អន្តរជាតិ
លោក ឌូទើតេ ទុកពលករចិនខុសច្បាប់ក្នុងស្រុក ព្រោះមិនចង់ប៉ះពាល់ដល់ពលករហ្វីលីពីននៅចិន
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ និយាយថា លោកសុខចិត្តអនុញ្ញាតឲ្យពលករចិនខុសច្បាប់បន្តរស់នៅក្នុងប្រទេស ដ្បិតថាការបញ្ជូនពួកគេទៅវិញអាចទទួលរងប្រតិកម្មពីភាគីចិន ដែលនឹងប៉ះពាល់ដល់ពលករហ្វីលីពីនប្រមាណ៣០ម៉ឺននាក់ កំពុងធ្វើការនៅទីនោះ។
ថ្លែងអំឡុងព្រឹត្តិការណ៍មួយរបស់បក្សកាន់អំណាចហ្វីលីពីន នាទីក្រុង Binan កាលពីថ្ងៃទី២៤ខែកុម្ភៈ លោក រ៉ូឌ្រីហ្គិ ឌូទើតេ គូសបញ្ជាក់ថា៖«ពលករចិនកំពុងធ្វើការនៅទីនេះ។ ហេតុអ្វីយើងមិនអនុញ្ញាតឲ្យពួកគេរស់នៅក្នុងប្រទេសយើង? ដូចគ្នាអ៊ីចឹងដែរ! យើងក៏មានពលករហ្វីលីពីន៣០ម៉ឺននាក់នៅប្រទេសចិនផងដែរ។ នេះជាហេតុផលដែលខ្ញុំមិនអាចនិយាយថា ខ្ញុំនឹងបញ្ជូនពួកអ្នកត្រឡប់ទៅវិញ។ ចុះប្រសិនបើពលករទាំង៣០ម៉ឺននាក់របស់យើង ភ្លាមៗត្រូវគេបណ្តេញចេញពីប្រទេសចិននោះ?»។
ការលើកឡើងរបស់មេដឹកនាំរូបនះ គឺធ្វើឡើងក្រោយពីការិយាល័យអន្តោប្រវេសន៍ហ្វីលីពីនបានកោះហៅពលករបរទេសទាំងអស់ដែលកំពុងធ្វើការក្នុងប្រទេសហ្វីលីពីន សម្រាប់ការចុះបញ្ជីរាប់ចំនួនមនុស្ស។ ចំណាត់ការថ្មីនេះដែរ ត្រូវបានដាក់ចេញក្រោយពីមានរបាយការណ៍មួយបង្ហាញថា ពលករចិនរាប់ពាន់នាក់ បាននិងកំពុងចូលទៅក្នុងប្រទេសហ្វីលីពីនក្នុងនាមជាអ្នកទេសចរ ប៉ុន្តែលេចមុខនៅក្នុងបញ្ចីឈ្មោះរបស់ឧស្សាហកម្មគ្រប់គ្រងពលករចិនថាជា ពលករខុសច្បាប់។
យោងតាមការចុះផ្សាយរបស់សារព័ត៌មាន Inquirer News កាលពីសប្តាហ៍មុន គណៈកម្មាធិការទទួលបន្ទុកធនធានមនុស្ស, ការងារ និងពលកម្មនៃព្រឹទ្ធសភាហ្វីលីពីន បានបន្តបើកការស៊ើបអង្កេតលើកំណើននៃពលករចិនខុសច្បាប់ក្នុងប្រទេសហ្វីលីពីន។ ការស៊ើបអង្កេតនេះបានចាប់ផ្តើមកាលពីឆ្នាំមុន ពោលគឺបន្ទាប់ពីសមាជិកព្រឹទ្ធសភាហ្វីលីពីន Franklin Drilon បង្ហាញការព្រួយបារម្ភជុំវិញការមកដល់ដ៏ច្រើនសន្ធឹកនៃពលករចិននៅហ្វីលីពីន ហើយដណ្តើមការងាររបស់ប្រជាជនហ្វីលីពីន។
សូមបញ្ជាក់ផងដែរថា ចាប់តាំងពីចូលកាន់តំណែងជាប្រធានាធិបតីហ្វីលីពីន លោក ឌូទើតេ ទទួលរងការរិះគន់យ៉ាងខ្លាំង ក្រោយលោកទៅស្និទ្ធស្នាលជាមួយក្រុងប៉េកាំង ក្នុងគោលបំណងទទួលលុយកម្ចី និងទទួលការវិនិយោគលើគម្រោងហេដ្ឋារចនាសម្ព័ន្ធដ៏ធំសម្បើមរបស់លោក។ ម្យ៉ាងវិញទៀត មេដឹកនាំរូបនេះក៏មិនខ្វាយខ្វល់នឹងសាលក្រមរបស់តុលាការឡាអេ ដែលកាត់ក្តីឲ្យហ្វីលីពីនឈ្នះក្នុងជម្លោះទឹកដីនៅក្បែរសមុទ្រចិនខាងត្បូង រួមមាន ដែនទឹកនៅជុំវិញតំបន់សេដ្ឋកិច្ចពិសេសផ្តាច់មុខរបស់ហ្វីលីពីនជាដើម៕
Tag:
ចិន
ហ្វីលីពីន
ពលករ
© រក្សាសិទ្ធិដោយ thmeythmey.com