ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ជាធម្មតាបញ្ហាអង្គែស្បែកក្បាល គឺបង្កឡើងពីរោគផ្សិតម្យ៉ាងហៅថា Malassezia ដែលលូតលាស់លើស្បែកក្បាល។ អង្គែស្បែកក្បាលមាន ២ ប្រភេទ គឺមួយកើតឡើងដោយសារការផលិតជាតិប្រេងច្រើនលើស ហើយមួយទៀតនោះបណ្ដាលមកពីភាពស្ងួតពេកនៃស្បែកក្បាល។ទោះជាយ៉ាងណាបញ្ហាអង្គែក៏បណ្ដាលមកពីការមិនកក់សក់ទៀងទាត់, ការប្រើប្រាស់សាប៊ូខុស ស្ត្រេស និងការទទួលទានចំណីអាហារផងដែរ។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីវិធីដ៏ងាយបំផុតកម្ចាត់អង្គែចេញពីស្បែកក្បាល ដោយចំណាយអស់តិចតែមានប្រសិទ្ធិភាពខ្ពស់ ៖
១. សិតសក់ទៀងទាត់
ការសិតសក់ឱ្យបានទៀងទាត់អាចជួយចែកចាយជាតិប្រេងធម្មជាតិនៃសក់ឱ្យស្មើៗគ្នា និងថែមទាំងសម្អាតស្បែកក្បាលផងដែរ ដោយកម្ចាត់ភាពកខ្វក់ និងស្បែកងាប់ៗដែលជាប់លើសក់។
២. លាងសម្អាតក្រាសសិតសក់
អ្នកចាំបាច់ត្រូវលាងសម្អាតក្រាសសិតសក់យ៉ាងហោចណាស់ ១ ដងក្នុងមួយសប្តាហ៍ ដើម្បីកម្ចាត់សក់ដែលជាប់, ធូលីដី, ភាពកខ្វក់, ជាតិប្រេង និងកំទេចកំទីផ្សេងៗដែលគាំងជាប់ ហើយអាចនាំឱ្យកើតមានបញ្ហាអង្គែស្បែកក្បាល។
៣. សម្អាតស្បែកក្បាលឱ្យជ្រះសព្វ
អ្នកត្រូវលាងសម្អាតស្បែកក្បាលឱ្យជ្រះសព្វក្រោយពេលកក់សក់ និងប្រើក្រែមបន្ទន់ ក៏ព្រោះផលិតផលថែរក្សាសក់ប្រភេទនេះប្រសិនបើនៅពេលជាប់នឹងស្បែកក្បាលយូរអាចបង្កជាអាការៈរមាស់ ហើយឡើងអង្គែកាន់តែច្រើន។
៤. ប្រើប្រាស់ប្រេងដូង និងទឹកក្រូចឆ្មារ
អ្វីដែលអ្នកត្រូវធ្វើនោះ គឺលាយប្រេងដូងចំនួន ២ ស្លាបព្រាបាយ ជាមួយទឹកក្រូចឆ្មារស្រស់ ១ ស្លាបព្រាកាហ្វេ។ កូរឲ្យសព្វ សឹមលាបល្បាយលើសក់ និងស្បែកក្បាល។ ម៉ាស្សាឲ្យពេញក្បាលសម្រាប់រយៈពេល ២ ទៅ ៣ នាទី រួចទុកចោលសម្រាប់រយៈពេលពី ២០ ទៅ ៣០ នាទី សឹមកក់សក់ចេញជាមួយសាប៊ូជាការស្រេច។
៥. ទទួលទានថ្នាំគ្រាប់វីតាមីន
ការលេបថ្នាំគ្រាប់វីតាមីនអាចជួយកម្ចាត់ប្រយុទ្ធប្រឆាំងនឹងអង្គែពីខាងក្នុង។ ទទួលទានវីតាមីន A ជួយជម្រុញការផលិតជាតិប្រេងធម្មជាតិនៃស្បែកក្បាលដែលជួយរក្សាឬសនៃសក់ល្អសម្រាប់អ្នកដែលមានស្បែកក្បាលស្ងួត។ ចំណែកឯវីតាមីន E វិញជួយរក្សាចរន្តឈាមត្រឹមត្រូវល្អប្រសើរ ខណៈដែលវីតាមីន B ជួយសម្រួលចរន្តឈាម និងការលូតលាស់នៃកោសិកាថ្មីដែលចាំបាច់សម្រាប់រក្សាស្បែកក្បាលមានសុខភាពល្អ។
៦. កាត់បន្ថយស្ត្រេស
ភាពតានតឹងក្នុងអារម្មណ៍ ឬស្ត្រេស ក៏ជាមូលហេតុចម្បងនៃការកើតអង្គែផងដែរ។ ដូច្នេះចូរព្យាយាមគ្រប់គ្រង ឬកាត់បន្ថយកម្រិតនៃភាពតានតឹងរបស់អ្នក ប្រសិនបើអ្នកចង់កម្ចាត់អង្គែអស់ពីសក់ និងស្បែកក្បាល៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
