ជាតិ
សេដ្ឋកិច្ច
EBA៖ អាមេរិកក៏មានកង្វល់ដូច EU ដែរ តែថាកម្ពុជានៅមានឱកាសនៅឡើយ
× ស្ថានទូតអាមេរិកប្រចាំកម្ពុជា នៅថ្ងៃទី១២ ខែកុម្ភៈនេះ បានចេញសេចក្តីថ្លែងការណ៍ទាក់ទង ដំណើរការនីតិវិធីរបស់សហភាពអឺរ៉ុប ក្នុងការផ្អាកការអនុគ្រោះពន្ធផ្នែកពាណិជ្ជកម្ម (EBA) សម្រាប់ប្រទេសកម្ពុជា។ អាមេរិកថា រដ្ឋាភិបាលខ្លួនក៏មានកង្វល់ដូចគ្នានឹងសហភាពអឺរ៉ុបដែរ ហើយអំពាវនាវឲ្យថ្នាក់ដឹកនាំកម្ពុជាស្តារឡើងវិញនូវលទ្ធិប្រជាធិបតេយ្យ ពហុបក្សពិតប្រាកដ។
«យើងមានកង្វល់ដូចគ្នានឹងសហភាពអឺរ៉ុបដែរ ទាក់ទងនឹងការរំលោភយ៉ាងធ្ងន់ធ្ងរ លើសេរីភាពក្នុងការបញ្ចេញមតិ សិទ្ធិការងារដែលមានការទទួលស្គាល់ជាអន្តរជាតិ និងសេរីភាពទាក់ទងនឹងអង្គការសមាគម»។ នេះបើតាមការលើកឡើងរបស់ស្ថានទូតអាមេរិក។
ជាមួយគ្នានេះ អាមេរិក បានអំពាវនាវឲ្យមានការទម្លាក់ចោលនូវបទចោទប្រកាន់លើលោក កឹម សុខា និងការចោទប្រកាន់តាមទំនើងចិត្តទាំងអស់ ប្រឆាំងនឹងអ្នកទោសនយោបាយដទៃទៀត ហើយអនុញ្ញាតឲ្យសហជីព អង្គការសារព័ត៌មានឯករាជ្យ និងក្រុមដទៃទៀតនៃសង្គមស៊ីវិល ដំណើរការដោយគ្មានការរឹតត្បិតដែលមិនត្រឹមត្រូវ។
សម្រាប់អាមេរិក ថ្នាក់ដឹកនាំកម្ពុជានៅមានឱកាសនៅឡើយ នៅក្នុងការជៀសផុតពីផលវិបាកអវិជ្ជមានផ្នែកសេដ្ឋកិច្ច នៃការដកការអនុគ្រោះពន្ធ EBA ដោយផ្អែកតាមការលើកឡើងរបស់ស្នងការពាណិជ្ជកម្មសហភាពអឺរ៉ុប លោកស្រី Cecilia Malmström ដែលថាចំណាត់ការ នេះមិនមែនជាការសម្រេចចិត្តចុងក្រោយ ហើយក៏មិនមែនជាទីបញ្ចប់នៃដំណើរនីតិវិធីដែរ៕
© រក្សាសិទ្ធិដោយ thmeythmey.com