សៀង ចន្ធា នៅតែស្តាយឱកាសមាសរបស់ខ្លួននាជំនួបដណ្តើមលេខបីជាមួយវៀតណាម

កីឡាជាតិ

ជាតិ

សៀង ចន្ធា នៅតែស្តាយឱកាសមាសរបស់ខ្លួននាជំនួបដណ្តើមលេខបីជាមួយវៀតណាម

27, Feb 2019 , 9:39 pm

រូបភាព

ដោយ:

ខ្សែប្រយុទ្ធវ័យក្មេង សៀង ចន្ធា បានបង្ហាញអារម្មណ៍សោកស្តាយយ៉ាងខ្លាំង ក្រោយខកឱកាសក្នុងការសម្រេចទីនាជំនួបដណ្តើមចំណាត់ថ្នាក់លេខ៣ជាមួយ U22 វៀតណាម កាលពីរសៀលថ្ងៃទី២៦ ខែកុម្ភៈ។ ចន្ធា បានដាក់កំហុសលើខ្លួនឯងដោយចាត់ទុកការសម្រេចស៊ុតបាល់មិនបោះឲ្យមិត្តរួមក្រុម ក្រោយអូសផុតខ្សែការពារវៀតណាមជាការសម្រេចចិត្តខុស។ ជាមួយការសុំទោសអ្នកគាំទ្រចំពោះកំហុសកើតឡើងដោយអចេតនា រូបគេរំពឹងថា អ្នកគាំទ្រនឹងបន្តគាំទ្រក្រុមយុវជន និងជម្រើសជាតិកម្ពុជា។

សមាជិកក្រុមកីឡាបាល់ទាត់ជម្រើសជាតិអាយុក្រោម២២ឆ្នាំកម្ពុជា សៀង ចន្ធា បានសុំទោសប្រជាពលរដ្ឋ ពិសេសអ្នកគាំទ្រកីឡាបាល់ទាត់ ក្រោយរូបគេធ្វើឲ្យរំលងឱកាសមាសក្នុងការបំប៉ោងសំណាញ់ទីក្រុម U22 វៀតណាម នាជំនួបដណ្តើមចំណាត់ថ្នាក់លេខ៣ក្នុងព្រឹត្តិការណ៍ AFF U22 Championship កាលពីថ្ងៃទី២៦ កុម្ភៈ នៅពហុកីឡដ្ឋានជាតិ។ ចន្ធា បានចាត់ទុកការសម្រេចស៊ុតបាល់សំដៅសំណាញ់ទីក្រោយអូសផុតខ្សែការពារវៀតណាម ជាកំហុសកើតពីការសម្រេចចិត្តមិនបានត្រឹមត្រូវ។

«ក្នុងអំឡុងពេលនោះ(ពេលអូសបាល់ដាច់ម្នាក់ឯង)ខ្ញុំសម្រេចចិត្តខុស។ ខុសត្រង់យើងសម្រេចចិត្តយឺតពេកអត់បានមើលជំហររបស់អ្នកចាំទី(វៀតណាម)។ សម្រាប់ខ្ញុំដំណោះស្រាយ គឺត្រូវប៉ះឲ្យមិត្តរួមក្រុម ឬទាត់លើក្បាលអ្នកចាំទីព្រោះគាត់ផ្តេកខ្លួន។ ពីដំបូងខ្ញុំអត់ឃើញមិត្តរួមក្រុមនោះទេ ពេលជិតដល់ទីខ្ញុំឃើញ តែវាយឺតពេលទៅហើយ»។ នេះជាការបញ្ជាក់របស់ សៀង ចន្ធា។

យុវជនសាលាបាល់ទាត់ជាតិបាទីរូបនេះបានបន្ថែមថា រូបគេមានអារម្មណ៍សោកស្តាយយ៉ាងខ្លាំងចំពោះកំហុសមួយនេះ ព្រោះវាអាចជាគ្រាប់បាល់ដែលនាំកម្ពុជាយកឈ្នះវៀតណាមជាប្រវត្តិសាស្ត្រ។ រូបគេបានរៀបរាប់ដូច្នេះថា៖«ស្តាយខ្លាំងបង ដោយសារគ្រាប់នឹងអាចនាំឲ្យយើងទទួលបានចំណាត់ថ្នាក់លេខ៣។ ជាដំបូងខ្ញុំសុំទោសអ្នកគាំទ្រ ដែលមិនអាចរកគ្រាប់បាល់ឲ្យក្រុម U22 កម្ពុជា»។

ទោះបីយ៉ាងនេះក្តី សៀង ចន្ធា បានចាត់ទុកការបង្ហាញខ្លួនជាមួយក្រុមជម្រើសជាតិអាយុក្រោម២២ឆ្នាំកម្ពុជា ជាឱកាសមួយដ៏ល្អសម្រាប់រូបគេក្នុងការដកស្រង់បទពិសោធ ដើម្បីអភិវឌ្ឍន៍សមត្ថភាពឲ្យកាន់តែល្អប្រសើរថែមទៀត។ ជាមួយការទទួលស្គាល់នៅខ្សោយផ្នែកកាយសម្បទា និងកម្លាំង ខ្សែប្រយុទ្ធវ័យ១៧ឆ្នាំរូបនេះរំពឹងថា រូបគេនឹងទទួលបានឱកាសជាប់ជម្រើសជាតិសាជាថ្មីសម្រាប់ការប្រកួតវគ្គជម្រុះ AFC U23 Championship ដែលនឹងចាប់ផ្តើមនៅអំឡុងខែមិនា ឆ្នាំ២០១៩។ ជាមួយគ្នានេះរូបគេប្តេជ្ញាថា នឹងខិតខំប្រឹងប្រែងហ្វឹកហាត់អភិវឌ្ឍន៍សមត្ថភាពឲ្យកាន់តែល្អប្រសើរថែមទៀត។

សម្រាប់ការប្រកួតដណ្តើមពានរង្វាន់ AFF U22 Championship ដែលរៀបចំចន្លោះពីថ្ងៃទី១៧-២៦ ខែកុម្ភៈ ម្ចាស់ផ្ទះកម្ពុជាទទួលបានចំណាត់ថ្នាក់លេខ៤ ក្រោយប្រកួតចាញ់ U22 វៀតណាមយ៉ាងប្រផិតប្រផើយនៅចុងម៉ោង ១-០។ U22 កម្ពុជា ក៏ជាក្រុម Fair Play ប្រចាំព្រឹត្តិការណ៍នេះផងដែរ។ ចំណែកក្រុម U22 ឥណ្ឌូណេស៊ី ដែលបានទម្លាក់ U22 វៀតណាមនៅវគ្គពាក់កណ្តាលផ្តាច់ព្រ័ត្រជាម្ចាស់ជើងឯកប្រចាំព្រឹត្តិការណ៍នេះ ក្រោយយកឈ្នះក្រុមការពារតំណែងជើងឯក U22 ថៃ ក្នុងលទ្ធផល ២-១ នៅវគ្គផ្តាច់ព្រ័ត្រ៕