អន្តរជាតិ
អូស្ត្រាលី បើកមន្ទីរឃុំឃាំងជនអន្តោប្រវេសន៍នៅកោះដាច់ស្រយាលឡើងវិញ នាយករដ្ឋមន្រ្តីអូស្ត្រាលី ស្កុត ម៉ូរីសុន (រូបភាព AFP)
× នាយករដ្ឋមន្ត្រីអូស្ត្រាលី ស្កុត ម៉ូរីសុន នៅថ្ងៃទី១៣ ខែកុម្ភៈ បានប្រកាសបើកមន្ទីរឃុំឃាំងជនអន្តោប្រវេសន៍លើកោះដាច់ស្រយាលឈ្មោះ Christmas ឡើងវិញ។ មន្ទីរឃុំឃាំងនេះ ត្រូវបានបិទកាលពីខែតុលា ឆ្នាំ២០១៨ ក្រោយរងការរិះគន់ខ្លាំងជុំវិញស្ថានភាពអ្នកជាប់ឃុំ។ ការបើកដំណើរការឡើងវិញ ជាការឆ្លើយតបនឹងការអនុម័តច្បាប់របស់សភាដែលបើកផ្លូវឲ្យអ្នកជាប់ឃុំខ្លួននៅកន្លែងឃុំឃាំងពីរផ្សេងទៀតអាចធ្វើដំណើរទៅចូលទឹកដីអូស្ត្រាលីដើម្បីពិនិត្យសុខភាព។
សភាតំណាងរាស្ត្រអូស្ត្រាលី នៅថ្ងៃទី១៣ ខែកមុៈ្ភ បានអនុម័តច្បាប់ចម្រូងចម្រាសមួយដែលបើកផ្លូវឲ្យជនភៀសខ្លួនប្រមាណមួយពាន់នាក់ដែលជាប់ឃុំនៅលើកោះ Nauru និងកោះ Manau អាចស្នើសុំការអនុញ្ញាតចូលទឹកដីអូស្ត្រាលី បើមានសំណើពីវេជ្ជបណ្ឌិតច្រើនជាងពីររូប។ ការអនុវត្តច្បាប់នេះ ត្រូវបានរដ្ឋាភិបាលលោកនាយករដ្ឋមន្ត្រី ស្កុត ម៉ូរីសុន ជំទាស់ខ្លាំង តែមិនអាចធ្វើអ្វីបាន។ ជាការឆ្លើយតប លោក ម៉ូរីសុន ក៏សម្រេចចិត្តបើកមន្ទីរឃុំឃាំងជនភៀសខ្លួននៅលើកោះ Christmas ឡើងវិញ។
ប្រមុខរដ្ឋាភិបាលអូស្ត្រាលីរូបនេះព្រមានហើយថា ការអនុម័តច្បាប់ថ្មី ប្រៀបដូចជាបង្កើនលំហូរជនភៀសខ្លួនចូលទឹកដីអូស្ត្រាលីខុសច្បាប់។ តាមពិតទៅ វាក៏ជារឿងមិនធ្លាប់មានក្នុងរយៈពេលប៉ុន្មានទសវត្សរ៍ចុងក្រោយ រដ្ឋាភិបាលអូស្ត្រាលីបែរជាមិនអាចទប់ស្កាត់ការអនុម័តច្បាប់ក្នុងសភាដែលខ្លួនមានសំឡេងភាគច្រើនទៅវិញ។
មន្ទីរឃុំឃាំងកោះ Christmas ស្ថិតក្នុងមហាសមុទ្រឥណ្ឌាមានចម្ងាយប្រមាណ២,៣០០គីឡូម៉ែត្រពីទីក្រុង Perth និងនៅភាគខាងត្បូងកោះជ្វារបស់ឥណ្ឌូណេស៊ី។ ការបើកដំណើរការកន្លែងឃុំខ្លួនដ៏អសោចន៍នេះឡើងវិញ ជាផ្នែកមួយនៃវិធានការទប់ស្កាត់ការហូរចូលខុសច្បាប់ពីសំណាក់លោកនាយករដ្ឋមន្ត្រី ម៉ូរីសុន ក្រោយការអនុម័តច្បាប់របស់សភា។ លោកក៏ដាក់ចេញវិធានការជាច្រើនទៀត តែមិនបានបញ្ជាក់ឲ្យបានលម្អិតឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
លោកនាយករដ្ឋមន្ត្រី ម៉ូរីសុន បង្ហាញគំនិតសុទិដ្ឋិនិយមថា បើជនភៀសខ្លួនមិនធ្វើដំណើរចូលអូស្ត្រាលី នេះព្រោះតែប្រសិទ្ធភាពនៃវិធានការ១០០ភាគរយរបស់រដ្ឋាភិបាល។ ប៉ុន្តែលោកក៏ឆ្លៀតរិះគន់ច្បាប់ថ្មីដែរថា បើលំហូរជនភៀសខ្លួនខុសច្បាប់នៅតែមាន ពួកគេគួរតែអរគុណបក្សពលករដែលជាបក្សប្រឆាំង និងមេដឹកនាំប្រឆាំង Bill Shorten ។
អូស្ត្រាលី ជាប្រទេសមួយដែលនយោបាយតឹងរ៉ឹងខ្លាំងក្នុងការគ្រប់គ្រងលំហូរជនអន្តោប្រវេសន៍។ ជនភៀសខ្លួនខុសច្បាប់រាប់ពាន់នាក់ ត្រូវបានបញ្ជូនទៅកាន់មន្ទីរឃុំឃាំងនៅលើកោះដាច់ស្រយាលដែលគ្រប់គ្រងដោយរដ្ឋាភិបាលក្រុងកង់បេរ៉ាផ្ទាល់ ឬក៏ទីតាំងដែលជួលពីប្រទេសផ្សេង។ កន្លែងឃុំខ្លួននៅ Manau និងនៅឯ Nauru រងការរិះគន់ខ្លាំងពីអង្គការសហប្រជាជាតិ និងអង្គការសិទ្ធិមនុស្ស ព្រោះតែមានករណីរំលោភសិទ្ធិខ្លាំង៕
Tag:
អូស្ត្រាលី
Scott Morrison
© រក្សាសិទ្ធិដោយ thmeythmey.com