អន្តរជាតិ
អាមេរិក ទាមទារឲ្យសម្ព័ន្ធមិត្តតំបន់អឺរ៉ុបដកខ្លួនពីកិច្ចព្រមព្រៀងនុយក្លេអ៊ែរជាមួយអុីរ៉ង់ អនុប្រធានាធិបតីអាមេរិក ម៉ៃ ផេន ថ្លែងទៅកាន់យោធាអាមេរិកនៅប៉ូឡូញ (រូបភាព AFP)
× អនុប្រធានាធិបតីអាមេរិក ម៉ៃ ផេន នៅថ្ងៃទី១៤ ខែកុម្ភៈ បានទាមទារឲ្យសម្ព័ន្ធមិត្តនៅអឺរ៉ុបរបស់ខ្លួនឲ្យបោះបង់កិច្ចព្រមព្រៀងនុយក្លេអ៊ែរឆ្នាំ២០១៥ ជាមួយអុីរ៉ង់ ហើយចូលរួមជាមួយអាមេរិកដើម្បីប្រឆាំងមហាអំណាចមជ្ឈិមបូព៌ាមួយនេះ។ អឺរ៉ុប ដែលមិនពេញចិត្តការដើរចេញរបស់អាមេរិកពីកិច្ចព្រមព្រៀងនេះ នៅតែប្រឹងរកផ្លូវរកស៊ីជាមួយអុីរ៉ង់ដដែល ដោយមិនខ្វល់ទណ្ឌកម្មរបស់វ៉ាស៊ីនតោនឡើយ។
ពីកិច្ចប្រជុំអន្តរជាតិប្រឆាំងអុីរ៉ង់នៅប៉ូឡូញ អនុប្រធានាធិបតីអាមេរិក ម៉ៃ ផេន បានរិះគន់សម្ព័ន្ធមិត្តនៅអឺរ៉ុបដែលបន្តធ្វើពាណិជ្ជកម្មជាមួយអុីរ៉ង់ មិនស្ដាប់ការព្រមានរបស់អាមេរិក។ លោក ផេន ក៏រិះគន់អឺរ៉ុបដែលនៅតែមិនអស់អាល័យនឹងកិច្ចព្រមព្រៀងនុយក្លេអ៊ែរអុីរ៉ង់ឆ្នាំ២០១៥ ដែលអាមេរិកបានដកខ្លួនរួចហើយបន្ទាប់ពីចោទអុីរ៉ង់ថា បំពានកិច្ចព្រមព្រៀងអន្តរជាតិនេះ ហើយបន្តកម្មវិធីមីស៊ីលបង្កការគំរាមកំហែងដាក់អាមេរិក។
អឺរ៉ុប ក៏ជាផ្នែកមួយនៃកិច្ចព្រមព្រៀងនុយក្លេអ៊ែរនេះ ហើយសមាជិកសំខាន់បីមានអង់គ្លេស បារាំង និងអាល្លឺម៉ង់ក៏បានចុះហត្ថលេខាជាមួយរុស្ស៊ី ចិន អាមេរិក និងអុីរ៉ង់។ អឺរ៉ុបមានតួនាទីសំខាន់ក្នុងការធានាពីការអនុវត្តកិច្ចព្រមព្រៀងនេះ និងតាមដានសកម្មភាពរបស់អុីរ៉ង់ផង។ យ៉ាងណាមិញ លោក ផេន បានប្រើពាក្យធ្ងន់ៗសំដៅសម្ព័ន្ធមិត្តទាំងបីនៅអឺរ៉ុបដែលផ្ដើមគំនិតបង្កើតប្រព័ន្ធប្រតិបត្តិការមួយដែលបើកផ្លូវឲ្យក្រុមហ៊ុនអឺរ៉ុបរកស៊ីនៅអុីរ៉ង់ដោយមិនរងទណ្ឌកម្មអាមេរិក។
អនុប្រធានាធិបតីអាមេរិករូបនេះចាត់ទុកសកម្មភាពរបស់អឺរ៉ុប ជំហានមិនត្រឹមត្រូវ ដែលនឹងជួយឲ្យអុីរ៉ង់កាន់តែខ្លាំង ធ្វើឲ្យអឺរ៉ុបចុះទន់ខ្សោយ ហើយបង្កើនគម្លាតរវាងអាមេរិក និងអឺរ៉ុបទៅទៀត។ បើតាមទីភ្នាក់ងារព័ត៌មាន AFP លោក ផេន និយាយថា ពេលវេលាមកដល់ហើយសម្រាប់ដៃគូអាមេរិកនៅអឺរ៉ុបក្នុងការដកខ្លួនចេញពីកិច្ចព្រមព្រៀងនុយក្លេអ៊ែរអុីរ៉ង់ ហើយចូលរួមជាមួយអាមេរិកក្នុងការដាក់សម្ពាធលើប្រទេសនេះវិញ។
បន្ថែមពីលើទណ្ឌកម្មមានស្រាប់ រដ្ឋបាលប្រធានាធិបតី ដូណាល់ ត្រាំ ព្រមានបង្កើនការដាក់សម្ពាធកាន់តែខ្លាំងលើរបបដឹកនាំក្រុងតេហេរ៉ង់ ព្រោះប្រជាជនអ៊ីរ៉ង់ក៏មិនពេញចិត្តនឹងរបបដឹកនាំរបស់ខ្លួន នាំគ្នាតវ៉ាតាមដងផ្លូវ ខណៈសេដ្ឋកិច្ចក៏កាន់តែធ្លាក់ចុះផង។ លោកអនុប្រធានាធិបតីអាមេរិកក៏ឆ្លៀតចោទអ៊ីរ៉ង់ថា បង្កើតការសម្លាប់រង្គាលជាថ្មីតាមរយៈការអនុវត្តនយោបាយប្រឆាំងអ៊ីរ៉ង និងមហិច្ឆតានៅស៊ីរី លីបង់ អ៊ីរ៉ាក់ និងយេម៉ែន។
យ៉ាងណាក្ដី អឺរ៉ុប ទំនងមិនស្ដាប់តាមការទាមទាររបស់អាមេរិក។ ប្រមុខការទូតអឺរ៉ុប Federica Mogherini ដែលមិនចូលរួមជំនួបនៅរដ្ឋធានីវ៉ាសូវីនោះ នៅតែប្រកាន់ជំហរគាំទ្រកិច្ចព្រមព្រៀងនុយក្លេអ៊ែរដដែល។ ប្រាប់អ្នកព័ត៌មានមុនការថ្លែងរបស់លោក ផេន បន្តិច លោកស្រីបញ្ជាក់ថា ការអនុវត្តកិច្ចព្រមព្រៀងនេះជាបញ្ហានៃសន្តិសុខអឺរ៉ុប ព្រោះវាកំហិតអ៊ីរ៉ង់ពីការអភិវឌ្ឍនុយក្លេអ៊ែរ ហើយអឺរ៉ុបក៏យល់ឃើញថា កិច្ចព្រមព្រៀងនេះមានប្រសិទ្ធភាពដែរ៕
Tag:
អាមេរិក
អឺរ៉ុប
អុីរ៉ង់
ម៉ៃ ផេន
© រក្សាសិទ្ធិដោយ thmeythmey.com