សម្ដេច ហ៊ុន សែន៖ កម្ពុជាមិនអាចពឹងជំនួយបរទេសតែមួយមុខ ហើយក៏មិនយកឯករាជ្យទៅដោះដូរអ្វីមួយឡើយ

ជាតិ

សម្ដេច ហ៊ុន សែន៖ កម្ពុជាមិនអាចពឹងជំនួយបរទេសតែមួយមុខ ហើយក៏មិនយកឯករាជ្យទៅដោះដូរអ្វីមួយឡើយ

12, Feb 2019 , 10:18 am

រូបភាព

ដោយ: ថ្មីៗ

ភ្នំពេញ៖ កម្ពុជាមិនអាចពឹងជំនួយបរទេសតែមួយមុខ ហើយក៏មិនយកឯករាជ្យទៅដោះដូរជាថ្នូរអ្វីមួយឡើយ។ នេះជាការប្រកាសជំហរជាថ្មីរបស់ប្រមុខរដ្ឋាភិបាល ដែលលើកឡើងស្របពេលដែលសហភាពអឺរ៉ុប កំពុងពិភាក្សាពីដំណើការព្យួរប្រព័ន្ធអនុគ្រោះពន្ធកម្ពុជា (Everything But Arms)។

ខណៈដែលស្ថានភាពអនុគ្រោះពន្ធកម្ពុជា កំពុងស្ថិតនៅក្នុងការពិភាក្សារបស់គណៈកម្មការអឺរ៉ុបនោះ សម្ដេចនាយករដ្ឋមន្ត្រី ហ៊ុន សែន ក៏បានសរសេរលើហ្វេសប៊ុកខ្លួន ដោយនិយាយអះអាងថា ស្ថានភាពនយោបាយ សង្គម និងសេដ្ឋកិច្ច នៅក្នុងប្រទេសជាតិសព្វថ្ងៃ គឺកំពុងឆ្ពោះទៅរកភាពកាន់តែល្អប្រសើរ ស្របពេលចំណូលពន្ឋរដ្ឋ បានកើនឡើងជាបន្តបន្ទាប់ ។

ចំណុចទាំងនេះហើយ ដែលសម្ដេច ហ៊ុន សែន ចាត់ទុកថា វាជាការរីកលូតលាស់ និងកាន់តែរឹងមាំរបស់កម្ពុជា ក្នុងដំណើរការអភិវឌ្ឍប្រទេស បើធៀបទៅនឹងសេដ្ឋកិច្ចកម្ពុជា ដែលហ៊ុំព័ទ្ឋដោយទារុណកម្ម និងការកៀបសង្កត់ ក្រោយសម័យសង្គ្រាមអំឡុងទសវត្សរ៍៨០។

តាមរយៈទស្សនវិជ្ជមានបែបនេះ ប្រមុខរដ្ឋាភិបាលកម្ពុជា ក៏បានប្រកាសជំហរជាថ្មីថា កម្ពុជាមិនយកអធិបតេយ្យភាព ទៅដោះដូរជាថ្នូរអ្វីមួយឡើយ ហើយក៏មិនឲ្យប្រទេសណាលូកដៃជ្រៀតជ្រែកចូលកិច្ចការផ្ទៃក្នុងប្រទេសកម្ពុជាដែរ។ «កម្ពុជាមិនអាចរំពឹងលើជំនួយបរទេសតែមួយមុខទេ ហើយកម្ពុជាក៏មិនត្រូវយកឯករាជភាព និងអធិបតេយ្យភាពរបស់ខ្លួនទៅដោះដូរជាថ្នូរនឹងអ្វីមួយនោះដែរ។ ប៉ុន្តែយើងចង់ធ្វើជាមិត្តល្អជាមួយបណ្តាប្រទេសដៃគូនានាដែលចង់ឃើញកម្ពុជាកាន់តែរីកចម្រើនទៅមុខពិតប្រាកដដោយគ្មានការជ្រៀតជ្រែកកិច្ចការផ្ទៃក្នុងប្រទេសជាតិ»។ នេះជាការបញ្ជាក់របស់នាយករដ្ឋមន្ត្រី ហ៊ុន សែន នៅលើហ្វេសប៊ុក។

អមជាមួយការប្ដេជ្ញាចិត្តនេះ សម្ដេច ហ៊ុន សែន បានសង្កត់ធ្ងន់ថា កម្ពុជាកំពុងរួចផុតពីបន្ទាត់ក្រីក្រជាដំណាក់កាល ខណៈដែលកំណើនសេដ្ឋកិច្ចបច្ចុប្បន្ន ស្ថិតនៅក្នុងរង្វង់៧ភាគរយ។

ចំណែកចំណូលពន្ឋកាន់តែខ្ពស់នោះ ជាចំណុចសម្ដេច ហ៊ុន សែន បានព្យាករណ៍ទៅថ្ងៃអនាគតថា កម្ពុជានឹងក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងប្រាក់ចំណូលខ្ពស់នៅឆ្នាំ ២០៥០។ សម្រាប់សម្ដេច ហ៊ុន សែន ភាពរីកចម្រើនទាំងនេះ បានមកដោយសារការចូលរួមរបស់វិស័យឯកជនទាំងអស់នៅកម្ពុជា ដែលបានរួមចំណែកអភិវឌ្ឍន៍ប្រទេស នឹងពង្រឹងសេដ្ឋកិច្ចជាតិអោយបានរឹងមាំមកទល់សព្វថ្ងៃ។

អត្ថបទទាក់ទង

EU បើកកិច្ចពិភាក្សាដែលអាចឈានដល់ព្យួរប្រ័ពន្ធអនុគ្រោះពន្ធ (EBA) ពីកម្ពុជា

កាលពីថ្ងៃទី១១ កុម្ភៈ គណៈកម្មាធិការអឺរ៉ុប បានបើកកិច្ចប្រជុំពិភាក្សាពីដំណើរការនៃព្យួរប្រព័ន្ធអនុគ្រោះពន្ធកម្ពុជា។ សេចក្តីប្រកាសព័ត៌មាន បានបញ្ជាក់យ៉ាងដូច្នេះថា៖«ប្រព័ន្ធអនុគ្រោះពន្ធ EBA អាចនឹងត្រូវលុបចេញពីប្រទេសណា ដែលបរាជ័យក្នុងការគោរពសិទ្ធិមនុស្សនិងសិទ្ធិនយោជិតកម្មករ»៕