ជាតិ
២៥ខេត្ត/រាជធានី
សមាគមកសិកម្ម២៦ ក្នុងខេត្តចំនួនបី បានផ្គត់ផ្គង់ដំណាំសរីរាង្គជាង២ម៉ឺនតោន ក្នុងមួយឆ្នាំ
× ភ្នំពេញ៖ សមាគមកសិកម្មចំនួន២៦ ក្នុងខេត្តចំនួន៣ បានផ្គត់ផ្គង់ដំណាំសរីរាង្គបានមធ្យម ២១,៣៥៥តោន ក្នុងមួយឆ្នាំៗ ទៅឱ្យក្រុមហ៊ុនឯកជនចំនួន៧ នៅក្នុងប្រទេស។ ការផ្គត់ផ្គង់នេះ គឺតាមរយៈការចុះកិច្ចសន្យាកសិកម្មនូវតម្លៃទីផ្សារ ជាមួយក្រុមហ៊ុន។
លោក ជា សុជាតិ ប្រធានគម្រោងកសិកម្មរបស់អង្គការ World Vision បាននិយាយថា ដំណាំសរីរាង្គដែលសហគមន៍ផ្គត់ផ្គង់ឱ្យក្រុមហ៊ុនឯកជនទាំងនោះមានជាង ស្រូវ១,៩ម៉ឺនតោន ដំឡូវមីជាង២ពាន់តោន ស្វាយចន្ទីមាន២៦តោន និងបន្លែសុវត្ថិភាពមានជិត៧តោនជាដើម។ សហគមទាំង២៦នេះ ស្ថិតនៅក្នុងខេត្តកណ្តាល កំពង់ធំ និងព្រះវិហារ។ ក្រៅពីនេះ ក៏មានក្រុមសហគម១២ ទៀត ដែលកំពុងផ្គត់ផ្គង់ដំណាំសរីរាង្គរាប់ពាន់តោន នៅទូទាំងប្រទេសផងដែរ។
ថ្លែងក្នុងវេទិកាអាជីវកម្មរបស់សហគមកសិកម្មនៅភោជនីដ្ឋានទន្លេបាសាក់២ ថ្ងៃទី២០ កុម្ភៈ លោក ជា សុជាតិ បាននិយាយថា៖ «នេះគឺសង្វាក់ផលិតកម្មនៃវិស័យកសិកម្មដែលយើងបានពីការបណ្តុះបណ្តាលទាំងបច្ចេកទេសដាំដុះ និងការរកដៃគូទីផ្សារឱ្យកសិករ តាមរយៈគម្រោងអភិវឌ្ឍអាជីវកម្មប្រកបដោយនិរន្តភាពនៅកម្ពុជា របស់អង្គការ World Vision»។
គម្រោងនេះ បានទទួលការគាំទ្រថវិកាចំនួន៣,៤១លានដុលា្លរ ពីរដ្ឋាភិបាលអូស្រា្តលី។ គម្រោងនេះមានរយៈពេល៥ឆ្នាំ ដែលគ្រោងនឹងបញ្ចប់នៅអំឡុងខែមិថុនា ឆ្នាំ២០១៩។ នេះបើតាមលោក ឈឹម ផាន់ណា ប្រធានជាន់ខ្ពស់ផ្នែកមូលនិធិគម្រោងរបស់អង្គការ World Vision ។
លោក ឈឹម ផាន់ណា សង្ឃឹមថា ក្រោយបញ្ចប់គម្រោងនេះ ប្រជាកសិករទាំងនោះនឹងមានលទ្ធភាពកាន់តែខ្ពស់ក្នុងការផ្គត់ផ្គង់តម្រូវការទៅឱ្យដៃគូ និងពង្រីកដៃគូបន្ថែម ក៏ដូចជាការបំពេញនូវតម្រូវការក្នុងស្រុក តាមរយៈការគាំទ្រពីមន្ទីរកសិកម្មនៅតាមបណ្តាខេត្តនីមួយៗរបស់ខ្លួន ក្នុងគោលបំណងលើកកម្ពស់ផលិតកម្មនៃវិស័យកសិកម្មក្នុងស្រុក ដើម្បីកាត់បន្ថយការនាំចូលដំណាំផ្សេងពីបរទេស ៕
Tag:
កសិកម្ម
សរីរាង្គ
កណ្តាល
កំពង់ធំ
ព្រះវិហារ
© រក្សាសិទ្ធិដោយ thmeythmey.com