ONE Championship
កីឡាជាតិ
ជាតិ
គង់ សំបូរ ទទួលស្គាល់បរាជ័យក្រោមថ្វីដៃកីឡាករចិន ក្នុងព្រឹត្តិកាណ៍ ONE: CALL TO GREATNESS
×![]()
អត្ថបទ៖ Matias Andres
កីឡាករក្លិបអាណាចក្រប្រយុទ្ធ (KFG) គង់ សំបូរ បានទទួលបរាជ័យក្នុងការប្រកួត ONE Super Series លើកដំបូងរបស់ខ្លួនក្នុងព្រឹត្តិកាណ៍ ONE: CALL TO GREATNESS នៅសិង្ហបុរី នាថ្ងៃទី២២ ខែកុម្ភៈ។
អ្នកប្រដាល់កម្ពុជាវ័យ២៣ឆ្នាំបានតតាំងជាមួយជើងឯក Top King Muay Thai World Champion កីឡាករ Zhang Chenglong ដែលជាអ្នកប្រដាល់ជនជាតិចិន។ ក្រោយកាត់ការប្រកួតគ្នា៣ទឹកយ៉ាងស្វិតស្វាញ ចៅក្រមបានសម្រេចឲ្យសំបូរ ចាញ់ពិន្ទុមិនឯកច្ឆន្ទ។
កីឡាករ Zhang Chenglong
លោក Kwok Leung Tsang អ្នកដឹកនាំក្លិប KFG និយាយថា៖ «សំបូរបានប្រឹងប្រែងយ៉ាងខ្លាំងក្នុងពេលចូលប្រកួត។ ជាអកុសល លទ្ធផលចេញមកមិនដូចអ្វីដែលពួកយើងបានប៉ង ប៉ុន្តែខ្ញុំប្រាកដថាតាមរយៈបទពិសោធលើកនេះ ការប្រកួតបន្ទាប់នឹងខុសពីនេះ»។
ក្នុងនាមជាគូសំខាន់ទី១នៃព្រឹត្តិការណ៍ សំបូរ បានចាប់ផ្ដើមការប្រកួតយ៉ាងលឿន ដោយបោះជើងទាត់លើខ្លាំងៗជាច្រើនជើងដើម្បីបង្កភាពភ្ញាក់ផ្អើលដល់កីឡាករចិនរហស្សនាម «Muay Thai Boy”»។
ទោះបីត្រូវ សំបូរ ដេញឲ្យថយក៏ដោយ ប៉ុន្តែអ្នកប្រដាល់ចិនដ៏មានទេពកោសល្យអាចរកវិធីតបតវិញបាននិងបានបោះកណ្ដាប់ដៃចំៗពេញៗពីរដៃលើកីឡាករវ័យក្មេងកម្ពុជា។
ក្រោយចាញ់ទឹកទី១ Zhang បានបង្កើនល្បឿននៅក្នុងទឹកទី២ហើយបានចេញទាំងជើងនិងកណ្ដាប់ដៃ ខណៈ សំបូរ នៅតែប្រើក្បាច់ទាត់ដែលគេបានគ្រោងទុក។
Zhang បានត្រួតត្រាទឹកទី៣សឹងទាំងស្រុង ប៉ុន្តែ សំបូរ មិនចុះញ៉មឡើយហើយរក្សាបានលំនឹងទល់នឹងជើងឯកមួយថៃពិភពលោកដ៏ចំណាន។
ថ្វីបើនេះជាការប្រកួតលើកទី១របស់ សំបូរ នៅក្រៅប្រទេសនិងជាលើកដំបូងរបស់គេក្នុងស្ថាប័នក្បាច់គុនធំបំផុតលើពិភពលោកក្ដី តែគេបានរក្សាជំហរឹងមាំទាំងមុននិងក្រោយពេលចៅក្រមផ្ដល់ពិន្ទុការប្រកួត kickboxing ទម្ងន់ bantamweight នេះឲ្យគូប្រកួតរបស់គេឈ្នះ។
លោក Leung Tsang និយាយថា៖ «ខ្ញុំគិតថាទឹកទី១និងទី២ប្រហាក់ប្រហែលគ្នា ហើយនៅទឹកទី៣វាច្បាស់ហើយថា Zhang ជាអ្នកនាំមុខពិន្ទុច្រើនជាង។ លទ្ធផលអាចគេអាចយើង ហើយការសម្រេចចិត្តផ្ដល់ជ័យជម្នះដោយពិន្ទុមិនឯកច្ឆន្ទនៅតែជាលទ្ធផលគួរឲ្យសរសើរមួយសម្រាប់កីឡាករម្នាក់ដែលទើបប្រកួតលើកដំបូង»។
ពេលខ្លះ សំបូរ ហាក់ភាន់ភាំងនឹងច្បាប់ kickboxing ហើយថ្នាក់ដឹកនាំក្លិប KFG បានគិតថាចំណុចនេះអាចពន្យល់បានថាដោយសារកង្វះបទពិសោធក្នុងកីឡាប្រភេទនេះ។
សរុបជារួម សំបូរ និងក្រុមរបស់គេរីករាយចំពោះការចេញប្រកួតលើកដំបូងរបស់គេក្នុង ONE Super Series ហើយក្លិបប្រដាល់ដែលមានមូលដ្ឋាននៅខេត្តសៀមរាបពេលនេះកំពុងសម្លឹងទៅកាន់ការប្រមូលផ្ដុំឡើងវិញនិងរង់ចាំការប្រកួតបន្ទាប់ដែលអាចជាការប្រកួត kickboxing ឬ Muay Thai។
រឿងប្រាកដមួយគឺថាបទពិសោធលើកដំបូងរបស់ក្លិបប្រដាល់ KFG ក្នុងស្ថាប័ន ONE Championship បានធ្វើឲ្យពួកគេមានភាពស្រេកឃ្លានក្នុងការចង់មកប្រកួតទៀត។
លោក Leung Tsang បញ្ជាក់ថា៖ «អ្នកមិនអាចបរិយាយបានទេ។ វាជាស្ថាប័នដ៏ធំនិងរៀបចំបានល្អមែនទែន។ វាអស្ចារ្យណាស់ ហើយការទទួលបានឱកាសមកប្រកួតលើឆាកពិភពលោកទល់នឹងអ្នកប្រយុទ្ធលំដាប់ពិភពលោកដូច្នេះគឺមហស្ចារ្យណាស់»៕
Tag:
គង់ សំបូរ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
