ត្រាំ ព្រមានយោធាវ៉េណេស៊ុយអេឡា៖ «រួចទោសដោយទទួលស្គាល់ ក្វៃដូ ឬបាត់បង់គ្រប់យ៉ាងដោយការពារ ម៉ាឌុយរ៉ូ»

អន្តរជាតិ

ត្រាំ ព្រមានយោធាវ៉េណេស៊ុយអេឡា៖ «រួចទោសដោយទទួលស្គាល់ ក្វៃដូ ឬបាត់បង់គ្រប់យ៉ាងដោយការពារ ម៉ាឌុយរ៉ូ»

19, Feb 2019 , 8:59 pm

រូបភាព

ដោយ: ថ្មីៗ

ប្រធានាធិបតីអាមេរិកលោក ដូណាល់ ត្រាំ បានព្រមានយោធាវ៉េណេស៊ុយអេឡាដោយគូសបន្ទាត់ក្រហមជាស្រេចសម្រាប់ពួកគេ ខណៈដែលជំនួយមនុស្សធម៌សម្រាប់ប្រជាជនវ៉េណេស៊ុយអេឡានៅបន្តជាប់គាំងរតាមព្រំដែនកូឡុំប៊ី។ ប្រធានាធិបតីរូបនេះបានបញ្ជាក់ច្បាស់ថា យោធាវ៉េណេស៊ុយអេឡាអាចប្តូរជំហរមកគាំទ្រមេដឹកនាំថ្មីលោក ហ័ន ក្វៃដូ ដើម្បីអាចរួចខ្លួន ឬក៏បន្តការពារលោក នីកូឡាម៉ាឌុយរ៉ូ ដោយត្រៀមបាត់បង់អ្វីគ្រប់យ៉ាង។

ជំនួយមនុស្សធម៌ដែលភាគច្រើនជាជំនួយអាមេរិកនោះនៅបន្តជាប់គាំងនៅព្រំដែនកូឡុំប៊ី ដោយសាររដ្ឋាភិបាលលោក នីកូឡា ម៉ាឌុយរ៉ូ បដិសេធចោល និងប្រើប្រាស់កម្លាំងរារាំងជំនួយទាំងនេះផង។ មេដឹកនាំដែលប្រកាសតាំងខ្លួនជាប្រធានាធិបតី ហ័ន ក្វៃដូ បានដាក់ឱសានវាទសម្រាប់រដ្ឋាភិបាលក្រុងការ៉ាកាស់ត្រឹមថ្ងៃសៅរ៍សម្រាប់ការប្តូរជំហរបើកទ្វារឲ្យជំនួយមនុស្សធម៌ចូលសង្គ្រោះប្រជាជនដែលកំពុងរងទុក្ខវេទនាដែរ។

បើតាមទីភ្នាក់ងារព័ត៌មាន AFP ខណៈដែលស្ថានការណ៍កាន់តែតានតឹង ប្រធានាធិបតីអាមេរិកដែលជាអ្នកដឹកនាំចលនាអន្តរជាតិគាំទ្រលោក កៃ្វដូ ប្រឆាំងនឹងលោក ម៉ាឌុយរ៉ូ នោះបានព្រមានយោធាវ៉េណេស៊ុយអេឡារួចទៅហើយជុំវិញការឃាឃាំងជំនួយមនុស្សធម៌ និងការពាររបបដឹកនាំម៉ាឌុយរ៉ូ។

លោក ត្រាំ បានផ្ញើសារជាថ្មីច្បាស់ៗថា យោធាទាំងនោះមានជម្រើសពីរធំគឺ ទីមួយព្រមទទួលស្គាល់លោក ក្វៃដូដើម្បីទទួលការលើកលែងទោសជាផ្លូវការ ឬក៏នៅបន្តជ្រោមជ្រែងលោក ម៉ាឌុយរ៉ូ ដោយត្រៀមបាត់បង់អ្វីគ្រប់យ៉ាងនៅពេលខាងមុខ។

និយាយទៅកាន់អ្នកគាំទ្រ និងប្រជាជនវ៉េណេស៊ុយអេឡាដែលរស់នៅក្រុង Miami លោក ត្រាំ បាននិយាយដូច្នេះ៖ «ភ្នែកប្រជាជនទូទាំងពិភបលោកសំឡឹងមើលអ្នករៀងរាល់ថ្ងៃ។ អ្នកមិនអាចលាក់ខ្លួនពីជម្រើសដែលអ្នកត្រូវប្រឈមឡើយ»។

លោក ត្រាំ បន្តថា៖ «អ្នកអាចទទួលស្គាល់ការផ្តល់ការលើកលែងទោសពីសំណាក់ប្រធានាធិបតី ក្វៃដូ ដើម្បីរស់នៅក្នុងសន្តិភាពជាមួយគ្រួសារនិងអ្នកស្នេហាជាតិផ្សេងទៀត ឬក៏ជ្រើសរើសផ្លូវទីពីរ។ នោះគឺបន្តគាំទ្រម៉ាឌុយរ៉ូ។ ប្រសិនជាជ្រើសរើសយកជម្រើសនេះ អ្នកឯងនឹងគ្មានជម្រកសុវត្ថិភាព ឬគ្មានច្រកចេញឡើយ។ អ្នកឯងនឹងបាត់បង់គ្រប់យ៉ាង»។

មកដល់បច្ចុប្បន្ន លោក ក្វៃដូ ប្រកូកប្រកាសរកអ្នកស្ម័គ្រចិត្ត មួយលាននាក់ដើម្បីនាំជំនួយចូលក្នុងប្រទេស ហើយបច្ចុប្បន្នមានអ្នកចុះឈ្មោះប្រហែល ៦០ ម៉ឺននាក់ហើយ។ យ៉ាងណាមិញ គេនៅមិនទាន់ដឹងច្បាស់ថា លោក ក្វៃដូ និងអ្នកស្ម័គចិត្តទាំងនោះនឹងជម្នះឧបសគ្គរបាំងយោធាដែលជាបញ្ជារបស់លោក ម៉ាឌុយរ៉ូ របៀបណាឡើយ។

«ត្រឹមថ្ងៃ ២៣ ខែកុម្ភៈ យើងនឹងមានឱកាសសង្គ្រោះជីវិតប្រជាជនវ៉េណេស៊ុយអេឡារាប់សែននាក់ដែលកំពុងរងគ្រោះហើយ»។ ក្វៃដូ បានប្រកាសបែបនេះ។

ដោយឡែក លោក ម៉ាឌុយរ៉ូ បានប្រឆាំងដាច់ខាតនឹងជំនួយអាមេរិកដោយចាត់ទុកថា វាជាចេតនាឈ្លានពានជាជាងចង់សង្គ្រោះប្រជាជន និងជាចេតនានយោបាយសុទ្ធសាធ។

កន្លងមក ម៉ាឌុយរ៉ូ ធ្លាប់និយាយពេញៗមាត់ថា គ្មានវិបត្តិមនុស្សធម៌កើតឡើងទេ ហើយវ៉េណេស៊ុយអេឡាមានសមត្ថភាពដោះស្រាយបញ្ហាបាន។ ប៉ុន្តែក្រោយមក ម៉ាឌុយរ៉ូ ស្រាប់តែបង្ហើបថា ជំនួយប្រហែល ៣០០តោនរបស់រុស្ស៊ី នឹងមកដល់វ៉េណេស៊ុយអេឡានៅត្រឹមថ្ងៃពុធទី ២០ ខែកុម្ភៈនេះដែរ។ ជំនួយនេះមកដល់បីថ្ងៃមុន ថ្ងៃកំណត់របស់លោក កៃ្វដូ ក្នុងការនាំជំនួយអាមេរិកចូលស្រុក។

លោក ម៉ាឌុយរ៉ូ អួតអាងថា ក្នុងចំណោមជំនួយ ៣០០តោននោះ មានប្រភេទថ្នាំល្អជាច្រើនសម្រាប់ប្រជាជនវ៉េណេស៊ុយអេឡា ហើយក្រៅពីរុស្ស៊ីសម្ព័ន្ធមិត្តឯទៀតមានចិន និងគុយបាក៏នឹងផ្តល់ជំនួយដល់វ៉េណេស៊ុយអេឡាដែរ៕