អន្តរជាតិ
លោក គីម ប្រជុំយុទ្ធសាស្ត្រជាមួយមន្ត្រីសំខាន់ៗ មុនជួបលោក ត្រាំ ប្រមុខដឹកនាំកូរ៉េខាងជើង គីម ជុងអ៊ុន ដឹកនាំកិច្ចប្រជុំជាមួយមន្រ្តីរបស់ខ្លួនមុនជំនួបជាមួយប្រធានាធិបតីអាមេរិក ដូណាល់ ត្រាំ (រូបភាព KCNA)
× ទៅដល់ទឹកដីវៀតណាមដើម្បីជួបលោក ដូណាល់ ត្រាំ ប្រមុខដឹកនាំកូរ៉េខាងជើង គីម ជុងអ៊ុន បានកោះប្រជុំជាមួយមន្ត្រីសំខាន់ៗរបស់ខ្លួន ក្នុងជំនួបដែលត្រូវបានហៅថា ជំនួបយុទ្ធសាស្ត្រ។ មន្ត្រីចរចាកូរ៉េខាងជើង បានផ្ដល់ព័ត៌មានលម្អិតទាក់ទងលទ្ធផលចរចាជាមួយអាមេរិកដែលធ្វើឡើងតាំងពីសប្ដាហ៍មុន។ ជំនួបដែលធ្វើឡើងថ្ងៃទី២៦ ខែកុម្ភៈ បង្ហាញពីការខ្វាយខ្វល់របស់មេដឹកនាំកូរ៉េខាងជើងជុំវិញជំនួបជាមួយលោក ត្រាំ ដែលផ្ដោតសំខាន់លើការរំសាយនុយក្លេអ៊ែររបស់រដ្ឋកុម្មុយនីស្តមួយនេះ។
ក្នុងរូបថតមួយសន្លឹកដែលផ្សាយទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី២៧ ខែកុម្ភៈ ប្រធានគណៈកម្មការកិច្ចការរដ្ឋ គីម ជុងអ៊ុន ត្រូវបានមើលឃើញថា អង្គុយស្ដាប់យ៉ាងយកចិត្តទុកដាក់ពីការរាយការណ៍របស់មន្ត្រីចរចាកូរ៉េខាងជើង។ ក្រុមមន្ត្រីកូរ៉េខាងជើង បានស្ថិតនៅវៀតណាមតាំងពីសប្ដាហ៍មុនដើម្បីជួបចរចាជាមួយភាគីអាមេរិកជុំវិញប្រធានបទកិច្ចប្រជុំ សេចក្ដីថ្លែងការណ៍រួម និងដំណើរការរំសាយនុយក្លេអ៊ែរ។
បើតាមរូបថតនោះ លោក គីម ត្រូវបានអង្គុយអមដោយប្រធានក្រុមចរចានុយក្លេអ៊ែរកូរ៉េខាងជើង គីម យុកឈុល, ប្រធានការិយាល័យយុទ្ធសាស្ត្រនៃនាយកដ្ឋានរណសិរ្សបក្សពលករកូរ៉េ គីម សុងហេ, រដ្ឋមន្ត្រីការបរទេស រី យ៉ុងហូ និងអនុរដ្ឋមន្ត្រីការបរទេស ឆេ ស៊ុនហ៊ី ដែលជាអតីតតំណាងចរចាជាមួយអាមេរិក។ អ្វីគួរឲ្យកត់សម្គាល់នោះ គេមិនឃើញវត្តមានលោក គីម យ៉ុងឈុល ដែលជាមន្ត្រីជាន់ខ្ពស់ទទួលបន្ទុកការចរចាមួយអាមេរិកឡើយ។
បើតាមការផ្សាយរបស់ KCNA ដែលត្រូវបានដកស្រង់ដោយទីភ្នាក់ងារព័ត៌មានកូរ៉េខាងត្បូង Yonhap ជំនួបយុទ្ធសាស្ត្រដែលធ្វើនៅសណ្ឋាគារប្រណីត Melia ប្រមុខដឹកនាំកូរ៉េខាងជើងបានស្ដាប់យ៉ាងយកចិត្តទុករបាយការណ៍លម្អិតពីជំនួបរវាងមន្ត្រីកូរ៉េខាងជើង និងអាមេរិកដែលជួបគ្នាដើម្បីរៀបចំជំនួបកូរ៉េខាងជើង-អាមេរិកឲ្យបានជោគជ័យ។ លោក គីម យុកឈុល បានជួបចរចាជាមួយសមភាគីអាមេរិកStephen Biegun នៅនាទីចុងក្រោយនៅហាណូយសំដៅបង្កើតកិច្ចព្រមព្រៀងនៃជំនួបនេះ។
បញ្ហាដែលជារបៀបវារៈសំខាន់នៃការចរចាមន្ត្រីថ្នាក់ក្រុមការងារនេះ គឺដំណើរការរំសាយនុយក្លេអ៊ែរ និងការចាត់វិធានការឆ្លើយតបរបស់អាមេរិកទៅនឹងសកម្មភាពរបស់កូរ៉េខាងជើង។ អ្វីដែលមន្ត្រីអាមេរិក និងកូរ៉េខាងជើងជជែកគ្នាខ្លាំងដើម្បីឲ្យដំណើរការរំសាយនុយក្លេអ៊ែរទៅមុខមានការបិទ និងការបំផ្លាញទីតាំងនុយក្លេអ៊ែរ Yongbyon ដ៏ល្បីឈ្មោះ ខណៈកូរ៉េខាងជើងចង់បានការលើកលែងទណ្ឌកម្ម និងការប្រកាសបញ្ចប់សង្គ្រាមកូរ៉េផ្លូវការ។
លោក គីម និងលោក ត្រាំ នឹងជួបគ្នានៅល្ងាចថ្ងៃទី២៧ ខែកុម្ភៈ និងអមដោយមន្ត្រីម្ខាងៗពីរនាក់ទៀត។ បន្ទាប់ទៅ មេដឹកនាំទាំងពីរ នឹងទទួលអាហារពេលល្ងាចរួមគ្នាផង។ នៅថ្ងៃទី២៨ ខែកុម្ភៈ ជាពេលវេលាសំខាន់ ដោយប្រធានាធិបតីអាមេរិក និងមេដឹកនាំកូរ៉េខាងជើង នឹងមានជំនួបចរចាកាន់តែលម្អិតថែមទៀត ដើម្បីដោះស្រាយបញ្ហានុយក្លេអ៊ែរកូរ៉េខាងជើង។ ក្ដីរំពឹងដែលមានខ្ពស់ជាងគេសម្រាប់ជំនួបលើកទីពីរនេះ គឺលោក ត្រាំ និងលោក គីម អាចនឹងប្រកាសបញ្ចប់សង្គ្រាមកូរ៉េ៕
Tag:
អាមេរិក
កូរ៉េខាងជើង
គីម ជុងអ៊ុន
© រក្សាសិទ្ធិដោយ thmeythmey.com