អន្តរជាតិ
×![]()
ដោយ: តន ចាន់រិទ្ធារ៉ា
ការដកខ្លួនរបស់អាមេរិកចេញពីសន្ធិសញ្ញាហាមឃាត់មីស៊ីលនុយក្លេអ៊ែរចម្ងាយមធ្យម (INF) ធ្វើឲ្យទំនាក់ទំនងជាមួយរុស្ស៊ីកាន់តែយ៉ាប់យ៉ឺន។ រុស្ស៊ីបារម្ភថា អាមេរិកនឹងពង្រាយមីស៊ីលរបស់ខ្លួននៅអឺរ៉ុបដើម្បីវាយប្រហារ ឬទុកកំញើញខ្លួន។ ប្រធានាធិបតីរុស្ស៊ី វ្ល៉ាឌីមៀ ពូទីន គំរាមវិញថា បើវ៉ាស៊ីនតោនហ៊ានដាក់មីស៊ីលនៅក្បែរផ្ទះខ្លួននោះ ក្រុងមូស្គូក៏នឹងធ្វើដូចគ្នាដែរ ហើយធ្វើខ្លាំងជាងអាមេរិកទៅទៀត។ ការវិវត្តស្ថានការណ៍បែបនេះ ធ្វើឲ្យគេនឹកដល់វិបត្តិមីស៊ីលគុយបាកាលពីជាង៥០ឆ្នាំមុន។
អាមេរិក និងរុស្ស៊ីកំពុងដើរទៅរកវិបត្តិមីស៊ីលគុយបាលើកទីពីរ? នេះជាសំណួរដែលលេចឡើងក្នុងបរិបទសព្វថ្ងៃ ព្រោះអាមេរិក និងរុស្ស៊ីកំពុងតែសង្គ្រឺតធ្មេញដាក់គ្នាកាន់តែខ្លាំងគ្មានថមថយឡើយ។ ការដើរចេញពីសន្ធិសញ្ញាហាមឃាត់មីស៊ីលនុយក្លេអ៊ែរចម្ងាយមធ្យម (INF) របស់អាមេរិកក្រោមហេតុផលថា រុស្ស៊ីជាអ្នកបំពានសន្ធិសញ្ញា ជាការដុតបញ្ឆេះភាពតានតឹងដែលកំពុងពុះកញ្ជ្រោលស្រាប់ហើយនោះ។
សញ្ញាជាច្រើនបង្ហាញថា វិបត្តិមីស៊ីលគុយបាយអាចនឹងលេចជារូបរាងម្ដងទៀត។ នៅឆ្នាំ១៩៦២ ពិភពលោកសឹងតែងធ្លាក់ក្នុងមហន្តរាយជាថ្មីទៅហើយ បន្ទាប់ពីអាមេរិក និងរុស្ស៊ីពង្រាយមីស៊ីលក្បែរទឹកដីគូប្រជែងរបស់ខ្លួន។ កាលនោះ អាមេរិកបានបញ្ជូនមីស៊ីលទៅតួកគី ហើយរុស្ស៊ីក៏តបវិញដោយបញ្ជូនមីស៊ីលរបស់ខ្លួនទៅកាន់គុយបាដែលនៅកៀកអាមេរិកបំផុត។ ច្រើនជាង៥ទសវត្សរ៍បន្ទាប់ ភាពតានតឹងដូចគ្នានេះ ប្រុងកើតឡើងជាថ្មី។
តាមពិតទៅ ទោះដកខ្លួនចេញពី INF ក្ដី អាមេរិកមិនទាន់បញ្ចេញផែនការណាមួយទាក់ទងនឹងការពង្រាយមីស៊ីលនៅអឺរ៉ុបឡើយ។ INF ដែលជាសន្ធិសញ្ញាបន្សល់ទុកតាំងពីសម័យសង្គ្រាមត្រជាក់ហាមឃាត់អាមេរិក និងរុស្ស៊ីពង្រាយមីស៊ីលបំពាក់នុយក្លេអ៊ែរចម្ងាយមធ្យមនៅអឺរ៉ុប។ បើតាមទីភ្នាក់ងារព័ត៌មាន Reuters អាមេរិកក៏មិនទាន់មានមីស៊ីលនុយក្លេអ៊ែរចម្ងាយមធ្យមបាញ់ចេញពីជើងទម្រលើដីគោកដើម្បីតាំងនៅអឺរ៉ុបដែរ តែអាចអភិវឌ្ឍបានក្រោយដើរចេញពី INF ។
នេះហើយជាមូលហេតុដែលរុស្ស៊ីនៅមិនសុខបក់មិនល្ហើយនោះ។ នៅថ្ងៃទី២០ ខែកុម្ភៈ ប្រធានាធិបតីរុស្ស៊ី វ៉ា្លឌីមៀ ពូទីន បានព្រមានជាស្រេចថា រុស្ស៊ីដើរតាមអាមេរិកក្នុងការពង្រាយមីស៊ីលនេះ។ បានន័យថា បើអាមរិកពង្រាយមីស៊ីលទៅក្បែររបងផ្ទះរុស្ស៊ី រុស្ស៊ីក៏នឹងបញ្ជូនមីស៊ីលទៅកៀកអាមេរិក ឬក៏ពង្រាយមីស៊ីលល្បឿនលឿនចូលក្បែរទឹកដីអាមេរិកផងដែរ។ ក្រោយមក លោក ពូទីន ក៏បង្ហើបទៀតថា មីស៊ីលថ្មីអាចពង្រាយតាមជើងទឹក។
ដោយព្រមានចំៗ លោក ពូទីន អះអាងថា រុស្ស៊ីអាចពង្រាយមីស៊ីលល្បឿនលឿនជាងសំឡេងនៅលើនាវាចម្បាំង ឬនាវាមុជទឹកដែលអាចលាក់ខ្លួនក្រៅដែនទឹកអាមេរិក ព្រោះអាចវាយប្រហារគោលដៅបានលឿន។ លោកបន្ថែមថា នាវារុស្ស៊ីមិននៅនឹងនៅមួយកន្លែងឡើយ ហើយអាមេរិកត្រូវធ្វើការធ្ងន់ដើម្បីរកនាវារុស្ស៊ី ក៏ដូចជាមីស៊ីលថ្មីដែលមានល្បឿនលឿន ហើយអាចរត់ចំគោលដៅដល់ទៅ១ពាន់គីឡូម៉ែត្រឯណោះ។
ខណៈប្រកាន់ជំហរចរចាព្រោះមិនចង់ឃើញការរត់ប្រណាំងសព្វាវុធអ្វីនោះ ប្រធានាធិបតីរុស្ស៊ីរូបនេះព្រមានដែរថា រុស្ស៊ីមិននៅស្ងៀមឡើយ បើអាមេរិកបញ្ជូនមីស៊ីលទៅអឺរ៉ុបនោះ។ បើតាមលោក ពូទីន មីស៊ីលខ្លះរបស់អាមេរិកអាចវាយប្រហាររដ្ឋធានីមូស្គូក្នុងចន្លោះពេល១០ទៅ១២នាទីប៉ុណ្ណោះ។
ទោះជាយ៉ាងណា មេដឹកនាំរុស្ស៊ីយល់ថា ស្ថានភាពតានតឹងដូចសព្វថ្ងៃនេះមិនទាន់អាចប្រដូចនឹងវិបត្តិមីស៊ីលគុយបាឡើយ ហើយដែលជាស្ថានការណ៍ដែលគ្រប់គ្នាមិនចង់បានទាល់តែសោះ។ សម្រាប់លោក ពូទីន រុស្ស៊ីដើរតាមពីក្រោយអាមេរិក បើអាមេរិកចង់ឲ្យវិបត្តិគុយបាកើតឡើងម្ដងទៀត រុស្ស៊ីក៏ស្វាគមន៍ដែរ។ ក្នុងន័យលើកតម្កើងអានុភាពមីស៊ីលរបស់ខ្លួន លោក ពូទីន ក៏ឆ្លៀតអួតថា បើស្ថានការណ៍អាក្រក់កើតមានមែន ទុកឲ្យអាមេរិកជាអ្នកវាស់ល្បឿនលឿនមីស៊ីលរុស្ស៊ីទៅចុះ៕
Tag:
អាមេរិក
រុស្ស៊ី
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com
