វៀតណាមសង្ឃឹមនឹងនាំចេញគ្រឿងសមុទ្រឲ្យបាន ១០ពាន់លានដុល្លារក្នុងឆ្នាំ២០១៩។ យ៉ាងណាមិញ គោលដៅនេះគឺទំនងជាពិបាកទទួលបានជោគជ័យ ព្រោះថាសហភាពអឺរ៉ុបបានផ្តល់កាតលឿងដល់វៀតណាមលើការធ្វើនេសាទខុសច្បាប់។
សមាគមផលិតនិងនាំចេញគ្រឿងសមុទ្រវៀតណាម (VASEP) បានឲ្យដឹងនៅក្នុងសន្និសីទសារព័ត៌មានកាលពីថ្មីៗនេះថា ខ្លួនដាក់គោលដៅនាំចេញគ្រឿងសមុទ្រឲ្យបាន ១០ពាន់លានដុល្លារ ក្នុងនោះរាប់បញ្ចូល បង្គាប្រមាណ ៤,២ពាន់លានដុល្លារ, ត្រីសមុទ្រប្រមាណ ២,៣ពាន់លានដុល្លារ និងផលិតផលផ្សេងៗទៀត។
រដ្ឋមន្ត្រីក្រសួងអភិវឌ្ឍន៍ជនបទ និងកសិកម្មវៀតណាម លោក Nguyen Xuan Cuong និយាយថា គោលដៅនាំចេញចំនួន ១០ពាន់លានដុល្លារនេះគឺខ្ពស់ប៉ុន្តែអាចសម្រេចទៅបាន ដ្បិតថាគ្រឿងសមុទ្រវៀតណាមពេញនិយមបំផុតក្នុងទីផ្សារអន្តរជាតិ។ នេះបើតាមការចុះផ្សាយរបស់សារព័ត៌មាន Vietnam Express ។
ទន្ទឺមនឹងគ្នានេះ ប្រធានសមាគមអ្នកផលិតនិងនាំចេញគ្រឿងសមុទ្រវៀតណាម លោក Ngo Van Ich និយាយថា ការនាំចេញបង្គាទៅកាន់សហរដ្ឋអាមេរិកអាចប្រឈមមុខនឹងការយកពន្ធខ្ពស់ជាងមុនក្នុងឆ្នាំនេះ។ ទោះបីជាបែបនេះក្តី ការចូលជាសមាជិករបស់វៀតណាមក្នុងកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) ក៏នឹងជួយបង្កើនការនាំចេញរបស់វៀតណាមទៅកាន់ទីផ្សារបរទេសផងដែរ។
ប៉ុន្តែវាក៏មានឧបសគ្គផងដែរ ដ្បិតវៀតណាមជួបប្រទះនឹងការលំបាកមួយចំនួនរួមមាន ការធ្លាក់ចុះនៃផលនេសាទ និងការប្រកួតប្រជែងដ៏តានតឹងជាមួយនឹងប្រទេសនាំចេញគ្រឿងសមុទ្រផ្សេងៗទៀត។ អ្វីដែលគួរឲ្យព្រួយបារម្ភនោះគឺ វៀតណាមត្រូវបានសហភាពអឺរ៉ុបដាក់ពិន័យកាតលឿង ចាប់តាំងពីឆ្នាំ២០១៧ សម្រាប់ការធ្វើនេសាទខុសច្បាប់។
គណៈកម្មការអឹរ៉ុបធ្លាប់បញ្ជាក់ថា ខ្លួននឹងហាមឃាត់ការនាំចូលគ្រឿងសមុទ្រពីវៀតណាម ប្រសិនបើវៀតណាមមិនព្រមចេញមុខដោះស្រាយបញ្ហានេសាទខុសច្បាប់ ដោយបញ្ឈប់រាល់ទូកនេសាទវៀតណាមចូលទៅដែនទឹករបស់ប្រទេសដ៏ទៃ។ ប៉ុន្តែក្រោយពីបញ្ចប់ការវាយតម្លៃកាលពីខែឧសភាឆ្នាំ២០១៨កន្លងទៅ គណៈកម្មការអឺរ៉ុបបានឲ្យដឹងថាខ្លួននឹងពិចារណាដកកាតលឿងពីវៀតណាមវិញក្នុងឆ្នាំ២០១៩នេះ។
សូមបញ្ជាក់ថា វៀតណាមជាប់ចំណាត់ថ្នាក់ខ្ពស់ក្នុងចំណោមប្រទេសផលិតគ្រឿងសមុទ្រធំទាំង១០លើពិភពលោក។ នេះបើយោងតាមភ្នាក់ងារទទួលបន្ទុកផ្នែកអាហារនិងកសិកម្មរបស់អង្គការសហប្រជាជាតិ។ កាលពីឆ្នាំ២០១៨ ការនាំចេញរបស់វៀតណាមមានចំនួន ៩ពាន់លានដុល្លារ ទាបជាងគោលដៅដែលបានដាក់ចេញ ៩,៥ពាន់លានដុល្លារ៕