អន្តរជាតិ
លោកអាបេ៖ មូលដ្ឋានទ័ពអាមេរិកនៅអូគីណាវ៉ា នឹងផ្លាស់ប្ដូរដដែល ទោះប្រជាជនតំបន់ប្រឆាំងក្ដី
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី២៥ ខែកុម្ភៈ បានប្រកាសជំហរបន្តផែនការផ្លាស់ប្ដូរមូលដ្ឋានទ័ពអាមេរិកនៅលើកោះអូគីណាវ៉ា ទោះជាប្រជាជនក្នុងតំបន់ជំទាស់ដាច់ខាតក្ដី។ លោក អាបេ អះអាងថា គម្រោងផ្លាស់ប្ដូរនេះ មិនអាចពន្យារពេលបានទៀតឡើយ។ ការប្រកាសរបស់ប្រមុខរដ្ឋាភិបាលជប៉ុន ធ្វើឡើងបន្ទាប់ពីការធ្វើប្រជាមតិមួយលើកោះនេះកាលពីចុងសប្ដាហ៍មុន ដែលលទ្ធផលបង្ហាញថា ប្រជាជនមិនសុខចិត្តនឹងផែនការនេះឡើយ។
ក្នុងប្រជាមតិដែលមិនមានចំណងអនុវត្តផ្លូវច្បាប់ អ្នកបោះឆ្នោតលើកោះអូគីណាវ៉ាចំនួន៧២ភាគរយ បានជំទាស់គម្រោងផ្លាស់ប្ដូរមូលដ្ឋានទ័ពអាមេរិក Futenma ហើយ១៩ភាគរយទៀតគាំទ្រការរុះរើនេះ។ ប្រជាជនលើកោះភាគខាងត្បូងនេះ ចំនួន៥២ភាគរយបានទៅបោះឆ្នោតក្នុងប្រជាមតិនេះ។
នាយករដ្ឋមន្ត្រីជប៉ុន ស៊ីនហ្សូ អាបេ ដែលប្រកែកមិនបោះបង់គម្រោងផ្លាស់ប្ដូរបន្ទាយទ័ពអាមេរិក ប្រកាសទទួលយកលទ្ធផលប្រជាមតិនេះ ហើយលោកនឹងព្យាយាមស្វែងរកការយោគយល់ពីប្រជាជនលើកោះអូគីណាវ៉ាជុំវិញការសម្រេចចិត្តដ៏ចម្រូងចម្រាស។ ប៉ុន្តែគម្រោងផ្លាស់ប្ដូរមូលដ្ឋានចេញពីទីតាំងចាស់នេះ នឹងនៅតែបន្តដដែល ដោយលោក អាបេ អះអាងថា គម្រោងនេះមិនអាចពន្យារពេលបានទៀតឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
បន្ទាយទ័ពអាមេរិក Futenma ជាចំណុចរសើបក្នុងទំនាក់ទំនងអាមេរិក និងជប៉ុន។ ទោះជាកោះមួយនេះមានផ្ទៃដីតិចជាងមួយភាគរយនៃផ្ទៃដីសរុបរបស់ជប៉ុនក្ដី រដ្ឋាភិបាលកោះមួយនេះ មិនចង់ទទួលយកទាហានអាមេរិកឡើយ។ វត្តមានយោធាអាមេរិក បង្ករឿងឈឺក្បាលយ៉ាងខ្លាំងសម្រាប់ប្រជាជនក្នុងតំបន់រាប់តាំងពីការបំពុលសំឡេងដោយសារការឡើងចុះរបស់យន្តហោះ ឧបទ្ទវហេតុយោធា និងបទឧក្រិដ្ឋបង្កដោយទាហានអាមេរិកផង។
ដើម្បីដោះស្រាយបញ្ហា នៅឆ្នាំ១៩៩៦ ក្រុងវ៉ាស៊ីនតោន និងក្រុងតូក្យូ ក៏ព្រមព្រៀងផ្លាស់ប្ដូរមូលដ្ឋានកងទ័ពចំនួនជិតប្រាំម៉ឺននាក់ហើយនៅក្បែរទីប្រជុំជនសម្បូរមនុស្ស ទៅកាន់ទីតាំងថ្មីដែលស្ថិតលើកោះអូគីណាវ៉ាដដែល។ ទីតាំងថ្មីនេះ ស្ថិតនៅដាច់ស្រយាលពីទីប្រជុំជន ហើយមួយផ្នែកត្រូវបានសាងសង់លើដីចាក់បំពេញសមុទ្រ។ ប៉ុន្តែគម្រោងនេះបន្តអូសបន្លាយទល់សព្វថ្ងៃ។
ក្រុមជំទាស់ផែនការនេះ ចង់ឲ្យមូលដ្ឋានថ្មីតាំងនៅកន្លែងផ្សេងក្រៅពីកោះនេះ ដើម្បីឲ្យប្រជាជនជប៉ុនផ្សេងទៀតចែករំលែកសម្ពាធមួយនេះ។ ការមិនពេញចិត្តនេះ ក៏ក្លាយជារបៀបវារៈនយោបាយដែរ ដោយប្រជាជនលើកោះនេះ តែងតែបោះឆ្នោតឲ្យបេក្ខជនទាំងឡាយណាដែរមានប្រឆាំងគម្រោងនេះ ជាក់ស្ដែងអភិបាលខេត្តសព្វថ្ងៃ លោក Denny Tamaki ដែលចូលកាន់តំណែងកាលពីឆ្នាំ២០១៨ ជាដើមផង។ យ៉ាងណាមិញ រដ្ឋាភិបាលលោក អាបេ គ្មានឆន្ទៈពិចារណាឡើងវិញពីគម្រោងនេះឡើយ៕
Tag:
ជប៉ុន
អាមេរិក
អូគីណាវ៉ា
ស៊ីនហ្សូ អាបេ
© រក្សាសិទ្ធិដោយ thmeythmey.com
