ជាតិ
រូបភាពបានពី មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប
×![]()
ភ្នំពេញ៖ ស្រែស្រូវប្រាំងប្រមាណ៦៥ហិកតា នៅក្នុងស្រុកជីក្រែង ខេត្តសៀមរាប កំពុងរងការបំផ្លាញ ពីសត្វមមាចត្នោត។ ស្រូវទាំងនោះ កំពុងស្ថិតក្នុងដំណាក់កាលហាលផ្កា និងដាក់ម្ស៉ៅ ហើយភាគច្រើនស្រែស្រូវ គឺគ្មានទឹក។
បើតាមសម្តីរបស់លោក ទា គឹមសុទ្ធ ប្រធានមន្ទីរកសិកម្មខេត្តសៀមរាប ការផ្ទុះឡើងនៃមមាចត្នោត ក្នុងស្រុកជីក្រែងនេះ បណ្តាលមកពីឆ្លងរាលដាលពីខេត្តកំពង់ធំ។ លោក បានប្រាប់សារព័ត៌មានThmeyThmey តាមទូរសព្ទនៅថ្ងៃទី១៨ កុម្ភៈ ដូច្នេះថា កាលពីមួយខែ ឬពីរខែមុន មមាចត្នោតនេះ បានផ្ទុះឡើងនៅក្នុងដីស្រែមួយចំនួនក្នុងខេត្តកំពង់ធំ។ អ៊ីចឹងដល់ពេលដែលខេត្តកំពង់ធំច្រូតកាត់អស់ហើយ វាអាចរៀលដាលបន្តគ្នាមកដល់តំបន់ដែលជាប់ព្រំប្រទល់ស្រុក-ខេត្ត។ ជាក់ស្តែង គឺកំពុងកើតឡើងក្នុងស្រុកជីក្រែងនេះតែម្តង។
ប្រធានមន្ទីររូបនេះ បានបញ្ជាក់ថា៖«ស្រូវប្រាំង ដែលមមាចត្នោតបានបំផ្លាញនោះ មាននៅក្នុងឃុំស្ពានត្នោត៣៥ហិចតា និងឃុំអន្លង់សំណរ៣០ហិចតា។ ហើយមកដល់ពេលនេះមិនទាន់ឆ្លងរាលដាលទៅកន្លែងផ្សេងៗទៀតទេ ព្រោះមានអន្តរាគមន៍ពីកងកម្លាំងមន្ទីរកសិកម្មខេត្ត ពីក្រុមហ៊ុនឯកជន ក្នុងការផ្តល់ថ្នាំបាញ់ដល់ប្រជាកសិករ ដើម្បីកម្ចាត់សត្វទាំងនោះភ្លាមៗ។ ប៉ុន្តែមានប្រជាកសិករមួយចំនួនធំ កំពុងតែចាញ់ថ្នាំកម្ចាត់មមាចត្នោត ដោយខ្លួនឯងផងដែរ»។
លោកបានបន្តថា មមាចត្នោតនេះ កើតឡើងដោយសារប្រជាកសិករមួយចំនួន មិនបានពិនិត្យមើលស្រូវរបស់ខ្លួនឲ្យបានដិតដល់។ ម្យ៉ាងវិញទៀត រដូវនេះ ជារដូវខ្វះទឹកភ្លៀង និងទឹកក្នុងស្រែ រួមផ្សំជាមួយអាកាសក្តៅទៀត បានធ្វើឲ្យមានការផ្ទុះឡើងនូវសត្វមមាចត្នោតបែបនេះ ព្រោះមមាចត្នោតនេះ កាលណាស្រែដែលអស់ទឹក វានឹងឡើងស៊ី ឬបំផ្លាញហើយ៕
Tag:
កសិកម្ម
ស្រូវប្រាំង
មមាចត្នោត
© រក្សាសិទ្ធិដោយ thmeythmey.com
