អន្តរជាតិ
មុនជួបលោក គីម លោក ត្រាំ ថា កូរ៉េខាងជើងអាចដូចវៀតណាម បើរំសាយនុយក្លេអ៊ែរ
ប្រធានាធិបតីអាមេរិក ដូណាល់ ត្រាំ កាន់ទង់ជាតិវៀតណាម ចំពោះមុខនាយករដ្ឋមន្រ្តី ង្វៀន ស៊ួនហ្វុក (រូបភាព AFP)
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី២៧ ខែកុម្ភៈ បានអះអាងថា កូរ៉េខាងជើង នឹងចម្រុងចម្រើនឆាប់រហ័សដូចវៀតណាម បើរដ្ឋកុម្មុយនីស្តមួយនេះរំសាយនុយក្លេអ៊ែររបស់ខ្លួន។ តាមរយៈ Twitter របស់ខ្លួន លោក ត្រាំ បានផ្ញើសារមានលក្ខណៈបន្ទន់ចិត្តទៀតថា កូរ៉េខាងជើងមានសក្ដានុពលខ្លាំងដែលប្រទេសផ្សេងទៀតក្នុងប្រវត្តិសាស្ត្រ។ 
ប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នឹងផ្ដើមជំនួបលើកទីពីររបស់ខ្លួននៅម៉ោង៦ និង៣០នាទីថ្ងៃទី២៧ ខែកុម្ភៈនៅឯសណ្ឋាគារ Sofitel Legend Metropole ក្នុងទីក្រុងហាណូយ។ មុនជំនួបលើកទីពីរតទល់ជាមួយប្រមុខដឹកនាំកូរ៉េខាងជើង លោក ត្រាំ ក៏ផ្ញើសារអន្ទងចិត្តជាថ្មីឲ្យកូរ៉េខាងជើងបោះបង់នុយក្លេអ៊ែររបស់ខ្លួន បើសិនជាចង់រីកចម្រើនដូចគេឯង។
ក្នុងសារ Twitter ជាលើកដំបូងតាំងពីទៅដល់វៀតណាម លោក ត្រាំ សរសេរថា វៀតណាមគឺជាប្រទេសជឿនលឿនមួយលើពិភពលោក ហើយកូរ៉េខាងជើងក៏អាចឈានដល់ចំណុចនេះយ៉ាងឆាប់រហ័សដែរ ប្រសិនបើបោះបង់នុយក្លេអ៊ែររបស់ខ្លួននោះ។ ប្រធានាធិបតីអាមេរិក បានហៅលោក គីម ថា ជាមិត្តភក្តិល្អរបស់ខ្លួន ហើយដែលមានសក្ដានុពលខ្លាំងទៀតផង។ បើតាមលោក ត្រាំ សក្ដានុពលកូរ៉េខាងជើង នឹងត្រូវបញ្ចេញឆាប់ៗនេះ។
មុនជួបលោក គីម មេដឹកនាំអាមេរិកក៏ជួបបណ្ដាមេដឹកនាំវៀតណាមដែលជាម្ចាស់ផ្ទះជំនួបត្រាំ-គីមលើកទីពីរផង។ នៅថ្ងៃទី២៧ ខែកុម្ភៈ លោក ត្រាំ បានជួបជាមួយប្រមុខបក្សកុម្មុយនីស្តវៀតណាម និងជាប្រធានរដ្ឋវៀតណាម ង្វៀន ភូជុង និងនាយករដ្ឋមន្ត្រី ង្វៀន សួនហ្វ៊ុក។ នាជំនួបជាមួយលោក ង្វៀន ភូជុង លោក ត្រាំ និយាយថា លោក និងលោក គីម មានអារម្មណ៍ក្នុងការជួបគ្នានៅវៀតណាម ព្រោះវៀតណាមជាគំរូដ៏ល្អ។
មានទីតាំងនៅអាស៊ីអាគ្នេយ៍ វៀតណាមត្រូវគេមើលឃើញថា ជាឧទាហរណ៍សមស្របបំផុតសម្រាប់កូរ៉េខាងជើងក្នុងការអភិវឌ្ឍសេដ្ឋកិច្ចរបស់ខ្លួន។ វៀតណាមជារដ្ឋកុម្មុយនីស្ត តែមានអនុវត្តប្រព័ន្ធសេដ្ឋកិច្ចទីផ្សារសេរី។ ដូចនេះ ប្រព័ន្ធដឹកនាំបែបនេះ អាចជាផ្លូវដើរថ្មីរបស់កូរ៉េខាងជើងពេលឈប់គិតគូរខ្លាំងទៀតលើការអភិវឌ្ឍនុយក្លេអ៊ែរនៅពេលខាងមុខ។
សម្រាប់ជំនួបមេដឹកនាំលើកទីពីរនេះ លោក ត្រាំ និងលោក គីម នឹងជួបទល់មុខរយៈពេល២០នាទី ដោយមានតែអ្នកបកប្រែប៉ុណ្ណោះ។ នេះបើតាមការប្រកាសរបស់សេតវិមាន ដែលបន្តថា ក្រោយជជែកគ្នាទល់មុខរួច មេដឹកនាំទាំងពីរនឹងចូលរួមកម្មវិធីអាហារពេលល្ងាចរយៈពេលមួយម៉ោងកន្លះទៀត ដោយមានវត្តមានមន្ត្រីសំខាន់ៗចូលរួមដែរ។ រដ្ឋមន្ត្រីការបរទេស ម៉ៃ ប៉ុមប៉េអូ និងនាយកស្តីទីខុទ្ទការល័យប្រធានាធិបតី Mick Mulvaney ជាមន្ត្រីអមលោក ត្រាំ ខណៈលោក គីម យ៉ុងឈុល និងមន្ត្រីម្នាក់ទៀត នឹងអង្គុយអមលោក គីម ៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
