អន្តរជាតិ
ម៉ាឡេស៊ី គ្រោងបញ្ចេញគំរូរថយន្តហោះផលិតក្នុងស្រុកលើកដំបូងនាឆ្នាំ២០១៩នេះ រូបភាពតំណាង
× ម៉ាឡេស៊ី បង្ហាញគំរូឡានហោះដំបូងរបស់ខ្លួនទៅកាន់សាធារណៈជនក្នុងឆ្នាំ២០១៩។ នេះបើតាមការបញ្ជាក់របស់រដ្ឋមន្ត្រីអភិវឌ្ឍន៍សហគ្រិនភាព Mohd Redzuan Md Yusof ។ លោករដ្ឋមន្ត្រីរូបនេះបន្ថែមទៀតថា គំរូរថយន្តដែលត្រូវបានអភិវឌ្ឍដោយប្រើប្រាស់បច្ចេកវិទ្យាក្នុងស្រុកនេះ គឺមានសុវត្ថិភាពនិងសមត្ថភាពគ្រប់គ្រាន់ក្នុងការហោះហើរនៅរយៈពេលកម្ពស់ទាប និងនៅកម្រិតល្បឿនមធ្យម។
ថ្លែងនៅមុខអ្នកសារព័ត៌មាននៅថ្ងៃអង្គារទី២៦ ខែកុម្ភៈ លោក Mohd Redzuan និយាយថា៖«យើងនឹងប្រើប្រាស់បច្ចេកវិទ្យាក្នុងស្រុកដើម្បីបង្កើតឡានហោះ។ ហើយយើងនឹងពឹងផ្អែកលើភាគីបរទេសតែនៅពេលយើងចង់ផ្លាស់ប្តូរព័ត៌មានអំពីសុវត្ថិភាពឡានតែប៉ុណ្ណោះ»។
យោងតាមការចុះផ្សាយរបស់សារព័ត៌មាន Bernama លោករដ្ឋមន្ត្រីរូបនេះ បញ្ជាក់ថា ការវិនិយោគលើការបង្កើតគំរូឡានហោះនេះ គឺមានតម្លៃប្រមាណជាង ២៤៥ ៥០០ដុល្លារឯណោះ។ លោកបន្តថា គម្រោងឡានហោះនេះ គឺជាវិធីសាស្ត្រមួយរបស់រដ្ឋាភិបាលក្នុងគោលដៅបង្កើនការយល់ដឹងរបស់ប្រជាជនទាក់ទិននឹងបច្ចេកវិទ្យាថ្មី។
ទន្ទឺមនឹងនេះ លោក Mohd Redzuan បកស្រាយថា គម្រោងថ្មីនេះនឹងបង្កើនសក្ដានុពលសមត្ថភាពរបស់ម៉ាឡេស៊ីក្នុងវិស័យរថយន្ត, យានយន្តគ្មានមនុស្សបើក និងដែនអាកាសផងដែរ។ យ៉ាងណាមិញ លោកថា គម្រោងនេះគឺដាច់ដោយឡែកពីគម្រោងផលិតរថយន្តថ្នាក់ជាតិលើកទីបី ដែលបង្កើតឡើងដោយនាយករដ្ឋមន្ត្រី មហាធៀ មហាម៉ាត់ ៕
Tag:
ម៉ាឡេស៊ី
បច្ចេកវិទ្យា
© រក្សាសិទ្ធិដោយ thmeythmey.com