អន្តរជាតិ
តើវ៉ែនតាមានប្រវត្តិ និងដើមកំណើតយ៉ាងដូចម្តេច?
× តើអ្នកធ្លាប់មានចម្ងល់ទេថា មុនពេលដែលវ៉ែនតាត្រូវបានបង្កើតឡើង អ្នកមានបញ្ហាភ្នែកមានភាពលំបាកខ្លាំងដែរឬទេ? ប្រាកដណាស់ ពួកគេត្រូវរស់នៅដោយមើលឃើញមិនច្បាស់ជានិច្ច។
យោងតាមគេហទំព័រ zennioptical.com នៅក្នុងសម័យបុរេប្រវត្តិ ដើម្បីការពារភ្នែកពីពន្លឺថ្ងៃដែលភ្លឺពេក ជនជាតិភាគតិចរស់នៅតាមតំបន់ទឹកកកអាកទិក បានកែច្នៃធ្មេញរបស់សត្វតោសមុទ្រ (Walrus)
ដោយចិតប្រហោងតូចហើយវែង ទំហំប្រហែលភ្នែក ហើយចងខ្សែជុំវិញក្បាល។
ពួកគេមិនបានប្រើប្រាស់កញ្ចក់ដើម្បីការពារពន្លឺដូចសម័យទំនើបនេះទេ តែភាពច្នៃប្រឌិតរបស់គេ ក៏អាចចាត់ទុកបានថាជាគំនិតមួយល្អប្រសើរផងដែរ។
ដល់ក្នុងអាណាចក្ររ៉ូមបុរាណ អធិរាជ Nero បានប្រើប្រាស់ត្បូងពណ៌បៃតង Emerald ដើម្បីការពារពន្លឺថ្ងៃ នៅពេលទ្រង់ចូលទស្សនាពិធីសម្តែងនានា។ ពេលអានសៀវភៅ អធិរាជ Nero ប្រើកូនកែវដែលមានទឹកនៅខាងក្នុង ដើម្បីពង្រីកមើលអក្សរឲ្យធំជាងមុន។ ក្នុងអំឡុងឆ្នាំ ១០០០ក្រោយគ្រិស្តសករាជ អ្នកផលិតកញ្ចក់នៅទីក្រុងរ៉ូម ប្រទេសអ៊ីតាលី បានផលិតកញ្ចក់កែវដែលអាចពង្រីកអក្សរបានដោយមិនចាំបាច់ប្រើកែវដែលមានទឹក។ កញ្ចក់ពង្រីកនេះ បានជួយឲ្យមនុស្សដែលមានវ័យចំណាស់បន្តការអាន និងសរសេរសៀវភៅបានយ៉ាងងាយស្រួល។
រវាងឆ្នាំ១២៦៨ និងឆ្នាំ១៣០០ អ្នកផលិតកញ្ចក់ក្នុងទីក្រុងរ៉ូមបានផលិតរបស់មួយដែលគេចាត់ទុកថាជាវ៉ែនតាកញ្ចក់ដំបូងគេបង្អស់ក្នុងប្រវត្តិសាស្ត្ររបស់មនុស្ស។ គេផលិតវាដោយប្រើកញ្ចក់ពីរ តភ្ជាប់ដោយទំពក់នៅកណ្តាល ស្រដៀងគ្នានឹងវ៉ែនតាបច្ចុប្បន្នដែរ។ ក្នុងពេលដដែលនោះ វ៉ែនតាត្រូវបានគេនាំចូលទៅកាន់ទីផ្សារសម្រាប់អ្នកដែលមានបញ្ហាភ្នែកមើលមិនសូវច្បាស់។
ក្នុងសតវត្សន៍ទី២០ វ៉ែនតាថ្មីត្រូវបានគេផលិតឡើងក្នុងគោលបំណងជាច្រើនដូចជា ការពារពន្លឺ UV សម្រាប់ភ្នែកមើលឆ្ងាយ មើលជិត ឬគ្រាន់តែជាម៉ូដជាដើម។ ក្នុងទសវត្សន៍ឆ្នាំ៦០ កញ្ចក់ប្លាស្ទិកក៏ត្រូវបានគេផលិតឡើង ដោយវាមានទម្ងន់ស្រាល និងមិនបង្កគ្រោះថ្នាក់ខ្ពស់នៅពេលបែក។ ក្រោយមក ក្រុមហ៊ុន Google ក៏បានផលិតវ៉ែនតាដែលមានបច្ចេកវិទ្យា និងកាមេរ៉ានៅពីក្នុងដែលគេហថា Google Glasses ។
ក្នុងរយៈពេលជិត១០០០ឆ្នាំមកនេះ គេសង្កេតឃើញការផ្លាស់ប្តូរជាច្រើនក្នុងការមើលរបស់មនុស្ស។ វ៉ែនតាបានក្លាយជាឧបករណ៍មួយដែលមិនអាចខ្វះបានដោយមនុស្សជាច្រើនពេលសព្វថ្ងៃនេះ៕
© រក្សាសិទ្ធិដោយ thmeythmey.com