អនុប្រធានាធិបតីអាមេរិក ទៅជួបមេដឹកនាំប្រឆាំងវ៉េណេស៊ុយអេឡាដោយផ្ទាល់ ដើម្បីបង្ហាញការគាំទ្រ

អន្តរជាតិ

អនុប្រធានាធិបតីអាមេរិក ទៅជួបមេដឹកនាំប្រឆាំងវ៉េណេស៊ុយអេឡាដោយផ្ទាល់ ដើម្បីបង្ហាញការគាំទ្រ

25, Feb 2019 , 11:19 am

រូបភាព

ដោយ: តន ចាន់រិទ្ធារ៉ា

អនុប្រធានាធិបតីអាមេរិក ម៉ៃ ផេន នឹងទៅជួបលោក ហ័ន ក្វៃដូ មេដឹកនាំប្រឆាំងវ៉េណេស៊ុយអេឡានៅទឹកដីកូឡុំប៊ី ដើម្បីបង្ហាញការគាំទ្ររបស់អាមេរិកចំពោះការតស៊ូប្រឆាំងរបបដឹកនាំលោក នីកូឡាស់ ម៉ាឌុយរ៉ូ ។ សព្វថ្ងៃ អាមេរិកកំពុងដឹកនាំយុទ្ធនាការប្រមែប្រមូលប្រទេសជុំវិញពិភពលោកដើម្បីដាក់សម្ពាធលើលោក ម៉ាឌុយរ៉ូ ឲ្យចុះចេញពីតំណែង ហើយងាកទទួលស្គាល់លោក ក្វៃដូ វិញ។ ប៉ុន្តែលោក ម៉ាឌុយរ៉ូ ហាក់មិនទាន់ថយក្រោយឡើយ។

អនុប្រធានាធិបតីអាមេរិក ម៉ៃ ផេន នឹងជួបលោក ហ័ន ក្វៃដូ នៅថ្ងៃទី២៥ ខែកុម្ភៈនេះ នៅកូឡុំប៊ី ជាទីដែលលោក ក្វៃដូ កំពុងរកផ្លូវឲ្យជំនួយមនុស្សធម៌របស់អាមេរិកមានលទ្ធផលចូលទឹកដីវ៉េណេស៊ុយអេឡា ដើម្បីសង្គ្រោះប្រជាជនដែលកំពុងអត់ឃ្លាន។ ជំនួបរវាងលោក ផេន និងលោក ក្វៃដូ ធ្វើឡើងស្របពេលដែលស្ថានការណ៍នយោបាយនៅវ៉េណេស៊ុយអេឡា ផុងកាន់តែជ្រៅដោយសារតែការប៉ុនប៉ងបញ្ជូនជំនួយចូលប្រទេសពីសំណាក់ក្រុមប្រឆាំង តែរដ្ឋាភិបាលលោក នីកូឡាស់ ម៉ាឌុយរ៉ូ មិនទទួល។

បើតាមសេចក្ដីប្រកាសរបស់អ្នកនាំពាក្យអនុប្រធានាធិបតីអាមេរិក លោក ផេន នឹងប្រើជំនួបនៅកូឡុំប៊ីក្នុងការបង្ហាញជំហរគាំទ្រឥតងាករេរបស់រដ្ឋាភិបាលោក ដូណាល់ ត្រាំ ចំពោះលោក ក្វៃដូ ដែលអាមេរិកទទួលស្គាល់ជាមេដឹកនាំស្របច្បាប់តែមួយគត់របស់វ៉េណេស៊ុយអេឡា។ ជុំវិញវិបត្តិនយោបាយនេះ អ្នកនាំពាក្យលោក ផេន ចាត់ទុកជាការប្រជែងគ្នារវាងរបបផ្ដាច់ការ និងប្រជាធិបតេយ្យ ហើយវាក៏ដល់ដែលលោក ម៉ាឌុយរ៉ូ ចាកចេញដែរ។

ក្នុងដំណើរទស្សនកិច្ចនៅកូឡុំប៊ីដែលជាប្រទេសមួយទទួលស្គាល់លោក ក្វៃដូ អនុប្រធានាធិបតីអាមេរិកនឹងថ្លែងទៅកាន់កិច្ចប្រជុំនៃក្រុមប្រទេសលីម៉ា ដែលបង្កើតឡើងក្នុងឆ្នាំ២០១៧ ដើម្បីដោះស្រាយវិបត្តិនៅវ៉េណេស៊ុយអេឡា និងមានសមាជិកភាគច្រើនជាប្រទេសនៅអាមេរិកឡាទីន។ តាមពិតទៅ ភាគច្រើននៃប្រទេសទាំងនេះ ក៏បានទាត់ចោលភាពស្របច្បាប់របស់លោក ម៉ាឌុយរ៉ូ ជាប្រធានាធិបតីវ៉េណេស៊ុយអេឡារួចហើយដែរ។

វិបត្តិនយោបាយប្រទេសសម្បូរប្រេងមួយនេះ ធ្វើឲ្យប្រជាជនជាច្រើនរត់ទៅប្រទេសជិតខាង។ ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួននិងទីភ្នាក់ទេសន្តរប្រវេសន៍អង្គការសហប្រជាជាតិ រាយការណ៍ថា ចំនួនជនភៀសខ្លួន និងជនចំណាកស្រុកមកពីវេណេស៊ុយអេឡា មានចំនួន៣លាន ៤សែននាក់នៅទូទាំងពិភពលោក ដោយភាគច្រើននៅក្នុងតំបន់អាមេរិកឡាទីននិងតំបន់ការ៉ាអ៊ីប ក្នុងទិសដៅស្វែងរកភាពល្អប្រសើរក្នុងការរស់នៅ។

កូឡុំប៊ីដែលជាអ្នកជិតខាងវ៉េណេស៊ុយអេឡា ទទួលយកជនភៀសខ្លួន និងជនចំណាកស្រុកច្រើនជាងគេបង្អស់ដោយមានចំនួនទៅដល់ជាង១លាននាក់ បន្ទាប់មកមានប៉េរូ ស៊ីលី អេក្វាទ័រ អាហ្សង់ទីន និងប្រេស៊ីល។ កូឡុំប៊ី ក៏ជាកន្លែងរក្សាទុកជំនួយអាមេរិកដែរ ហើយកាលពីថ្ងៃទី២៤ ខែកុម្ភៈ វ៉េណេស៊ុយអេឡាក៏ប្រកាសផ្ដាច់ទំនាក់ទំនងជាមួយប្រទេសនេះទៅទៀត៕