អន្តរជាតិ
វៀតណាមស្នើ UN ឲ្យបើកផ្លូវដល់ប្រតិភូជាន់ខ្ពស់កូរ៉េខាងជើងចូលរួមជំនួបកំពូលត្រាំ-គីម នៅហាណូយ
× រដ្ឋាភិបាលវៀតណាមបានស្នើឲ្យគណៈកម្មាធិការអង្គការសហប្រជាជាតិដែលទទួលបន្ទុកពិនិត្យទណ្ឌកម្មអន្តរជាតិប្រឆាំងកូរ៉េខាងជើងបើកផ្លូវឲ្យមន្ត្រីជាន់ខ្ពស់ប្រទេសនេះចូលទឹកដីវៀតណាមបាន។ មន្ត្រីជាន់ខ្ពស់ទាំងនោះរួមបញ្ចូលទាំងអ្នកមានឈ្មោះក្នុងបញ្ជីទណ្ឌកម្មអន្តរជាតិផង។
ការស្នើដកបម្រាមលើការធ្វើដំណើររបស់ប្រតិភូកូរ៉េខាងជើងទាំងអស់នេះ ធ្វើឡើងប៉ុន្មានសប្តាហ៍ប៉ុណ្ណោះមុនពេលក្រុងហាណូយរៀបចំកិច្ចប្រជុំកំពូលរវាងប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន ជាលើកទីពីរ។ នេះបើតាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ដែលស្រង់សម្តីអ្នកការទូតវៀតណាមថ្ងៃអង្គារទី ១២ខែកុម្ភៈ។
«វៀតណាមបានស្នើសុំទៅគណៈកម្មាធិការសម្រាប់ការលើកលែងបម្រាមធ្វើដំណើរដែលស្ថិតក្រោមទណ្ឌកម្មអន្តរជាតិ ដើម្បីឈានទៅរៀបចំកិច្ចប្រជុំកំពូលអាមេរិក កូរ៉េខាងជើងថ្ងៃ ២៧ ដល់ ២៨ ខែកុម្ភៈខាងមុខ។ ការស្នើសុំនេះនឹងត្រូវសម្រេចនៅថ្ងៃ ១៩ ខែកុម្ភៈខាងមុខ»។ នេះជាសម្តីរបស់អ្នកការទូតវៀតណាមដែលមិនបានបញ្ជាក់អត្តសញ្ញាណ។
មន្ត្រីរូបនេះបានបន្ថែមថា បើសិនជាមានការឯកភាព ការអនុញ្ញាតពិសេសឲ្យចូលមកកាន់ទឹកវៀតណាមនេះនឹងផ្តល់ឲ្យដល់រាល់ប្រតិភូកូរ៉េខាងជើងទាំងអស់រួមទាំងមន្ត្រីជាន់ខ្ពស់មួយចំនួនដែលមានឈ្មោះក្នុងបញ្ជីទណ្ឌកម្មអន្តរជាតិផងដែរ។
គួរឲ្យដឹងដែរថា ឆ្នាំ ២០១៨ នៅពេលដែលសិង្ហបុរី រៀបចំកិច្ចប្រជុំប្រវត្តិសាស្ត្ររវាងលោក ត្រាំ និង លោក គីម លើកទីមួយ និងពេលកូរ៉េខាងខាងត្បូងរៀបចំកីឡាអូឡាំពិករដូវរងារ ប្រទេសទាំងទាំងពីរនេះក៏បានស្នើសុំទៅកាន់គណៈកម្មាធិការអង្គការសហប្រជាជាតិនេះដូចគ្នា។
កាលពីថ្ងៃ ៩ខែកុម្ភៈ ប្រធានាធិបតី ត្រាំ បានប្រកាសជាផ្លូវការថា លោកនឹងជួបជាមួយលោក គីម ជុងអ៊ុន ជាថ្មីទៀតនៅរដ្ឋធានីហាណូយប្រទេសវៀតណាមនៅថ្ងៃ ២៧ និង ២៨ ខែកុម្ភៈ។
ការសម្រេចចិត្តជ្រើសរើសយកក្រុងហាណូយនេះធ្វើឡើងបន្ទាប់ពីមានកិច្ចប្រជុំរវាងអ្នកតំណាងពិសេសរបស់អាមេរិកទទួលបន្ទុកកូរ៉េខាងជើង Stephen Biegun ជាមួយតំណាងពិសេសកូរ៉េខាងជើងទទួលបន្ទុកកិច្ចការអាមេរិកលោក Kim Hyok Chol នារដ្ឋធានីព្យុងយ៉ាងផង។
បច្ចុប្បន្ននេះដែរ ឧបនាយករដ្ឋមន្ត្រីវៀតណាមលោក ផាម ប៊ិញមិញ និងជារដ្ឋមន្ត្រីការបរទេស កំពុងបំពេញទស្សនកិច្ចរបស់លោក ផាម ធ្វើឡើងតាមការអញ្ជើញរបស់សមភាគីកូរ៉េខាងជើង រី យ៉ុងហូ ដើម្បីពិភាក្សាគ្នាលើបញ្ហាពិធីការដើម្បីទទួលស្វាគមន៍ប្រតិភូ និងមេដឹកនាំកូរ៉េខាងជើងមកចូលប្រជុំចុងខែកុម្ភៈនេះ៕
Tag:
វៀតណាម
UN
កូរ៉េខាងជើង
ជំនួបត្រាំ-គីម
© រក្សាសិទ្ធិដោយ thmeythmey.com