ជាតិ
សេដ្ឋកិច្ច
លោក ប៊ុន បារាំង៖ ស្រែអំបិលយើង មិនលក់ឲ្យក្រុមអភិវឌ្ឍណាក្រៅពីផលិតអំបិលឡើយ! លោក ប៊ុន បារាំង ប្រធានសហគមន៍អ្នកផលិតអំបិលកំពត-កែប
× ទោះបីជាកម្លាំងអ្នកផលិតអំបិលធា្លក់ចុះ និងតម្លៃដីធ្លី ក្នុងខេត្តកំពត កំពុងរីកចម្រើនខ្លាំងក៍ដោយ តាមរយៈក្រុមអភិវឌ្ឍក្នុង និងក្រៅស្រុកមួយចំនួន លោក ប៊ុន បារាំង ប្រធានសហគមន៍អ្នកផលិតអំបិលកំពត-កែប បានអះអាងថា មិនថាពេលនេះ ឬអនាគត់ទេ ផ្ទៃដីស្រែអំបិលជិត៥ពាន់ហិចតានេះ គឺមិនធ្វើអាជីវកម្ម ឬលក់ឲ្យក្រុមអភិវឌ្ឍណាមួយ ក្រៅពីផលិតអំបិលឡើយ។ ព្រោះវាជាកន្លែងតែមួយគត់ របស់កម្ពុជាក្នុងការផលិតអំបិលសម្រាប់ផ្គត់ផ្គង់តម្រូវការប្រជាពលរដ្ឋទូទាំងប្រទេស និងនាំចេញផងដែរ។
លោក ប៊ុន បារាំង បានបញ្ជាក់ប្រាប់សារព័ត៌មានThmeyThmey តាមទូរសព្ទថា ករណីលក់ដីស្រែអំបិលរបស់ប្រជាជនកសិករអ្នកធ្វើអំបិល បាន និងកំពុងកើតឡើងពិតមែន ពិសេសនៅអ្នកសង្កាត់កោះត្រើយក្នុងខេត្តកំពត។ ប៉ុន្តែការលក់នេះ គឺលក់ទៅឲ្យក្រុមអ្នកផលិតអំបិល ដែលគេមានលទ្ធភាព មានដើមទុនច្រើនក្នុងធ្វើអាជីវកម្មនេះ មិនមែនលក់ឲ្យណាអ្នកផ្សេង ក្រៅពីផលិតអំបិលទេ។ លោកបានអះអាងដូច្នេះ«ស្រែអំបិលយើង គឺមិនលក់ឲ្យក្រុមអភិវឌ្ឍណា ឬជនណាក្រៅពីអ្នកផលិតអំបិលឡើយ!»។
ប្រធានសហគមន៍អ្នកផលិតអំបិលរូបនេះ បានបន្តថា « យើងមានច្បាប់មួយសម្រាប់គ្រប់គ្រងដីស្រែធ្វើអំបិលនេះ។ បើមានអ្នកចង់ធ្វើលក់ដីនេះ គឺត្រូវលក់ទៅឲ្យអ្នកផលិតអំបិលដូចគ្នា ឬអ្នកដែលមានបំណងក្នុងការអភិវឌ្ឍលើការផលិតអំបិលយើងឲ្យកាន់តែប្រសើរទៀត។ ហើយសុំកុំគិតថាស្រែអំបិលទាំងនេះ នឹងបាត់បង់នាពេលអនាគត»។
លោកបានបន្ថែមថា កត្តាដែលធ្វើឱ្យអ្នកផលិតអំបិលមួយចំនួនសម្រេចលក់ដីស្រែអំបិលរបស់ខ្លួន បណ្តាមកពី តម្លៃអំបិលធ្លាក់ចុះ ពីមួយឆ្នាំទៅមួយឆ្នាំ ពិសេសគ្មានកម្លាំងពលកម្ម និងដើមទុនក្នុងការផលិត និងតម្លៃដីឡើងថ្លៃ។ ម្យ៉ាងវិញទៀត ការផលិតអំបិលកម្ពុជាគឺអាស្រ័យទៅលើធម្មជាតិទាំងស្រុង ដោយឆ្នាំខ្លះបានផល និងឆ្នាំខាតចុង ខាតដើម។ ជាក់ស្តែងកាលពីឆ្នាំ២០១៨ជាដើម មានអ្នកផលិតអំបិលជាច្រើនពិសេសក្រុមតូចៗបានក្ស័យធន។
ជាមួយគ្នានេះ លោក ប៊ុន បារាំង បានស្នើដល់ភាគីពាក់ព័ន្ធ ពិសេសក្រសួងឧស្សាហកម្ម រកវិធីទប់ស្កាត់ការនាំចូលអំបិលក្រៅប្រព័ន្ធពីឈ្មួញផ្សេងៗ ដែលធ្វើឱ្យអំបិលក្នុងស្រុកធា្លក់ថ្លៃ និងសូមឱ្យប្រជាពលរដ្ឋគ្រប់រូបគាំទ្រនិងប្រើប្រាស់អំបិលដែលផលិតចេញធម្មជាតិពិតៗ នៅក្នុងទឹកដីខេត្តកំពត-កែបវិញ ដើម្បីឱ្យតម្លៃ និងលើកទឹកចិត្តដល់អ្នកផលិត៕
© រក្សាសិទ្ធិដោយ thmeythmey.com