ត្រាំ ត្រៀមប្រកាស «រដ្ឋក្នុងភាពអាសន្ន» ដើម្បីសង់ជញ្ជាំង ឯបក្សប្រជាធិបតេយ្យចាត់ទុកថា រំលោភអំណាច

អន្តរជាតិ

ត្រាំ ត្រៀមប្រកាស «រដ្ឋក្នុងភាពអាសន្ន» ដើម្បីសង់ជញ្ជាំង ឯបក្សប្រជាធិបតេយ្យចាត់ទុកថា រំលោភអំណាច

15, Feb 2019 , 10:45 am

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតី អាមេរិកលោក ដូណាល់ ត្រាំ ត្រៀមប្រកាសរដ្ឋក្នុងភាពអាសន្នដើម្បីប្រើប្រាស់អំណាចរបស់ខ្លួនបញ្ជាឲ្យមានការសាងសង់ជញ្ជាំងតាមព្រំដែនម៉ិកស៊ិកតាមការសន្យា។ មេដឹកនាំបក្សប្រជាធិបតេយ្យបានព្រមានជាមុនថា ការដាក់រដ្ឋក្នុងភាពអាសន្នជាកំហុសផ្លូវច្បាប់ដ៏ធំមួយដ្បិតភាពអាសន្នមិនមានកើតឡើងនៅព្រំដែនឡើយ ហើយទង្វើរបស់លោក ត្រាំ នឹងជំរុញឲ្យប្រធានាធិបតីដទៃធ្វើបែបនេះដូចគ្នាក្នុងកាលៈទេសៈផ្សេងទៀត។ បក្សប្រជាធិបតេយ្យអាចនឹងចាត់វិធានការផ្លូវច្បាប់ប្រឆាំងនឹងការប្រកាសដាក់រដ្ឋក្នុងភាពអាសន្នដូចគ្នាដែរ។

មេដឹកនាំក្រុមភាគច្រើននៃព្រឹទ្ធសភាតំណាងបក្សសាធារណរដ្ឋលោក Mitch McConnell បានប្រកាសនៅព្រហស្បតិ៍ទី ១៤ ខែកុម្ភៈថា ប្រធានាធិបតី ដូណាល់ ត្រាំ ព្រមចុះហត្ថលេខាលើកិច្ចព្រមព្រៀងរួមដែលផ្តល់កញ្ចប់ថវិកា ១,៣ ពាន់លានដុល្លារសម្រាប់សង់របងព្រំដែន និងកញ្ចប់ថវិកាប្រចាំឆ្នាំសម្រាប់ទីដំណើរការភ្នាក់ងាររដ្ឋាភិបាលដល់ចុងខែកញ្ញា។

វានឹងជួយបញ្ចៀសការបិទរដ្ឋាភិបាលដោយផ្នែកជាថ្មីដែលត្រូវចាប់ផ្តើមសុក្រទី ១៥ ខែកុម្ភៈនេះដែរ ប៉ុន្តែគ្មានថវិកា ៥,៧ពាន់លានដុល្លារសម្រាប់សង់ជញ្ជាំងទេ។

ទីភ្នាក់ងារព័ត៌មាន AFP ផ្សាយថា សមាជិកព្រឹទ្ធសភាខាងលើបន្ថែមថា ប្រធានាធិបតី ត្រាំ ក៏នឹងប្រកាសដាក់រដ្ឋក្នុងភាពអាសន្នដែរដើម្បីត្រួសត្រាយផ្លូវសម្រាប់ការប្រើប្រាស់អំណាចប្រតិបត្តិសាងសង់ជញ្ជាំងព្រំដែនតាមការចង់បានរបស់ខ្លួន។

លោក McConnel ក៏ព្រលយផងដែរថា លោកនិងបណ្តាអ្នកសាធារណរដ្ឋផ្សេងទៀតនឹងគាំទ្រចំណាត់ការរបស់ប្រធានាធិបតី ដ្បិតលោក ត្រាំ កំពុងចាត់វិធានការគ្រប់យ៉ាងដែលខ្លួនអាចធ្វើបានដោយស្របតាមច្បាប់ដើម្បីការពារសន្តិសុខព្រំដែន។

តាមពិតទៅ ក្រោមច្បាប់គ្រាអាសន្នជាតិ ប្រធានាធិបតីអាចប្រកាសដាក់រដ្ឋក្នុងភាពអាសន្នបានក្រោមហេតុផលច្បាស់លាសមួយចំនួន។ ការប្រើប្រាស់វិធានការនេះនឹងអនុញ្ញាតឲ្យសេតវិមានប្រកាសប្រើច្បាប់អាជ្ញាសឹក ព្យួរសិទ្ធិស៊ីវិលរបស់ប្រជាពលរដ្ឋ បង្កើនការប្រើប្រាស់យោធា រឹបអូសទ្រព្យសម្បត្តិ និងរឹតបន្តឹងសកម្មភាពនានារួមទាំងពាណិជ្ជកម្ម និងចរាចរណ៍លុយកាក់ជាដើម។

យ៉ាងណាក៏ដោយ ចំណាត់ការរបស់លោក ត្រាំ នឹងបង្កឲ្យមានរឿងស្មុគស្មាញច្រើន។ ភ្លាមៗក្រោយលោក McConnel ប្រកាសថា លោក ត្រាំ នឹងដាក់រដ្ឋក្នុងភាពអាសន្ន មេដឹកនាំបក្សប្រជាធិបតេយ្យបានទិតៀន និងព្រមានពីផលប៉ះពាល់ដែលមិននឹកស្មានដល់នៅពេលអនាគតដែរ។

«ការប្រកាសភាពអាសន្នជាតិនឹងក្លាយជាទង្វើគ្មានច្បាប់ទម្លាប់ ជាការបំពានអំណាចរបស់ប្រធានាធិបតី និងជាការប៉ុនប៉ងទាញការចាប់អារម្មណ៍បញ្ហាពិតដែលកំពុងកើតឡើងជាពិសេសគឺការបំពានការសន្យារបស់លោក ត្រាំ ក្នុងការទារលុយសង់ជញ្ជាំងពីម៉ិកស៊ិកនោះ»។ នេះជាសេចក្តីថ្លែងការណ៍រួមរវាងលោកស្រី ណាន់ស៊ី ផេឡូស៊ី (Nancy Pelosi) ប្រធានរដ្ឋសភា និង មេដឹកនាំភាគតិចបក្សប្រជាធិបតេយ្យប្រចាំព្រឹទ្ធសភាលោក Chuck Schumer។

ក្រៅពីចាត់ទុកទង្វើលោក ត្រាំ ជារឿងរំលោភអំណាច លោកស្រី ផេឡូស៊ី ថែមទាំងព្រមានប្រើប្រាស់វិធានការច្បាប់ដើម្បីតតាំងនឹងចំណាត់ការលោក ត្រាំ នៅតុលាការ បើសិនជាមានការប្រកាសភាពអាសន្នមែន។

មិនត្រឹមតែប៉ុណ្ណោះលោកស្រី បានគំរាមច្បាស់ៗថា នៅពេលខាងមុខ ប្រធានាធិបតីពីបក្សប្រជាធិបតេយ្យក៏នឹងអាចប្រើអំណាចនីតិប្រតិបត្តិដោយប្រកាសដាក់រដ្ឋក្នុងភាពអាសន្នដើម្បីដោះស្រាយធំៗទាំងបញ្ហាប្រព័ន្ធសុខាភិបាល និងការគ្រប់គ្រងអាវុធជាដើម។ លោកស្រីបន្ថែមថា គោលនយោបាយគ្រប់យ៉ាងនឹងត្រូវសម្រេចដោយសេតវិមាន ដោយមិនចាំបាច់ឆ្លងកាត់តាមសភាដូចរាល់ដងឡើយ ក្នុងករណីដែលលោក ត្រាំ ចាញ់ឆ្នោតឆ្នាំ ២០២០។

ដោយឡែកសមាជិកបក្សសាធារណរដ្ឋមួយចំនួនបានបង្ហាញកង្វល់ចំពោះការប្រើប្រាស់អំណាចនីតិប្រតិបត្តិហួសហេតុរបស់ប្រធានាធិបតីដែរ។ កន្លងមកសមាជិកព្រឹទ្ធសភា Marco Rubio បានថ្លែងថា លោកចង់ឲ្យរាល់សមាជិកសភាឯទៀតគិតគួរហ្មត់ចត់ពីផលប៉ះពាល់រយៈពេលវែង។

«ថ្ងៃស្អែក គ្រោះអាសន្នសម្រាប់សន្តិសុខជាតិប្រហែលអាចជាការប្រែប្រួលអាកាសធាតុ។ ដូច្នេះយើងអាចរឹបអូសរោងចក្រប្រេងជាដើម។ ប្រហែលជាអ្វីដែលខ្ញុំនិយាយជាការបំប៉ោងស្ថានការណ៍បន្តិច ប៉ុន្តែតាមយោបល់ខ្ញុំគឺ យើងត្រូវប្រុងប្រយ័ត្នពេលនិយាយដល់ការគាំទ្រការប្រើប្រាស់អំណាចនីតិប្រតិបត្តិលើសលុបក្នុងប្រទេសយើង»។ លោក Rubio បានបញ្ជាក់ដូច្នេះកាលពីខែមករាកន្លងទៅ៕