាស៊ីនតោនម្នាក់និយាយថា ទស្សនកិច្ចលោក ប៉ុមប៉េអូ វាហាក់ដូចជាហួសពេល ប៉ុន្តែជារឿងចាំបាច់។ បានន័យថា ការត្រឡប់ទៅរឹតចំណងការទូតនេះ មានគោលដៅប្រកួតប្រជែងដោយវិជ្ជមាន និងបង្ហាញពីការផ្ដល់ការគាំទ្ររបស់អាមេរិកដដើម្បីក្លាយជាជម្រើសថ្មីបន្ថែមលើចិន និងរុស្ស៊ី។
អាមេរិក ពិតជាបារម្ភចំពោះការកើនឡើងឆាបរ់ហ័សនៃឥទ្ធិពលគូប្រជែងរបស់ខ្លួនក្នុងតំបន់នេះ។ ក្រុងវ៉ាស៊ីនតោន និងសម្ព័ន្ធមិត្តរបស់ខ្លួនបារម្ភចំពោះការរកស៊ីរបស់ក្រុមបច្ចេកវិទ្យាធំជាងគេរបស់ចិននៅអឺរ៉ុបកណ្ដាល និងចោទថា សម្ភារៈរបស់ក្រុមហ៊ុនចិនអាចត្រូវបានប្រើប្រាស់ក្នុងការលួចព័ត៌មានសម្ងាត់ទៀតផង។ ទោះជាមានការបដិសេធក្ដី ក្រុមប្រទេសលោកខាងលិចកំពុងរកផ្លូវទប់ស្កាត់ការពង្រឹកខ្លួនរបស់ចិនតាមរយៈបច្ចេកវិទ្យានេះ។
អំឡុងដំណើរទស្សនកិច្ចនេះ រដ្ឋមន្ត្រីការបរទេសអាមេរិកក៏នឹងប្រាប់ឲ្យរដ្ឋអាមេរិកកណ្ដាលប្រយ័ត្ននឹងរុស្ស៊ី ពិសេសជំនួញក្នុងវិស័យឋាមពលតែម្ដង។ នៅប៊ុយដាប៉ែស លោក ប៉ុមប៉េអូ នឹងប្រាប់ហុងគ្រីមិនឲ្យគាំទ្រគម្រោងបំពងបង្ហូរឧស្ម័ន Turkstream ដែលជាគម្រោងរបស់រុស្ស៊ីក្នុងការបង្កើតបណ្ដាញដឹកជញ្ជូនឧស្ម័នទៅកាន់អឺរ៉ុប ដោយមិនឆ្លងកាត់អ៊ុយក្រែន៕
Tag:
អាមេរិក
អឺរ៉ុបកណ្ដាល
ចិន
រុស្ស៊ី
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com