អន្តរជាតិ
ក្រោយចរចាអស់១០ឆ្នាំ វៀតណាម ទទួលបានសិទ្ធិនាំចេញស្វាយទៅកាន់ទីផ្សារអាមេរិក
រូបភាព៖ Vietnam News
×![]()
រដ្ឋាភិបាលក្រុងហាណូយ បានទទួលសិទ្ធិក្នុងការនាំចេញផ្លែស្វាយទៅកាន់អាមេរិក បន្ទាប់ពីភាគីទាំងពីរបានចរចាគ្នាអស់រយៈពេលមួយទសវត្សរ៍។ នេះ គឺជាសមទ្ធិផលធំមួយរបស់វៀតណាម ក្នុងការស្វែងរកទីផ្សារដ៏ធំបំផុតមួយ ខណៈទីផ្សារអាមេរិក មិនងាយទទួលយកការនាំចូលពីបរទេសនោះ។
ចាប់ពីថ្ងៃទី១៨ កុម្ភៈតទៅ វៀតណាម អាចទទួលបានអាជ្ញាបណ្ណ និងសិទ្ធិជាផ្លូវការហើយក្នុងការនាំចេញផ្លែស្វាយ ដែលជាផលិតផលកសិកម្មដ៏សម្បូរបែបមួយរបស់ប្រទេសអាស៊ីអាគេ្នយ៍មួយនេះទៅកាន់អាមេរិក បន្ទាប់ពីការចរចាគ្នាអស់ ១០ឆ្នាំមកនោះ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam នៅថ្ងៃ១៨ កុម្ភៈ។
នាកម្មវិធីនៃការប្រកាសពីការទទួលបានអាជ្ញាបណ្ណនៅថ្ងៃដដែលនោះ អនុរដ្ឋមន្ត្រីកសិកម្ម និងអភិវឌ្ឍជនបទវៀតណាម Lê Quốc Doan បានអះអាងថា ការព្រមនាំចូលផ្លែស្វាយពីវៀតណាមរបស់អាមេរិក បានបង្ហាញពីកិច្ចសហប្រតិបត្តិប្រកបដោយប្រសិទ្ធភាពរវាងប្រទេសទាំងពីរនៅក្នុងវិស័យកសិកម្ម។ នេះបើយោងតាមការចុះផ្សាយរបស់ព័ត៌មានដដែលនោះ។
អនុរដ្ឋមន្ត្រីកសិកម្មរូបនេះ បានគូសបញ្ជាក់ថា ស្វាយ គឺជាផ្លែឈើដ៏ល្អបំផុតមួយរបស់វៀតណាម ហើយការព្រមទទួលយករបស់អាមេរិកក្នុងការនាំចូលនេះ គឺជាព័ត៌មានដ៏ល្អមួយសម្រាប់វិស័យកសិកម្ម និងកសិករនៅក្នុងប្រទេស។
លោក សង្កត់ធ្ងន់ថា ការព្រមនាំចូលកសិផលវៀតណាមរបស់អាមេរិក គឺជាឱកាសមាសសម្រាប់ផ្លែឈើវៀតណាម ដ្បិតអាមេរិក មានលក្ខខណ្ឌតឹងរ៉ឹងបំផុតសម្រាប់់ការនាំចូលទៅកាន់ទីផ្សារខ្លួន។ អនុរដ្ឋមន្ត្រី រំពឹងថា វៀតណាម អាចនឹងទទួលបានការបញ្ជាទិញកាន់តែច្រើនពីទីផ្សារអន្តរជាតិ បន្ទាប់ពីការផ្តល់អាជ្ញាបណ្ណនេះ។
ដើម្បីបន្តទំនុកចិត្តនេះ ក្រសួងកសិកម្ម និងអភិវឌ្ឍជនបទវៀតណាម បានប្តេជ្ញាបន្តលើស្ទួយវិស័យស្រាវជ្រាវ និងបច្ចេកវិទ្យាទំនើបបន្ថែមលើវិស័យកសិកម្ម និងកិច្ចការពាក់ព័ន្ធនានា ដើម្បីធានាថា ផលិតផលរបស់វៀតណាម មានគុណភាពខ្ពស់ និងអនាម័យ និងជាពិសេសនោះ សមស្របតាមលក្ខខណ្ឌនៃការនាំចេញ។
តាម Vietnam News កន្លងមក វៀតណាម បាននាំចេញផ្លែស្វាយទៅកាន់៤០ប្រទេសរួចមកហើយ ដែលក្នុងនោះ រួមទាំងមានកូរ៉េខាងត្បូង, ជប៉ុន, សិង្ហបុរី , អូស្ត្រាលី, អូស្ត្រាលី, នូវែលសេឡង់, ចិន និងថៃ ជាដើម៕
Tag:
វៀតណាម
អាមេរិក
© រក្សាសិទ្ធិដោយ thmeythmey.com
