ជុំវិញការផ្ទេ Sala៖ Cardiff ពន្យារពេលបង់ប្រាក់ ១៩លានដុល្លារ ទៅ Nantes

កីឡាអន្តរជាតិ

អន្តរជាតិ

ជុំវិញការផ្ទេ Sala៖ Cardiff ពន្យារពេលបង់ប្រាក់ ១៩លានដុល្លារ ទៅ Nantes

21, Feb 2019 , 2:16 pm

រូបភាព

ដោយ: ទេព ពិទូរ្យ

ក្លិប Cardiff City ពន្យារពេលបង់ថ្លៃផ្ទេរបស់កីឡាករ Emiliano Sala ក្នុងចំនួនទឹកប្រាក់ ១៥លានផោន (ជាង១៩លានដុល្លារអាមេរិក) រហូតដល់ថ្ងៃទី២៧ ខែកុម្ភៈ ឆ្នាំ២០១៩។

អត្ថបទទាក់ទង

ប៉ូលិសប្រកាសផ្លូវការថា សាកសពក្នុងបំណែកយន្តហោះ គឺកីឡាករ Sala

យន្តហោះដែលដឹកកីឡាករ Sala ចំណូលថ្មីថ្លៃបំផុតរបស់ Cardiff បាត់ការទាក់ទង

ក្លិបដែលមានមូលដ្ឋានក្នុងក្របខណ្ឌ Premier League នេះត្រូវដល់ពេលកំណត់ទូទាត់ប្រាក់លើកទីមួយទៅឲ្យក្លិប Nantes នៅថ្ងៃទី២០ ខែកុម្ភៈ ប៉ុន្តែក្លិបទាំងពីរបានព្រមព្រៀងគ្នាពន្យារពេលក្នុងរយៈមួយសប្ដាហ៍។ នេះបើតាមការផ្សាយរបស់ BBC Wales Sport។

Sala ខ្សែប្រយុទ្ធសញ្ជាតិអាហ្សង់ទីនវ័យ ២៨ ឆ្នាំ បានយល់ព្រមចុះហត្ថលេខាដើម្បីផ្លាស់ទៅចូលរួមជាមួយ Cardiff ក្នុងតម្លៃកំណត់ត្រាពីក្រុមនៃក្របខណ្ឌ Ligue 1 បារាំង Nantes កាលពីខែមករាកន្លងទៅ។

ជាអកុសល Sala បានស្លាប់ដោយការធ្លាក់យន្តហោះជាមួយពីឡុតម្នាក់ទៀតឈ្មោះ David Ibbotson អំឡុងពេលអ្នកទាំងពីរធ្វើដំណើរពីប្រទេសបារាំងទៅក្រុង Cardiff ប្រទេសវែលិ៍ កាលពីថ្ងៃទី២១ ខែមករា។ សាកសពរបស់ Sala ត្រូវបានក្រុមអ្នករុករកស្រង់ឡើងពីបាតសមុទ្រ នឹងដឹកយកទៅអាហ្សង់ទីន ដើម្បីធ្វើបុណ្យតាមប្រពៃណី នៅថ្ងៃទី១៦ ខែកុម្ភៈ។

នេះក៏ជាការខាតបង់ធំបំផុតសម្រាប់ក្លិបដែលមានម្ចាស់ជាជនជាតិម៉ាឡេស៊ីនេះ ព្រោះត្រូវត្រូវគោរពតាមកិច្ចសន្យាដោយបង់ប្រាក់ពេញតែម្តង។

ក្លិប Nantes បានសរសេរលិខិតផ្ញើទៅ Cardiff ដោយមានសំណើសម្រាប់ការបង់ប្រាក់ជាលើកដំបូង ក្នុងចំណោមការបង់ប្រាក់ទាំង៣លើក នៅថ្ងៃទី២០ ខែកុម្ភៈ។

ប៉ុន្តែខាង Cardiff បានស្នើពន្យារពេលវិញ ដ្បិតពួកគេកំពុងស្វែងរកការបំភ្លឺទាក់ទងនឹងព័ត៌មានលម្អិតអំពីគ្រោះថ្នាក់របស់ Sala ហើយត្រូវរង់ចាំរហូតដល់ការស៊ើបអង្កេតជុំវិញការធ្លាក់យន្តហោះបញ្ចប់ដោយជោគជ័យ៕