ជាតិ
សង្គមជាតិ
អគ្គលេខាធិការ៖ ប្រធានតុលាការ១២រូប ដល់វេនប្តូរទៅកន្លែងផ្សេង មិនមែនបញ្ចប់តួនាទីទេ
លោក សំ ប្រជាមានិត អគ្គលេខាធិការឧត្តមក្រុមប្រឹក្សានៃអង្គចៅក្រម
×![]()
ដោយ: ថ្មីៗ
ឧត្តមក្រុមប្រឹក្សានៃអង្គចៅក្រម បានបង្ហាញបញ្ជីស្ថិតិ ដែលត្រូវផ្លាស់ប្តូរប្រធានតុលាការ១២រូប និងអនុប្រធាន៤រូប រួមទាំងចៅក្រម២៥រូប នៅតាមរាជធានី-ខេត្ត ដែលហៅថា «ដល់វេនត្រូវផ្លាស់ប្តូរ»។ បញ្ជីស្ថិតិនេះ ត្រូវបានចុះហត្ថលេខាដោយលោក សំ ប្រជាមានិត អគ្គលេខាធិការឧត្តមក្រុមប្រឹក្សានៃអង្គចៅក្រម កាលពីថ្ងៃទី៣១ ខែមករា ឆ្នាំ២០១៩។ 
លោក សំ ប្រជាមានិត អគ្គលេខាធិការឧត្តមក្រុមប្រឹក្សានៃអង្គចៅក្រោម បកស្រាយប្រាប់សារព័ត៌មានថ្មីៗតាមទូរសព្ទថា ស្ថិតិ ដែលត្រូវបង្ហាញនេះ គឺជាការជូនដំណឹងដល់ប្រធាន អនុប្រធាន និងចៅក្រមទាំងនោះ ដើម្បីឲ្យពួកគេ ដឹងថា ពួកគេ ដល់វេនដែលត្រូវផ្លាស់ប្តូរហើយ។ លោក បញ្ជាក់ថា ពួកគេ គ្រាន់តែដល់វេនដែលត្រូវផ្លាស់ប្តូរទៅកន្លែងធ្វើការផ្សេងប៉ុណ្ណោះ ប៉ុន្តែ មិនមែនត្រូវបានបញ្ចប់តួនាទីនោះទេ។
អគ្គលេខាធិការរូបនេះ ពន្យល់យ៉ាងដូច្នេះថា៖«ពួកគាត់ ធ្វើការនៅកន្លែងរបស់ពួកគាត់គ្រប់រយៈពេល៤ឆ្នាំតាមកាលកំណត់ក្នុងច្បាប់ហើយ ដូច្នេះ ជាគោលការណ៍ យើត្រូវជូនដំណឹងដល់ពួកគាត់ ដើម្បីឲ្យពួកគាត់ ដាក់សំណើប្តូរទៅធ្វើការកន្លែងផ្សេង បើពួកគាត់មានបំណង។ វា ជារឿងធម្មតាទេ»។
«ចុះបើពួកគាត់ មិនធ្វើសំណើ តើឧត្តមក្រុមប្រឹក្សានៃអង្គចៅក្រម នឹងត្រូវសម្រេចផ្លាស់ប្តូរពួកគាត់ទៅខេត្តផ្សេង ឬក៏ទុកពួកគេ ឲ្យនៅធ្វើការកន្លែងដដែល?» លោក សំ ប្រជាមានិត ពុំបានឆ្លើយឲ្យចំនោះទេ ដោយលោក គ្រាន់តែអះអាងថា នេះជាសមត្ថកិច្ចរបស់ឧត្តមក្រុមប្រឹក្សានៃអង្គចៅក្រម ដែលលោក ពុំអាចនិយាយឬសន្និដ្ឋានជាមុនឡើយ ថានឹងត្រូវសម្រេចយ៉ាងម៉េច។ លោក ក៏ពុំទាន់ដឹងដែរថា ឧត្តមក្រុមប្រឹក្សានៃអង្គចៅក្រម នឹងបើកកិច្ចប្រជុំនៅពេលណា ដើម្បីសម្រេចលើបញ្ហានេះ។
ប្រធានតុលាការនៅតាមរាជធានី-ខេត្តទាំង១២ ដែលដល់វេនត្រូវផ្លាស់ប្តូរនោះ រួមមាន ប្រធានតុលាការរាជធានីភ្នំពេញ ខេត្តកណ្តាល ខេត្តកំពង់ចាម ខេត្តស្ទឹងត្រែង ខេត្តរតនគិរី ខេត្តមណ្ឌលគិរី ខេត្តកំពង់ឆ្នាំង ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តព្រះវិហារ និងខេត្តកោះកុង។ ចំណែកអនុប្រធានតុលាការ៤រូប ដែលដល់វេនត្រូវផ្លាស់ប្តូរ គឺជាអនុប្រធានតុលាការរាជធានីភ្នំពេញទាំងអស់។
រីឯ ចៅក្រម២៥រូបនៅតាមរាជធានី-ខេត្ត ដែលដល់វេនត្រូវផ្លាស់ប្តូរ រួមមាន ចៅក្រមតុលាការរាជធានីភ្នំពេញ មាន៦រូប ខេត្តកណ្តាល មាន៥រូប ខេត្តកំពង់ចាម មាន១រូប ខេត្តកំពង់ឆ្នាំង មាន១រូប ខេត្តពោធិ៍សាត់ មាន២រូប ខេត្តបាត់ដំបង មាន២រូប ខេត្តបន្ទាយមានជ័យ មាន៣រូប ខេត្តកំពង់ធំ មាន១រូប ខេត្តកំពង់ស្ពឺ មាន១រូប ខេត្តព្រះសីហនុ មាន១រូប ខេត្តតាកែវ មាន១រូប និងខេត្តស្វាយរៀង មាន១រូប៕
Tag:
តុលាការ
សំ ប្រជាមានិត
© រក្សាសិទ្ធិដោយ thmeythmey.com
