ទូតកម្ពុជាប្រចាំសិង្ហបុរីថាពិភពលោកស្គាល់ពាក្យ«គុនខ្មែរ»តាមរយៈ ONE Championship

ONE Championship

កីឡាជាតិ

ជាតិ

ទូតកម្ពុជាប្រចាំសិង្ហបុរីថាពិភពលោកស្គាល់ពាក្យ«គុនខ្មែរ»តាមរយៈ ONE Championship

26, Feb 2019 , 9:39 pm

រូបភាព

ដោយ: ថ្មីៗ

អត្ថបទ៖ Matias Andres

ឯកអគ្គរាជទូតកម្ពុជាប្រចាំសិង្ហបុរី លោក ងួន សុខវេង បានសរសើរកីឡាករគុនចម្រុះកម្ពុជាពីររូប គង់ សំបូរ និង ខុន ស៊ីចាន់ថាបានជួយផ្សព្វផ្សាយពាក្យ«គុនខ្មែរ» ទៅកាន់ពិភពលោក នៅមុនចូលប្រកួតក្នុងសង្វៀន ONE Championship នៃព្រឹត្តិការណ៍ ONE: CALL TO GREATNESS ថ្ងៃសុក្រទី២២ ខែកុម្ភៈ។

លោក សុខវេង មានប្រសាសន៍ថា៖ «ការខិតខំប្រឹងប្រែងនឹងហុចផលសម្រេច។ ការបញ្ជូនកីឡាករប្រយុទ្ធរបស់កម្ពុជាទៅប្រទេសមួយឬប្រទេសណាផ្សេងទៀតគឺជាវិធីដែលពួកយើងបង្ហាញពិភពលោកអំពីមរតកដ៏អស្ចារ្យរបស់យើង និងភាពខ្លាំងរបស់ប្រជាជនកម្ពុជាតាមរយៈគុនខ្មែរនិងល្បុក្កតោ»។

តំណាងមកពីប្រព័ន្ធផ្សព្វផ្សាយមួយចំនួនរបស់កម្ពុជាក៏មានវត្តមានក្នុងជំនួបនោះដែរ ព្រមជាមួយគ្រូបង្ហាត់របស់ សំបូរ និង ស៊ីចាន់ ផងគឺលោក Kwok Leung Tsang ដែលជាសហស្ថាបនិកក្លិបអាណាចក្រប្រយុទ្ធនិងលោក Alan Mccune អ្នកដឹកនាំក្លិប Phnom Penh MMA។

លោកឯកអគ្គរាជទូតក៏បានសន្យាថានឹងចូលរួមទស្សនាផ្ទាល់ព្រឹត្តិការណ៍ដែលបានប្រព្រឹត្តិឡើងនៅក្នុងកីឡដ្ឋាន Singapore Indoor Stadium ពីមុខទស្សនិកជនណែនណាន់តាន់តាប់ដែលបានទិញសំបុត្រអស់គ្មានសល់។

«ខ្ញុំ ក្នុងនាមស្ថានទូតកម្ពុជាប្រចាំសិង្ហបុរី សូមជូនពរ ស៊ីចាន់ និង សំបូរ ទទួលបានលទ្ធផលល្អបំផុត។ យើងខ្ញុំក៏សូមអរគុណដល់គ្រូបង្វឹក Alan និង ជា រិទ្ធ ចំពោះការបំពេញការងារយ៉ាងអស្ចារ្យ»។

ជាអកុសល ខុន ស៊ីចាន់ និង គង់ សំបូរ មិនអាចនាំយកជ័យជម្នះត្រលប់ទៅមាតុភូមិវិញឡើយ ទោះបីពួកគេបានត្រៀមលក្ខណៈយ៉ាងផ្ចិតផ្ចង់ក៏ដោយ។

ស៊ីចាន់ បានសុំចុះចាញ់កីឡាករឥណ្ឌូណេស៊ី Rudy “The Golden Boy” Agustian ក្នុងទឹកទី១ ក្នុងការប្រកួតគូបើកឆាកល្ងាចនោះ ខណៈ សំបូរ បានប្រកួតពេញ៣ទឹកទល់នឹងកីឡាករចិន Zhang Chenlong ហើយបានចាញ់ដោយពិន្ទុមិនឯកច្ឆន្ទ។

ទោះបីបរាជ័យក៏ដោយ ក្រុមរបស់ពួកគេបានរក្សាផ្នត់គំនិតវិជ្ជមានដែលស្របនឹងប្រសាសន៍របស់ឯកឧត្ដម សុខវេង មុនព្រឹត្តិការណ៍ ONE: CALL TO GREATNESS ថា៖ «វាជាឈាមពិតប្រាកដរបស់ប្រជាជនកម្ពុជា។ ពួកយើងជាអ្នកចម្បាំងដ៏ពិតប្រាកដ»៕