ជាតិ
ក្រុមហ៊ុនមួយគ្រោងបោះទុន ៧០លានដុល្លារ វិនិយោគលើការចិញ្ចឹមត្រី និងជម្រកអភិរក្សសត្វជិតផុតពូជ
លោក ទៀ សីហា អភិបាលខេត្តសៀមរាប (ប្រភពរូបភាព៖ហ្វេសប៊ុករដ្ឋបាលខេត្តសៀមរាប)
×![]()
ដោយ: ឡាយ សុភាវតី
ភ្នំពេញ៖ ក្រុមហ៊ុន អង្គរ វ៉ាយដ៏ឡាយហ្វ៍ និងអីឃ្វោរៀម គ្រោងបោះទុន៧០លានដុល្លារ វិនិយោគលើគម្រោងសាងសង់ជលវប្បដ្ឋានត្រី នៅលើផ្ទៃដីប្រមាណ១០០ហិកតា នៅក្នុងស្រុកសូទ្រនិគម ខេត្តសៀមរាប។នេះបើតាមហ្វេសប៊ុកផ្លូវការរបស់រដ្ឋបាលខេត្តសៀមរាប។
ក្រុមប្រឹក្សាភិបាល ក្រុមហ៊ុនអង្គរ វ៉ាយដ៏ឡាយហ្វ៍ និងអីឃ្វារៀមលោក Roger Reynolds បាននិយាយប្រាប់អភិបាលខេត្តសៀមរាបថា គម្រោងវិនិយោគនេះ ត្រូវចែកចេញជាបីដំណាក់កាល ហើយក្នុងដំណាក់ ទី១ គឺប្រើប្រាស់ថវិកា២០លានដុល្លារ ដែលគ្រោងបើកការដ្ឋាន ក្នុងខែមីនា ឆ្នាំ២០១៩នេះ ហើយនឹងដាក់ឲ្យដំណើរការនៅចុងឆ្នាំ២០២០។ លោក Roger បាននិយាយថា ក្នុងគម្រោងនៃដំណាក់ការទី១នេះ ក៏ជាការត្រៀមទាក់ទាញភ្ញៀវទេសចរជាតិ-អន្តរជាតិ ឲ្យបន្តស្នាក់នៅខេត្តសៀមរាប។
តាមរយៈហ្វេសប៊ុករដ្ឋបាលខេត្តសៀមរាប ដែលស្រង់សម្តីក្រុមប្រឹក្សាភិបាលរូបនេះ បានសរសេរដូច្នេះ៖«បន្ទាប់ពីការអនុវត្តលើគម្រោង ទាំងមូលបានបញ្ចប់នោះ គម្រោងបន្តផែនការអភិវឌ្ឍរបស់ខ្លួន ដោយបានផ្តល់នូវការងារដល់ប្រជាពលរដ្ឋទៀតផង។ ម្យ៉ាងទៀត គម្រោងនេះ គឺមិនត្រឹមតែអភិវឌ្ឍសេដ្ឋកិច្ចជាតិប៉ុណ្ណោះទេ គឺផ្តល់នូវការអប់រំដល់ភ្ញៀវជាតិ-អន្តរជាតិ និងប្រជាពលរដ្ឋ អំពីបរិស្ថាន និងការអភិរក្សប្រភពធនធានធម្មជាតិ តាមរយៈការបង្ហាញនូវរូបភាពឯកសារ អំពីប្រភេទមច្ឆាក្នុងទឹកដ៏កម្រ ដល់សិស្ស និស្សិត និង ប្រជាពលរដ្ឋ ។សំខាន់ភ្ញៀវទេសចរបរទេស បានទស្សនាសិក្សាស្វែងយល់ អំពីធនធានធម្មជាតិនៅកម្ពុជា»។
គម្រោងនេះ ក្រោមកម្រងក្រុមហ៊ុនសហកម្មសិទិ្ធ ដោយមានភាគហ៊ុនវិនិយោគខ្មែរ អាមេរិក និងជប៉ុនរួមសហការគ្នា ដែលផ្ដោតលើការវិនិយោគជលវប្បដ្ឋាន ត្រីទឹកសាប និងទឹកប្រៃ និងជម្រកអភិរក្សសត្វព្រៃជិតផុតពូជ។
ចំពោះការបង្កើតឲ្យមានមជ្ឈមណ្ឌលជលវប្បដ្ឋាន ត្រីទឹកសាប ត្រីទឹកប្រៃ និង ជម្រកអភិរក្សសត្វនេះ គឺជាការបម្រើដល់តម្រូវការរបស់ភ្ញៀវទេសចរជាតិ-អន្តរជាតិ ដែលជាសមិទ្ធផលថ្មីមួយទៀតរបស់ខេត្តសៀមរាប។ នេះជាការលើកឡើងរបស់លោក ទៀ សីហា អភិបាលខេត្តសៀមរាប ដែលស្នើឲ្យក្រុមហ៊ុនសហការជាមួយបណ្តាស្ថាប័ន និងអាជ្ញាធរពាក់ព័ន្ធ ដើម្បីសុំច្បាប់សាងសង់ឲ្យបានត្រឹមត្រូវ ។ ជាពិសេស ការឲ្យអាជ្ញាធរជួយពិនិត្យទីតាំងរបស់គម្រោង ដើម្បីកុំឲ្យប៉ះពាល់ដល់ទីទួលបុរាណដ្ឋាន ដែលនាំឲ្យមានការរំខានការសាងសង់ ហើយធ្វើឲ្យយឺតយ៉ាវដល់គម្រោងនេះ៕
Tag:
ទៀ សីហា
សត្វព្រៃ
ត្រី
© រក្សាសិទ្ធិដោយ thmeythmey.com
