មហាធៀ ចង់ឲ្យមន្ត្រីស្មោះត្រង់ចំពោះប្រទេសជាតិច្រើនជាងមេដឹកនាំ ឬបក្ស

អន្តរជាតិ

មហាធៀ ចង់ឲ្យមន្ត្រីស្មោះត្រង់ចំពោះប្រទេសជាតិច្រើនជាងមេដឹកនាំ ឬបក្ស

11, Feb 2019 , 11:59 pm

រូបភាព

ដោយ:

ទោះបីក្នុងប្រព័ន្ធប្រជាធិបតេយ្យ មន្ត្រីមានសិទ្ធិគាំទ្រមេដឹកនាំ ឬបក្ស ដែលខ្លួនចង់ឲ្យដឹកនាំរដ្ឋាភិបាលក្តី នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានប្រាប់ឲ្យពួកគេមានស្មោះត្រង់ចំពោះប្រទេសជាតិច្រើនជាងអ្វីៗទាំងអស់។

ថ្លែងនៅចំពោះមុខមន្ត្រីចំនួន ៣០០ នាក់នៅក្នុងពិធីជួបជុំប្រចាំខែមួយ លោកនាយករដ្ឋមន្ត្រី មហាធៀ មហាម៉ាត់ នៅថ្ងៃទី១១ ខែកុម្ភៈ បានគូសបញ្ជាក់ថា៖«ប្រសិនបើមេដឹកនាំ ឬគណបក្សបាននាំយកសមិទ្ធិផលយ៉ាងធំធេងដល់ប្រទេសជាតិ អ្នកទាំងអស់គ្នាត្រូវតែមានភាពស្មោះត្រង់ចំពោះមេដឹកនាំនោះ។ ក៏ប៉ុន្តែ ប្រសិនបើមេដឹកនាំឬគណបក្សប្រព្រឹត្តខុសនឹងកាតព្វកិច្ចរបស់ពួកគេ យើងត្រូវបង្វែរភាពស្មោះត្រង់ចំពោះប្រទេសជាតិវិញ»។ នេះបើតាមការចុះផ្សាយរបស់សារព័ត៌មានក្នុងស្រុកម៉ាឡេស៊ី Malay mail ។

ទន្ទឹមនឹងនេះ លោក មហាធៀ ក៏បានទទូចឲ្យមន្ត្រីរាជការទាំងអស់កុំងប់ងល់ ជាមួយមេដឹកនាំឬគណបក្សដែលពួកគេធ្លាប់ស្មោះត្រង់អស់រយៈពេលជាង ៦០ ឆ្នាំហើយនោះ។ ត្រង់នេះលោកចង់សំដៅទៅសម្ព័ន្ធភាព Barisan Nasional របស់អតីតនាយករដ្ឋមន្ត្រី ណាជីប រ៉ាហ្សាក់ ដែលបានចាញ់ឆ្នោតកាលពីឆ្នាំមុន។

បើតាមសារព័ត៌មានដដែល លោកនាយករដ្ឋមន្ត្រី មហាធៀ បានពន្យល់ថា ម៉ាឡេស៊ីបានជ្រើសយកប្រព័ន្ធប្រជាធិបតេយ្យ ដែលផ្តល់ឱកាសសម្រាប់មនុស្សគ្រប់គ្នាអាចក្លាយជាមេដឹកនាំប្រទេសបាន។ មន្ត្រីរាជការមានសិទ្ធិក្នុងការគាំទ្រគណបក្សនយោបាយណាដែលពួកគេចង់ឲ្យដឹកនាំរដ្ឋាភិបាល ប៉ុន្តែភាពស្មោះត្រង់របស់ពួកគេគួរតែមានចំពោះប្រទេសជាតិធំជាងអ្វីៗទាំងអស់។

សូមបញ្ជាក់ថា ការលើកឡើងរបស់នាយករដ្ឋមន្ត្រីម៉ាឡេស៊ីរូបនេះ គឺធ្វើឡើងក្រោយពីរដ្ឋាភិបាលសម្ព័ន្ធភាព Pakatan Harapan របស់លោក កាលពីថ្មីៗនេះ បានត្អូញត្អែរពីភាពអសកម្មរបស់មន្ត្រីម៉ាឡេស៊ីមួយចំនួន ដែលនៅតែមានភាពស្មោះត្រង់ចំពោះសម្ព័ន្ធភាព Barisan Nasional របស់លោកណាជីប ដែលធ្លាប់បានដឹកនាំម៉ាឡេស៊ីអស់រយៈពេលជាង៦ទសវត្សរ៍ហើយនោះ៕