ជាតិ
សង្គមជាតិ
លោក វេង សាខុន ព្រមានចាត់វិធានការលើប្រធានមន្ទីរខេត្តកោះកុង ប្រសិនរកឃើញយកដីរដ្ឋលក់
រូបពីហ្វេសប៊ុកក្រសួងកសិកម្ម រុក្ខាប្រមាញ់ និងនេសាទ
×![]()
ដោយ: ភួង វ៉ាន់ថា
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ ព្រមានចាត់វិធានការផ្លូវច្បាប់ទៅលើប្រធានមន្ទីរកសិកម្មខេត្តកោះកុង បើសិនជារកឃើញថា ពិតជាបានយកដីរដ្ឋលក់មែននោះ។ ការព្រមានរបស់ក្រសួងកសិកម្មនេះ ធ្វើឡើងក្រោយពីមានការចុះផ្សាយរិះគន់ភាពមិនប្រក្រតីនៃការយកដីរដ្ឋទៅលក់នេះ។
ក្រសួងកសិកម្ម បានចាត់ក្រុមការងារ ចុះធ្វើអធិការកិច្ចលើការគ្រប់គ្រងទ្រព្យសម្បត្តិរដ្ឋរបស់មន្ទីរកសិកម្ម រុក្ខាប្រមាញ់ និងនេសាទ ខេត្តកោះកុងហើយ ជាពិសេសដីចំនួន ៣កន្លែង របស់ខណ្ឌរដ្ឋបាលព្រៃឈើ ដើម្បីចាត់វិធានការតាមនីតិវិធីផងដែរ។
សេចក្តីប្រកាសព័ត៌មានរបស់ក្រសួងកសិកម្ម៖«ក្នុងករណីពិតជាមានកំហុសឆ្គង ក្រសួងនឹងចាត់វិធានការ ស្របតាមច្បាប់ស្ដីពី សហលក្ខន្តិកៈ មន្ត្រីរាជការស៊ីវិលនៃកម្ពុជា»។
ជុំវិញបញ្ហានេះ អ្នកនាំពាក្យក្រសួងកសិកម្មលោក ស្រី វុឌ្ឍី បានប្រាប់សារព័ត៌មានថ្មីៗថា លោកមិនទាន់បានព័ត៌មានលម្អិតនៃការធ្វើអធិការកិច្ចនៅឡើយទេ។ « ឥឡូវនេះខ្ញុំមិនទាន់ទទួលបានព័ត៌មានហ្នឹងនៅឡើយទេ។ ហើយចំពោះដីនឹងខ្ញុំមិនបានចាំទីតាំងរបស់វានៅតំបន់ណាទេ។ ខ្ញុំអត់ចាំទំហំប៉ុន្មានទេ ។ ចាំខ្ញុំស្រាវជ្រាវសិន»។
បន្ថែមពីនេះក្រសួងកសិកម្ម ក៏បានបដិសេធថា ក្រសួងមិនបានចេញគោលការណ៍អនុញ្ញាតឲ្យមានការលក់ដូរដីរដ្ឋ និងពុំមានការពាក់ព័ន្ធដូចសារព័ត៌មានចុះផ្សាយនោះទេ។ ក្រសួង អះអាងថា ខ្លួនបានដាក់ចេញនូវវិធានការចំនួន ១៧ចំណុចឲ្យមន្ទីរអនុវត្ត និងកែលម្អហើយ។
ទាក់ទងបញ្ហាខាងលើនេះ លោក អ៊ី ម៉េងហេង ប្រធានមន្ទីរក្រសួងកសិកម្ម រុក្ខាប្រមាញ់ និងនេសាទ ខត្តកកោះកុង បានប្រាប់កាសែតភ្នំពេញប៉ុស្តិ័ថា លោកមិនបានប្រព្រឹត្តិដូចការចុះផ្សាយនោះទេ៕
Tag:
វេង សាខុន
ដីរដ្ឋ
© រក្សាសិទ្ធិដោយ thmeythmey.com
