វៀតណាម នឹងបំពាក់កាមេរ៉ាឃ្លាំមើលអ្នកល្មើសច្បាប់ចរាចរណ៍នៅទូទាំងប្រទេស

អន្តរជាតិ

វៀតណាម នឹងបំពាក់កាមេរ៉ាឃ្លាំមើលអ្នកល្មើសច្បាប់ចរាចរណ៍នៅទូទាំងប្រទេស

26, Feb 2019 , 11:09 am

រូបភាព

ដោយ:

វៀតណាម នឹងបំពាក់កាមេរ៉ាសុវត្ថិភាពដើម្បីឃ្លាំមើលការល្មើសច្បាប់ចរាចណ៍ នៅទីក្រុងហាណូយ និងទីក្រុងហូជីមិញ ត្រឹមឆ្នាំ២០២០ និងនៅទូទាំងប្រទេសត្រឹមឆ្នាំ២០២២។ នេះគឺជាចំណាត់ការថ្មីមួយដែលរដ្ឋាភិបាលវៀតណាមបានដាក់ចេញកាលពីថ្មីៗនេះ ក្នុងគោលដៅកាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍។

រដ្ឋាភិបាលវៀតណាម នៅថ្ងៃទី២៦ ខែកុម្ភៈ បានស្នើឲ្យក្រសួងសន្តិសុខសាធារណៈរៀបចំគម្រោង ដំឡើងកាមេរ៉ាសុវត្ថិភាព ព្រមទាំងបង្កើតមជ្ឈមណ្ឌលគ្រប់គ្រងចរាចរណ៍ដើម្បីភ្ចាប់និងចែករំលែកទិន្នន័យពីកាមេរ៉ាសុវត្ថិភាព។ នេះបើតាមការចុះផ្សាយរបស់សារព័ត៌មាន Vietnam News ។

បន្ថែមពីកាត់បន្ថយការកកស្ទះ និងគ្រោះថ្នាក់ចរាចរណ៍ គម្រោងថ្មីនេះ ក៏មានគោលដៅបង្កើតទីតាំងផ្ទុកទិន្នន័យថ្នាក់ជាតិមួយលើការល្មើសច្បាប់និងគ្រោះថ្នាក់ចរាចរណ៍នាឆ្នាំ២០២០ និងចែករំលែកព័ត៌មានជាមួយក្រសួងសុខាភិបាល និងក្រសួងយុត្តិធម៌វៀតណាម។

ទន្ទឹមនឹងនេះ រដ្ឋាភិបាលវៀតណាម បញ្ជាក់ទៀតថា បច្ចេកវិទ្យាទំនើបត្រូវតែយកទៅប្រើប្រាស់ ដើម្បីត្រួតពិនិត្យលើការល្មើសច្បាប់ចរាចរណ៍ និងធានាឲ្យបាននូវសន្តិសុខសាធារណៈ។ រដ្ឋាភិបាលក៏បានបញ្ជាឲ្យក្រសួងដឹកជញ្ជូនវៀតណាមសហការជាមួយក្រសួងសន្តិសុខសាធារណៈបង្ក្រាបតំបន់ឧស្សាហ៍មានគ្រោះថ្នាក់ចរាចរណ៍ញឹកញាប់ ជាពិសេសលើផ្លូវល្បឿនលឿន និងលុបបំបាត់ការឆ្លងកាត់ដោយខុសច្បាប់លើផ្លូវរថភ្លើង។

បើតាម Vietnam News កាលពីឆ្នាំមុន អាជ្ញាធរទីក្រុងហូជីមិញបានរៀបចំគម្រោងបំពាក់កាមេរ៉ា ប្រមាណ ១០០គ្រឿងដើម្បីត្រួតពិនិត្យសុវត្ថិភាពចរាចរណ៍។ ហើយវាគឺជាផ្នែកមួយនៃផែនការមេ ដើម្បីអភិវឌ្ឍទីក្រុងនេះ ឲ្យក្លាយជាទីក្រុងឆ្លាតវៃត្រឹមឆ្នាំ២០២០៕