ជាតិ
សម្ដេច ហ៊ុន សែន ប្រាប់ឲ្យសម្ដេច ទៀ បាញ់ និងលោក ប៉ុល សារឿន រើសទាហានស្ត្រីឲ្យច្រើន ដើម្បីបញ្ជូនទៅស៊ូដង់ខាងត្បូង
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ប្រាប់ឲ្យរដ្ឋមន្ត្រីក្រសួងការពារជាតិ សម្ដេច ទៀ បាញ់ និងលោក ប៉ុល រឿន ជ្រើសរើសទាហាន និងអ្នកជំនាញជាស្ត្រី ឲ្យបានច្រើន ដើម្បីបញ្ជូនពួកគេទៅប្រទេសស៊ូដង់ខាងត្បូង ក្នុងក្របខណ្ឌអង្គការសហប្រជាជាតិ។
សម្រាប់ស្ត្រីដែលជ្រើសរើសនោះ ត្រូវមានជំនាញ និងផ្នែកគ្រូពេទ្យ ដើម្បីយកទៅធ្វើការនៅមន្ទីរពេទ្យ ដែលកម្ពុជា កំពុងប្រតិបត្តិការនៅក្នុងប្រទេសតំបន់អាហ្វ្រិកមួយនេះ។ ក្រៅពីនិយាយចំណុចនេះ សម្ដេច ហ៊ុន សែន ក៏បានបញ្ជាក់ថា មន្ត្រីដែលបានតែងតាំងថ្មីៗក្នុងអាណត្តិនេះ គឺត្រូវតែផ្តល់ការងារឲ្យពួកគេធ្វើ ដោយមិនមែនតែងតាំងហើយទុកឲ្យនៅទំនេរនោះទេ ជាពិសេសស្ត្រីតែម្ដង។
សម្ដេចនាយករដ្ឋមន្ត្រី ហ៊ុន សែន ថ្លែងបែបនេះ នៅក្នុងកិច្ចប្រជុំបូកសរុបលទ្ធផលការងារឆ្នាំ២០១៨ និងលើកទិសដៅការងារសម្រាប់ឆ្នាំ២០១៩ របស់ «ក្រុមប្រឹក្សាជាតិកម្ពុជា ដើម្បីស្ត្រី»។កិច្ចប្រជុំប្រចាំឆ្នាំនេះ គឺរៀបចំឡើងដើម្បីតាមដាន និងត្រួតពិនិត្យរាល់សកម្មភាពការងារ និងការអនុវត្តរាល់ខ្លឹមសារទាំងឡាយលើការងាររបស់ «ក្រុមប្រឹក្សាជាតិកម្ពុជាដើម្បីស្ត្រី» ក្នុងការចូលរួមចំណែកជាមួយរាជរដ្ឋាភិបាល ដើម្បីលើកកម្ពស់សិទ្ធិសេរីភាព ឋានៈ តួនាទី ។ ជាពិសេសការដោះស្រាយរាល់ការងារជាអាទិភាពរបស់ស្ត្រីជាដើម៕
Tag:
ហ៊ុន សែន
ទៀ បាញ់
ប៉ុល សារឿន
ស្ត្រី
© រក្សាសិទ្ធិដោយ thmeythmey.com