អន្តរជាតិ
កូរ៉េខាងត្បូងបដិសេធសម្ដីលោក ត្រាំ ដែលថា ខ្លួនចេញថ្លៃការពារ៥០០លានដុល្លារទៀត
× វិមានប្រធានាធិបតីកូរ៉េខាងត្បូង នៅថ្ងៃទី១៣ ខែកុម្ភៈ បានទាត់ចោលការអធិប្បាយរបស់ប្រធានាធិបតីអាមេរិក ដូណាល់ ត្រាំ ដែលថា កូរ៉េខាងត្បូងយល់ព្រមបង្កើនការចំណាយសម្រាប់វត្តមានយោធាអាមេរិកចំនួន៥០០លានដុល្លារទៀត។ ការលើកឡើងរបស់លោក ត្រាំ ធ្វើឡើងបន្ទាប់ពីសម្ព័ន្ធមិត្តទាំងពីរចុះកិច្ចព្រមព្រៀងលើការបែងចែកការចំណាយសម្រាប់ការទ្រទ្រង់វត្តមានយោធាអាមេរិកទាំងជិតបីម៉ឺននាក់ក្នុងឆ្នាំ២០១៩ ។
កូរ៉េខាងត្បូង និងអាមេរិក ទើបតែយល់ព្រមលើការបែងចែកវិភាគទានសម្រាប់យោធាអាមេរិកដែលកំពុងពង្រាយនៅទឹកដីកូរ៉េខាងត្បូង។ ក្រោយការចរចាជាច្រើនលើកដែលអមដោយការទាមទាររបស់លោក ដូណាល់ ត្រាំ ផងនោះ កូរ៉េខាងត្បូង ក៏បានយល់ព្រមបង្កើនវិភាគទានរបស់ខ្លួនចំនួន៩២០លានដុល្លារសម្រាប់ការចំណាយក្នុងឆ្នាំ២០១៩ ។
យ៉ាងណាមិញ ប្រធានាធិបតីអាមេរិក នៅតែចង់ឲ្យកូរ៉េខាងត្បូងបង្កើនថវិការបស់ខ្លួនថែមទៀត ដើម្បីសម្រាលអម្រែកហិរញ្ញវត្ថុលើស្មាអាមេរិក។ ក្នុងកិច្ចប្រជុំគណៈរដ្ឋមន្ត្រីថ្ងៃទី១២ ខែកុម្ភៈ លោក ត្រាំ និយាយថា កូរ៉េខាងត្បូងចំណាយលុយ៥០០លានដុល្លារសម្រាប់ការការពារដែលត្រូវចំណាយដល់ទៅ៥ពាន់លានដុល្លារ។ លោកបន្តថា ដោយមានអន្តរាគមន៍របស់រដ្ឋមន្ត្រីការបរទេស ម៉ៃ ប៉ុមប៉េអូ និងទីប្រឹក្សាសន្តិសុខ ចន ប៊ូលតុន កូរ៉េខាងត្បូងក៏សុខចិត្តចេញចំនួន៥០០លានដុល្លារទៀត។
យ៉ាងណាមិញ បើគិតតាមការតួលេខរបស់លោក ត្រាំ ការចំណាយរបស់ក្រុងសេអ៊ូលនៅឆ្នាំ២០១៩ មានលើសពីតួលេខខាងលើដែលបានព្រមព្រៀងគ្នារួចហើយនោះ។ វិមានប្រធានាធិបតីកូរ៉េខាងត្បូងចេញមុខបដិសេធសម្ដីរបស់លោក ត្រាំ ។ លោក Kim Eui-kyeom អ្នកនាំពាក្យវិមាន Cheong Wa Dae ប្រាប់អ្នកសារព័ត៌មានថា ក្នុងការចរចាចុងក្រោយ ភាគីទាំងពីរបានកំណត់ចំនួនរួចហើយសម្រាប់មួយឆ្នាំ ហើយអាចបន្តមួយឆ្នាំបើភាគីទាំងពីរឯកភាពគ្នា។
«ដូច្នេះ កូរ៉េខាងត្បូង និងអាមេរិកអាចសម្រេចចិត្តរក្សាទំហំវិភាគទាននៅកម្រិតដូចសព្វថ្ងៃបន្ទាប់ពីត្រួតពិនិត្យលើលទ្ធភាពបង្កើននោះ។» អ្នកនាំពាក្យខាងលើបញ្ជាក់ដូចនេះ មុននឹងបន្តថា អាមេរិកនឹងមិនគិតថា ចង់ឲ្យកូរ៉េខាងត្បូងបង្កើនអ្វីទៀតឡើយ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
តាមពិតទៅ សម្រាប់វិភាគទានឆ្នាំ២០១៩ នេះ ក្រុងសេអ៊ូលបានបង្កើនការចំណាយរបស់ខ្លួនសម្រាប់ទាហានអាមេរិក២៨៥០០នាក់រួចស្រេចហើយ បើធៀបនឹងឆ្នាំ២០១៨ ដែលមានចំនួន៨៥៣លានដុល្លារ។ ប៉ុន្តែខ្ទង់ចំណាយរបស់សេអ៊ូល នៅមានកម្រិតទាបជាងការទាមទាររបស់វ៉ាស៊ីនតោនដែលចង់ឲ្យបង្កើនឲ្យលើសមួយពាន់លានដុល្លារឯណោះ៕
Tag:
អាមេរិក
កូរ៉េខាងត្បូង
ដូណាល់ ត្រាំ
© រក្សាសិទ្ធិដោយ thmeythmey.com