ជាតិ
បទយកការណ៍ / បទសម្ភាសន៍
វីដេអូ
២៥ខេត្ត/រាជធានី
Mercedes-Benz នឹងបង្ហាញកំណប់ទេសចរណ៍ដែលគេមិនសូវស្គាល់ និងពង្រីកសក្តានុពលដែលមានស្រាប់ឲ្យកាន់តែរស់រវើក ភ្នំពេញ៖ លោក ឃុន ចាន់ថា នាយកគ្រប់គ្រងផ្នែកលក់ និងទីផ្សារ នៃក្រុមហ៊ុន Star Auto Cambodia ពន្យល់ពីមូលហេតុដែលរៀបចំកម្មវិធី «Mercedes-Benz និង កំណប់អាថ៌កំបាំង» នេះ ក្នុងគោលបំណង ចូលរួមលើកកម្ពស់វិស័យទេសចរណ៍នៅទូទាំងកម្ពុជា ស្វែងរក និងគាស់កកាយតំបន់ទេសចរណ៍ ដែលគេមិនសូវស្គាល់តំបន់ទេសចរណ៍សក្តានុពល និងពង្រីកសក្តានុពលតំបន់ទេសចរណ៍ដែលមានស្រាប់ឲ្យកាន់តែមានសកម្មភាពរស់រវើក។ ប្រជាពលរដ្ឋ ដែលទៅកម្សាន្តនៅបរទេសនឹងងាកមកកម្សាន្តនៅតាមតំបន់សក្តានុពលទេសចរណ៍ក្នុងស្រុកវិញ ហើយប្រជាពលរដ្ឋរស់នៅតាមតំបន់ទេសចរណ៍ទាំងនោះនឹងទទួលបានផលពីកម្មវិធី «Mercedes-Benz និង កំណប់អាថ៌កំបាំង» ។
សូមអញ្ជើញទស្សនាបទសម្ភាសរវាងក្រុមការងារ «Mercedes-Benz និង កំណប់អាថ៌កំបាំង» ជាមួយលោក ឃុន ចាន់ថា នាយកគ្រប់គ្រងផ្នែកលក់ និងទីផ្សារ នៃក្រុមហ៊ុន Star Auto Cambodia ដូចតទៅ៖
សម្រាប់បេសកកម្មលើកទី៤ កម្មវិធី «Mercedes-Benz និង កំណប់អាថ៌កំបាំង» នឹងធ្វើដំណើរឆ្ពោះទៅកាន់សហគមន៍អេកូទេសចរណ៍ជីផាត ដែលស្ថិតក្នុងស្រុកថ្មបាំង ខេត្តកោះកុង នៅថ្ងៃទី១៨-២០ កុម្ភៈខាងមុខនេះ លោក ឃុន ចាន់ថា នាយកគ្រប់គ្រងផ្នែកលក់ និងទីផ្សារ នៃក្រុមហ៊ុន Star Auto Cambodia រៀបរាប់ពីសកម្មភាពនៃបេសកកម្មលើកទី៤នេះ ថា ក្រុមការងារនឹងទៅទស្សនានិងផ្ដល់យកទិដ្ឋភាពទឹកជ្រោះ, សត្វស្លាប, ល្អាងប្រចៀវ, ទឹកធ្លាក់អូរទឹកវេទ, ពាងបុរាណ, ផ្នូរបុរាណ និងកន្លែងទេសចរណ៍ផ្សេងៗទៀតនៃសហគមន៍ជីផាតនេះ។
លោក ឃុន ចាន់ថា ជឿជាក់ថា តាមរយៈការស្វែងរក និងគាស់កកាយកំណប់ទេសចរណ៍នៅទូទាំងកម្ពុជា នេះ សម្រាប់ប្រជាពលរដ្ឋដែលទៅកមន្សាន្តនៅតំបន់ទេសចរណ៍ធម្មជាតិនៅបរទេស នឹងប្តូរមកកម្សាន្តនៅតំបន់ទេសចរណ៍ធម្មជាតិក្នុងស្រុកដែលធ្វើឲ្យពួកគាត់អាចដឹងពីសក្តានុពលទេសចរណ៍ទាំងនោះផងដែរ។ ជាពិសេស ប្រជាពលរដ្ឋរស់នៅតាមតំបន់ទេសចរណ៍ដែលកម្មវិធី «Mercedes-Benz និងកំណប់អាថ៌កំបាំង» បានផ្សព្វផ្សាយ ហើយមានភ្ញៀវទេសចរណ៍ទៅកម្សាន្ត ពួកគាត់នឹងទទួលបានផលទាំងនោះ។
សូមបញ្ជាក់ថា បេសកកម្មលើកទី១, ទី២, ទី៣ និងទី៤នៃកម្មវិធី «Mercedes-Benz និង កំណប់អាថ៌កំបាំង»នេះ ជាបេសកកម្មដែលរៀបចំ និងគាំទ្រដោយក្រុមហ៊ុន Star Auto Cambodia សហការជាមួយសារព័ត៌មានអេឡិចត្រូនិក ThmeyThmey.com និង Fresh News និងគាំទ្រដោយក្រសួងទេចរណ៍។ បេសកកម្មលើកទី១ នៃកម្មវិធី «Mercedes-Benz និងកំណប់អាថ៌កំបាំង» ក្រុមការងារបានធ្វើដំណើរទៅកាន់តំបន់អេកូទេសចរណ៍អូរសោម ក្នុងខេត្តពោធិ៍សាត់, បេសកកម្មលើកទី២ ធ្វើដំណើរឡើងភ្នំឱរ៉ាល់ដែលមានកម្ពស់ ១៨១៣ម៉ែត្រ ស្ថិតនៅខេត្តកំពង់ស្ពឺ និងបេសកកម្មលើកទី៣ ធ្វើដំណើរទៅកាន់សមាគមអភិរក្សដំរីខ្មែរអៃរាវត្តា និងទេសចរណ៍ប្រពៃណី-វប្បធម៌ជនជាតិដើមភាគតិច នៅខេត្តរតនគិរី៕
© រក្សាសិទ្ធិដោយ thmeythmey.com