វីរបុរសបិសាចក្រហម Paul Scholes ក្លាយជាគ្រូបង្វឹកក្លិប Oldham Athletic

កីឡាអន្តរជាតិ

អន្តរជាតិ

វីរបុរសបិសាចក្រហម Paul Scholes ក្លាយជាគ្រូបង្វឹកក្លិប Oldham Athletic

12, Feb 2019 , 10:12 am

រូបភាព

ដោយ: ទេព ពិទូរ្យ

Paul Scholes វីរបុរស Manchester United ត្រូវបានតែងតាំងជាអ្នកចាត់ការទូទៅក្រុម Oldham Athletic ដែលស្ថិតក្នុងក្របខណ្ឌ League Two នៃលីគបាល់ទាត់លំដាប់ទី៤អង់គ្លេស។ Scholes ថានេះជាពេលវេលាដ៏ស័ក្កសមសម្រាប់ជំហានដំបូងរបស់ខ្លួនក្នុងនាមជាអ្នកដឹកនាំក្រុមបាល់ទាត់អាជីព។

អតីតខ្សែបម្រើឆ្នើមបិសាចក្រហម និងជម្រើសជាតិអង់គ្លេសវ័យ ៤៤ ឆ្នាំរូបនេះ បានយល់ព្រមចុះកិច្ចសន្យារយៈពេល១៨ខែជាមួយ Oldham បើទោះខ្លួនមានភាគហ៊ុន១០ភាគរយក្នុងក្លិប Salford City ដែលស្ថិតក្នុងលីគលំដាប់ទី៥ក៏ដោយ។

Paul Scholes កំពុងហ្វឹកហាត់កូនក្រុម Oldham ក្រោយប្រកាសជាអ្នកចាត់ការរួចរាល់។ រូបភាពពីវេបសាយក្លិប Oldham

«ខ្ញុំមិនមកកាន់ទីនេះទេប្រសិនបើខ្ញុំមិនមានអារម្មណ៍រំភើបនោះ។ ខ្ញុំបានត្រៀមខ្លួនយ៉ាងល្អសម្រាប់តំណែងនេះ ហើយខ្ញុំបានមើលការលេងរបស់ក្រុមរួចហើយ ខ្ញុំគិតថាពួកគេមានសមត្ថភាពក្នុងការឈ្នះការប្រកួតជាច្រើន តែបើពួកគេធ្វើមិនបាន វាជាកំហុសរបស់ខ្ញុំ»។ Scholes និយាយដូច្នេះ។

Scholes ដែលនឹងត្រូវដឹកនាំក្រុមលើកដំបូង នឹងយកអតីតគ្រូបង្វឹករបស់ក្រុម Latics លោក Mike Priest ជាជំនួយការ។ Oldham Athletic បច្ចុប្បន្នស្ថិតនៅចំណាត់ថ្នាក់ទី១៤ ក្នុងតារាង មាន៤២ពិន្ទុក្រោយឆ្លងកាត់ការប្រកួត៣០លើក ដោយមានគម្លាត ៩ ពិន្ទុពីតំបន់ត្រូវលេង Play-off ដើម្បីឈានទៅ League One ខណៈការប្រកួតសល់១៦លើកទៀត៕