ជាតិ
នយោបាយជាតិ
តុលាការ នឹងកាត់ក្តីលោក សម រង្ស៊ី ពីបទប្រមាថព្រះមហាក្សត្រនិងបទញុះញង់កងទ័ព
រូបពី AFP
×![]()
ដោយ: ថ្មីៗ
លោក ហម ម៉េងសែ ចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ចប់ការស៊ើបសួរលើសំណុំរឿងពីរផ្សេងទៀតរបស់លោក សម រង្ស៊ី គឺសំណុំរឿងប្រមាថព្រះមហាក្សត្រនិងសំណុំរឿងញុះញង់យោធាមិនឲ្យស្តាប់បញ្ជា។ ចៅក្រមស៊ើបសួររូបនេះ បានចេញសេចក្តីជូនដំណឹងថា សំណុំរឿងទាំងពីរនេះ ត្រូវបានសម្រេចបញ្ជូនទៅជំនុំជម្រះហើយ។ 
ក្រោមការបញ្ជារបស់ចៅក្រមស៊ើបសួរ សមត្ថកិច្ច បានយកសេចក្តីជូនដំណឹងស្តីពីការបញ្ជូនសំណុំរឿងរបស់លោក សម រង្ស៊ី ទៅជំនុំជម្រះ ទៅបិទនៅទីស្នាក់ការកណ្តាលនៃអតីតគណបក្សសង្គ្រោះជាតិ ដែលស្ថិតនៅសង្កាត់ចាក់អង្រែលើ នៅថ្ងៃទី២៦ ខែកុម្ភៈ ឆ្នាំ២០១៩នេះ។ យ៉ាងណា សេចក្តីជូនដំណឹង ពុំបានបញ្ជាក់ពីកាលបរិច្ឆេទនៃការបើកសវនាការជំនុំជម្រះនោះទេ។
លោក សម រង្ស៊ី រងបទចោទញុះញង់យោធា កាលពីអំឡុងខែធ្នូ ឆ្នាំ២០១៧ ដោយសារតែលោក អំពាវនាវឲ្យយោធានិងកងកម្លាំងប្រដាប់អាវុធ ឈរខាងលោកនិងប្រជាជន ក្នុងទាមទារឲ្យមានការផ្លាស់ប្តូរ។ ហើយលោក រងបទចោទប្រមាថព្រះមហាក្សត្រ កាលអំឡុងខែកក្កដា ឆ្នាំ២០១៨ ដោយសារតែកាលនោះ លោក អះអាងថា ព្រះរាជសាររបស់ព្រះមហាក្សត្រ ដែលអំពាវនាវឲ្យប្រជាពលរដ្ឋចេញទៅបោះឆ្នោត គឺជាព្រះរាជសារក្លែងក្លាយ។
បើសរុបទៅ លោក សម រង្ស៊ី បានរងបណ្តឹងមិនតិចជាង១០ទេ ពីសំណាក់ថ្នាក់ដឹកនាំនិងសកម្មជនគណបក្សប្រជាជនកម្ពុជា ដោយក្នុងនោះ មានបណ្តឹងខ្លះ ត្រូវបានជំនុំជម្រះរួចហើយ ហើយបណ្តឹងខ្លះទៀត កំពុងស្ថិតក្នុងចំណាត់ការរបស់តុលាការ៕
Tag:
សម រង្ស៊ី
តុលាការ
© រក្សាសិទ្ធិដោយ thmeythmey.com
